Read Batak Simalungun 2 MUSA 11 Bible Online

2 MUSA 11 - Batak Simalungun bible

2 MUSA 11

¹Dob ai nini Jahowa ma dompak si Musa, “Sada nari ope parohon-Ku uhum hubani Parao pakon hu Masir, dob ai palopasonni ma hanima laho hunjon; sanggah na pinalopasni ai hanima laho, juljulonni do hanima hunjon.

²Hatahon hanima ma hu pinggol ni bangsa in, ase ganup dalahi pakon naboru mangindo humbani huan-kuanni ugas pirak pakon ugas omas.” [81]

³Domma iojur Jahowa hinan, ase maidop uhur ni halak Masir bani bangsa ai. Si Musa pe halak na sangap tumang do i tanoh Masir ididah juakjuak ni Parao pakon ididah bangsa ai.

⁴Dob ai nini si Musa ma, “Sonon do hata ni Jahowa, ʻHira-hira tongah borngin bontason-Ku ma tongah-tongah ni Masir.

⁵Jadi matei ma ganup bunga tubuh i tanoh Masir, humbani bunga tubuh ni Parao, na hundul i paratasni, das hubani bunga tubuh ni jabolon naboru, na i pudi ni pandudaan pakon ganup bunga tubuh ni pinahan.ʼ ” [82]

⁶Jadi masa ma doruh banggal i sab tanoh Masir, na so ongga masa sonai, anjaha seng anjai masa be sonai.

⁷Tapi anggo bani haganup halak Israel seng mahua baliang, age sada, sonai jolma pakon pinahan, ase itanda ho naha parpalegan ni Jahowa bani halak Israel humbani halak Masir. [83]

⁸Anjaha tuad ma ganup juakjuakmu marayak ahu, sombahon ni sidea ma ahu, hatahonon ni sidea ma, “Luar ma ham pakon ganup bangsa in na mangirikkon ham.” Dob salpu sonai luar ma ahu. Dob ai luar ma ia hun lobei ni Parao manringis tumang.

⁹Dob ai nini Jahowa ma dompak si Musa, “Seng anjai tangihonon ni Parao hanima, ase lambin buei halongangan sibahenon-Ku i tanoh Masir.”

¹⁰Domma ibahen si Musa pakon si Aron ganup halongangan ai i lobei ni Parao; tapi ipahengkeng Jahowa do uhur ni Parao, gabe seng ilopas halak Israel laho hun tanohni. [84]