Read Batak Simalungun 2 MUSA 14 Bible Online

2 MUSA 14 - Batak Simalungun bible

2 MUSA 14

¹Dob ai nini Jahowa ma dompak si Musa,

²“Hatahon ma hubani halak Israel, ase marhusor sidea mulak anjaha marsaran tontang ni Pi-Hahirot, i holangkolang ni Migdol pakon laut, tontang ni Baal-Zefon; tontang ni ai ma hanima marsaran, dohorhon laut.

³Ai hatahonon ni Parao ma pasal halak Israel, ʻDomma kahou sidea i tanoh ai, domma ihapit halimisan ai sidea.ʼ

⁴Jadi pahengkengon-Ku ma uhur ni Parao, anjaha pardakdakonni ma sidea, gabe marmulia ma Ahu bani Parao pakon bani ganup balani; tandaon ni Masir ma, Ahu do Jahowa.”Jadi ibahen sidea ma sonai. [106]

⁵Dob tarbotoh bani raja ni Masir na dob lintun bangsa ai, mubah ma uhur ni Parao pakon juakjuakni dompak bangsa ai, nini sidea ma, “Aha do na binahenta on, ilopas hita do laho halak Israel maluah humbani parjabolonanta?”

⁶Ipasang ma gareta porangni anjaha iarah ma bangsani bingkat rapkonsi.

⁷Iboban ma onom ratus gareta porang na pinilih pakon sagala gareta porang na legan na adong i Masir rap pakon tolu halak bei parmunsuh i atas ni ai ganup.

⁸Ai ipahengkeng Jahowa do uhur ni Parao, raja ni Masir ai, ase ipardakdak halak Israel, age pe domma luar halak Israel binobahon ni sada tangan na gogoh. [107]

⁹Iayak halak Masir ma sidea, marhitei sagala huda pakon gareta ni Parao rap pakon na mangkundulisi ampa balani, gabe jumpah sidea ma sidea marsaran dohorhon laut i lambung ni Pi- Hahirot tontang ni Baal-Zefon.

¹⁰Dob hun dohor Parao, mangkawah ma halak Israel, jadi tonggor ma, halak Masir roh mardakdak sidea, gabe mabiar tumang ma sidea. Jadi mandoruhi ma halak Israel hubani Jahowa,

¹¹anjaha nini sidea ma dompak si Musa, “Binahen ni na so dong tanoman i Masir gakni, mambahen na iarahkon ho hanami laho matei i halimisan on? Mase ma sonai pambahenmu bennami, iarahkon ho hanami luar hun tanoh Masir?

¹²Ai lang ihatahon hanami hinan do hubam i tanoh Masir Sonon, ʻPaturut ma hanami iparjabolon halak Masir, ai dearan do hanami iparjabolon halak Masir, humbani na matei i halimisan.ʼ ”

¹³Jadi nini si Musa ma hubani bangsa ai, “Ulang nasiam mabiar, totap ma uhur nasiam, anjaha tonggor nasiam ma haluahon ni Jahowa sibahenon-Ni hubani nasiam sadari on; ai halak Masir na niidah nasiam sadari on, seng be idahon nasiam sidea sadokah ni dokahni.

¹⁴ Jahowa do marporang mangkopkop nasiam, anjaha siplah nasiam.” [108]

¹⁵Dob ai nini Jahowa ma dompak si Musa, “Mase ma doruh-doruh ho hu Bangku? Hatahon ma bingkat halak Israel!

¹⁶Tapi anggo ho angkat ma tungkotmin, pagostong ma tanganmu hu babou ni laut in, laho manirang bahni, ase boi bontason ni halak Israel laut in mardalan bani na horah.

¹⁷Tapi anggo Ahu, tonggor ma, pahengkengon-Ku ma uhur ni halak Masir, ase ipardakdak sidea halak Israel gabe marmulia Ahu humbani Parao pakon humbani ganup balani, humbani gareta porangni pakon humbani siajak hudani. [109]

¹⁸Ase ibotoh halak Masir, Ahu do Jahowa, ia dob marmulia Ahu humbani Parao, humbani gareta porangni pakon humbani siajak hudani.”

¹⁹Dob ai minsah ma malekat ni Naibata na mardalan i lobei ni bala ni Israel, laho ma ia hu pudi ni sidea; minsah ma pakon hombun na jongjong ai hun lobei ni sidea anjaha jongjong hu pudi ni sidea, [110]

²⁰roh hu holangkolang ni bala ni Masir pakon bala ni Israel. Ia hombun ai golap do salopah anjaha na salopah nari manorangi borngin ai, gabe seng marsidohoran sidea manipat na saborngin ai.

²¹Jadi ipagostong si Musa ma tanganni hu babou ni laut ai; anjaha surut ma laut ai ibahen Jahowa marhitei logou hapoltakan na doras manipat saborngin ai, gabe horah ma laut ai anjaha bolah bah ai.

²²Masuk ma halak Israel hu tongah-tongah ni laut, hubani na horah ai, anjaha hira dingding ma bah ai i siamun pakon i sambilou ni sidea. [111]

²³Dob ai iayak halak Masir ma sidea, masuk hun pudi ni sidea, haganup huda ni Parao, gareta porangni pakon siajak hudani hu tongah-tongah ni laut ai. [112]

²⁴Jadi bani runda marayak siang ari, ikawahkon Jahowa ma bala ni Masir humbani apuy pakon hombun na jongjong ai, anjaha igeori ma bala ni halak Masir ai. [113]

²⁵Itogong ma galapang ni gareta ni sidea, gabe mogot-ogot ma sidea. Jadi nini halak Masir ma, “Maporus ma hita hun lobei ni Israel, ai Jahowa do marporang i tongah-tongah ni sidea mangimbang halak Masir.”

²⁶Dob ai nini Jahowa ma dompak si Musa, “Pagostong ma tanganmu hu babou ni laut in, ase mulak suang bah ai langkob hubani halak Masir, hubani gareta porangni pakon hubani siajak hudani.”

²⁷Jadi ipagostong si Musa ma tanganni hu babou ni laut ai, gabe mulak suang ma laut ai malele siang ari hubani dalanni hinan, gabe maporus hubagas bah ai ma halak Masir; sonai ma isampakkon Jahowa halak Masir hu tongah-tongah ni laut ai.

²⁸Mulak suang ma bah ai anjaha irongkob ma gareta porang, siajak huda pakon ganup bala ni Parao, sagala na mangirikkon halak Israel hubagas laut ai, sahalak pe lang tading humbani sidea.

²⁹Tapi anggo halak Israel mardalan do bani na horah i tongah-tongah ni laut ai, anjaha gabe dingding bani sidea bah ai i siamun pakon i sambilou ni sidea. [114]

³⁰Sonai ma halak Israel ipaluah Jahowa bani na sadari ai humbani tangan ni halak Masir, gabe ididah halak Israel ma halak Masir matei i topi ni laut ai.

³¹Jadi ididah halak Israel ma pambahenan banggal na binahen ni Jahowa hubani halak Masir, gabe mabiar ma bangsa ai bani Jahowa; porsaya ma sidea bani Jahowa pakon bani si Musa juakjuak-Ni ai.