Read Batak Simalungun 2 MUSA 12 Bible Online

2 MUSA 12 - Batak Simalungun bible

2 MUSA 12

¹Dob ai nini Jahowa ma dompak si Musa pakon si Aron i tanoh Masir,

²“Bulan on ma gabe parmulaan ni bulan bannima, bulan sada ni tahun ma in bannima. [85]

³Hatahon hanima ma hubani ganup tumpuan ni Israel sonon, ʻBani ari sapuluh bulan on ganup ma hanima mambuat sada anak ni biribiri, marguru hubani buei ni tangga ni sidea mar sasaompung, sada biribiri ganup tangga.

⁴Tapi anggo maotiktu sada tangga, gabe seng tarboiskonsi sada anak ni biribiri, ibuat ma ai rap pakon halak romban rumahni marguru hubani buei ni jolma; marguru na tarboiskon ganup ma agakonmu anak ni biribiri ai.

⁵Seng martikas, tunggal anjaha marumur satahun do anak ni biribiri ai; maningon humbani biribiri atap humbani hambing do buatonnima ai. [86]

⁶Anjaha maningon pasirsironnima ma ai das bani ari sapuluh ompat bulan on, dob ai sayaton ni ganup tumpuan ni Israel ma ai malele bod.ʼ

⁷Dob ai maningon buaton ni sidea ma humbani daroh ai, anjaha daiskononni ma ai hubani pasihon na dua ai pakon hubani tohang ni rumah parmanganan ni sidea ai.

⁸Anjaha maningon panganon ni sidea ma bornginni ai na pinanggang hubani apuy; maningon panganon ni sidea ma ai rap pakon ruti na so niigaran ampa lowoh na mapaet.

⁹Lang bulih matah panganonnima ai atap ilompah ibagas bah, tapi maningon panggangon do hubani apuy, uluni, hae-haeni pakon bituhani.

¹⁰Lang bulih teba hunjai das hubani patarni. Porini dong na tading hunjai das hubani patarni, maningon rasogon do hubagas apuy.

¹¹Sonon ma sibahenonnima laho mangankon ai: Margondit ma binongeinima, naheinima marsipatu, tungkotnima ibagas tangannima; mangolos ma hanima mangankon ai, ai Paskah ni Jahowa do ai. [87]

¹²Ai bontason-Ku ma bani na saborngin ai tanoh Masir, anjaha Bunuhon-Ku ma ganup bunga tubuh ni tanoh Masir, humbani jolma das hubani pinahan; anjaha dabuhon-Ku ma uhum hubani ganup naibata ni Masir: Ahu do Jahowa. [88]

¹³Daroh ai ma partandaan bannima i rumah na niiankonnima; anggo Huidah daroh ai laosan-Ku ma hanima, seng sogop be bannima uhum hamagouan, sanggah na Hubogbogi ai Masir. [89]

¹⁴Ari pardingatan ma ari on bannima, bosarhon hanima ma on bani Jahowa, gabe tonah sisadokah-dokahni ma on bani ginomparnima, sibosarhononnima.

¹⁵Maningon panganonnima do ruti na so niigaran layur pitu ari; bani ari na parlobei maningon ambukkononnima do na migar hun rumahnima, halani maningon raseionkon do atap ise na mangankon na niigaran humbani ari na parlobei das hubani ari na papituhon.

¹⁶Bahenonnima ma bani ari na parlobei partumpuan na pansing anjaha bani ari papituhon pe bahenon do partumpuan na pansing; aha pe lang bulih horjaonkon ijai, pitah sipanganonni bei bulih hoseihononnima.

¹⁷Maningon dalankononnima do pesta ruti na so niigaran ai, ai bani ari na sasada ai do Hubobahon balanima luar hun tanoh Masir. Halani ai maningon ramotkononnima do ari na sasada on torus hubani ginomparnima, songon tonah sisadokah ni dokahni.

¹⁸Bani bulan sada, ari sapuluh ompat bodari, panganonnima ma ruti na so niigaran ai das bani ari dua puluh sada bodari.

¹⁹Manipat pitu ari seng bulih jumpah na migar i rumahnima, ai raseionkon do humbani tumpuan ni Israel atap ise na mangankon na niigaran, barang panginsolat barang pangisi ni tanoh ai pe ia.

²⁰Seng bulih panganonnima na niigaran; pangan hanima ma bani ganup ianannima ruti na so niigaran.”

²¹Dob ai idilo si Musa ma ganup sintua ni Israel, ihatahon ma hubani sidea, “Pilih anjaha buat nasiam ma anak ni biribiri bani nasiam marguru hubani buei ni nasiam satangga, anjaha sayat nasiam ma Paskah in.

²²Buat nasiam ma sarahutan hisop, sornobkon nasiam ma in hubagas daroh na i pinggan, anjaha daiskon nasiam ma daroh na i pinggan ai hubani tohang pakon hubani pasihon na dua ai; anjaha ulang ma luar nasiam hun labah ni rumah nasiam paima siang ari. [90]

²³Ai mamontas do Jahowa, laho mambogbog Masir; anggo iidah Jahowa daroh na i tohang pakon na i pasihon na dua ai, gabe laosan ni Jahowa ma labah ai, seng lopason-Ni pangagou ai masuk hu rumah nasiam laho mangagou nasiam.

