Read Batak Simalungun 2 MUSA 13 Bible Online

2 MUSA 13 - Batak Simalungun bible

2 MUSA 13

¹Dob ai nini Jahowa ma dompak si Musa sonon,

²“Papansing ma Bangku ganup bunga tubuh na parlobei luar hun parnaibataan i tongah-tongah ni halak Israel, humbani jolma pakon humbani pinahan, Ahu do simada ai.” [97]

³Jadi nini si Musa ma dompak bangsa ai, “Ingat nasiam ma ari on, parluar nasiam hun Masir, hun rumah parjabolonan, ai marhitei tangan na gogoh do ipaluar Jahowa nasiam hunjai; ulang ipangan nasiam na niigaran.

⁴Sadari on do nasiam luar bani bulan Abib. [98]

⁵Anjaha ia dob das nasiam ibobahon Jahowa hu tanoh ni halak Kanaan, Heti, Amori, Hewi pakon Jebusi, na dob binulawankon-Ni hubani ompung nasiam, mamberehon bani nasiam tanoh habaoran ni dadih pakon manisan, sai horjahon nasiam ma horja on bani bulan on. [99]

⁶Pitu ari ma panganon nasiam ruti na so niigaran, anjaha bani ari papituhon ma pesta bani Jahowa.

⁷Ruti na so niigaran ma panganon bani na pitu ari ai, seng bulih idahon bani nasiam ruti na niigaran, anjaha seng bulih idahon bani nasiam na migar bani sab gomgoman nasiam. [100]

⁸Patugah ma hubani anakmu bani ari ai sonon, ʻHalani na binahen ni Jahowa do on bangku sanggah parluarhu hun Masir.

⁹Gabe partandaan ma in bam i tanganmu anjaha gabe pardingatan i holangkolang ni matamu, ase ibagas pamanganmu titah ni Jahowa, ai Jahowa do mambobahon ho luar hun tanoh Masir marhitei tangan na gogoh. [101]

¹⁰Maningon horjahononmu ma titah on bani parjumpah ni panorangni ganup tahun.”

¹¹Ia dob das ho iboban Jahowa hu tanoh ni halak Kanaan songon na dob binulawankon-Ni bam pakon hubani ompungmu, anjaha iberehon ai bam,

¹²maningon ondoskononmu ma hubani Jahowa sagala anak na parlobei luar hun partapaan; sagala tunggal bunga tubuh ni pinahanmu Jahowa do homa simadasi.

¹³Tapi sagala bunga tubuh ni halode maningon tobusonmu do marhitei anak ni biribiri, atap anggo seng tobusonmu ai, maningon ponggolhononmu do borgokni. Sagala bunga tubuh ni jolma i tongah-tongah ni anakmu maningon tobusonmu do.

¹⁴Anjaha anggo isungkun anakmu ho magira, “Aha do on? Jadi hatahon ma bani: Marhitei tangan na gogoh ibobahon Jahowa do hanami luar hun Masir, hun rumah parjabolonan. [102]

¹⁵Ai sanggah na manendel Parao palopas hanami laho, jadi ibunuh Jahowa ma sagala bunga tubuh i tanoh Masir, humbani bunga tubuh ni jolma nari das hubani bunga tubuh ni pinahan. Halani ai do ase hugalangkon sagala bunga tubuh tunggal hubani Jahowa, tapi sagala bunga tubuh i tongah-tongah ni anakku hutobus do. [103]

¹⁶Bahen partandaan ma in ibagas tanganmu anjaha bahen pardingatan i holangkolang ni matamu, ai marhitei tangan na gogoh do Jahowa paluarhon hanami hun Masir.”

¹⁷Dob ilopas Parao bangsa ai laho, seng ibobai Jahowa sidea hun dalan na hun tanoh ni halak Palistim age pe dohoran do ai; ai nini Naibata do, “Atap manosal holi bangsa in anggo ididah hamunsuhon, gabe mulak sidea holi hu tanoh Masir.”

¹⁸Halani ai maringgot ma bangsa ai ibobahon Jahowa hun dalan na hu halimisan dompak Laut Sigerger, anjaha marsinjata bei do halak Israel tangkog hun tanoh Masir.

¹⁹Iboban si Musa do homa holiholi ni si Josep, ai ipabija hinan do halak Israel, nini do, “Sai na parayakon ni Naibata do nasiam, jadi boban nasiam ma holiholingku hunjon.” [104]

²⁰Jadi misir ma sidea hun Sukot, anjaha marsaran ma sidea i Etkam bani topi ni halimisan ai.

²¹Anjaha Jahowa do mardalan i lobei ni sidea, arian marhitei hombun na jongjong mambobahon sidea i dalan ai, ia borngin marhitei apuy na jongjong bahen suluh bani sidea, ase boi sidea mardalan arian pakon borngin. [105]

²²Seng ongga meret hombun na jongjong ai arian, pakon apuy na jongjong ai borngin humbani bangsa ai.