²⁴Maningon ramotkonon nasiam ma tonah ai, gabe titah ma ai bani nasiam pakon bani anak nasiam sadokah ni dokahni.

²⁵Anjaha ia dob das nasiam hu tanoh sibereon ni Jahowa hubani nasiam, songon na hinatahon-Ni ai, maningon dalankonon nasiam do horja on.

²⁶Anjaha anggo ihatahon anak nasiam bani nasiam, ʻHorja ugama aha do on bani nasiam?ʼ ” [91]

²⁷Hatahon nasiam ma, “Galangan Paskah do in hubani Jahowa, halani ilaosi do rumah ni halak Israel i Masir, sanggah binogbogan-Ni ai Masir, tapi ipaluah do anggo rumahta. Jadi unduk ma bangsa ai anjaha marsombah.”

²⁸Dob ai laho ma halak Israel anjaha ibahen sidea ma songon na tinonahkon ni Jahowa hubani si Musa pakon si Aron, sonai ma ibahen sidea.

²⁹Jadi tongah borngin ibunuh Jahowa ma ganup bunga tubuh i tanoh Masir, humbani bunga tubuh ni Parao nari, na hundul i paratasni ronsi bunga tubuh ni na tartutup, na ibagas tutupan pakon sagala bunga tubuh ni pinahan. [92]

³⁰Jadi puho ma Parao borngin ni ai, ia pakon ganup juakjuakni ronsi ganup halak Masir; masa ma doruh bolon i Masir, ai seng dong rumah na so dong na matei ijai.

³¹Jadi idilo ma si Musa pakon si Aron borngin ni ai, nini ma, “Bingkat ma hanima misir hun tongah-tongah ni bangsangku, age hanima age halak Israel; laho ma hanima, sombah hanima ma Jahowa, songon na hinatahonnima in.

³²Boan hanima ma homa biribiri pakon lombunima, songon na hinatahonnima in, laho ma hanima anjaha pasu-pasu hanima ma homa ahu.”

³³Jadi ijuljul halak Masir ma bangsa ai ase iolos luar hun tanoh ai, ai nini sidea do, “Matei holi hanami ganup.” [93]

³⁴Jadi iboban bangsa ai ma nitakni, sanggah lape iigari ope rap pakon balanga panggorenganni ibaluti i atas abarani.

³⁵Jadi ibahen halak Israel ma songon na hinatahon ni si Musa, ipindo sidea ma humbani halak Masir ugas-ugas pirak, ugas-ugas omas pakon hiou. [94]

³⁶Ai domma iojur Jahowa halak Masir, ase maidop ni uhur sidea hubani bangsa ai, gabe ibere sidea ma pangindoan ni sidea ai. Sonai ma pangayob ni sidea humbani halak Masir. [95]

³⁷Ase misir ma halak Israel hun Raemses hu Sukot, hira-hira onom ratus ribu dalahi bueini na mardalan nahei, legan ni naboru pakon dakdanak.

³⁸Buei do homa halak na legan tangkog rap pakon sidea, sonai homa biribiri, lombu pakon pinahan, buei tumang.

³⁹Jadi ilompah sidea ma nitak, na binoban ni sidea hun Masir bahen ruti na so niigaran, halani seng iigari hinan ai, ai na nijuljul do sidea hun Masir gabe seng sompat nanggei sidea, anjaha seng dong homa bohal na legan ipasirsir sidea hinan bani sidea.

⁴⁰Ia dokah ni halak Israel marianan i Masir ompat ratus tolu puluh tahun do. [96]

⁴¹Jadi dob salpu na ompat ratus tolu puluh tahun ai, bani ari na sasada ai, luar ma ganup bala ni Jahowa hun tanoh Masir.

⁴²Sada borngin na marjaga-jaga do on bani Jahowa laho paluar sidea hun tanoh Masir; jadi borngin marjaga-jaga ma on bani halak Israel ronsi ginompar ni sidea bahen pardingatan bani Jahowa.

⁴³Nini Jahowa ma dompak si Musa pakon si Aron, “On ma aturan pasal Paskah in: Seng bulih panganon ni halak na legan hunjin;

⁴⁴tapi sagala jabolon, na binoli ni duit, boi do panganonni hunjin dob isunat hanima ia.

⁴⁵Halak panginsolat atap halak upahan seng bulih panganonni hunjin.

⁴⁶Ibagas rumah ma in ipangan, seng bulih bobanonmu humbani gulei in hu darat ni rumah, anjaha seng bulih ponggolhononnima holi-holini age sada.

⁴⁷Maningon ganup tumpuan ni Israel mambahen sonai.

⁴⁸Tapi anggo adong halak na legan tondok bam, anjaha sihol horjahononni Paskah ai bani Jahowa, maningon sunaton lobei sagala dalahi na rapkonsi; dob ai pe ase bulih dohor ia laho mangkorjahon ai, ase gabe doskon pangisi ni tanoh in ia. Tapi sagala na so marsunat seng bulih mangankon hunjai.

⁴⁹Sada ma titah hubani pangisi ni tanoh in pakon hubani halak na legan, na manginsolat i tongah-tongahnima.”

⁵⁰Jadi ibahen haganup halak Israel ma songon na tinonahkon ni Jahowa hubani si Musa pakon si Aron, sonai do ibahen sidea.

⁵¹Ase bani ari na sasada ai ma iarahkon Jahowa halak Israel luar hun tanoh Masir romban hubani bala ni sidea.