Read Batak Simalungun 2 MUSA 15 Bible Online

2 MUSA 15 - Batak Simalungun bible

2 MUSA 15

¹Jadi ijia idodingkon si Musa pakon halak Israel ma doding on bani Jahowa, nini sidea ma, “Mandoding ma ahu bani Jahowa, ai marmulia tumang do Ia; huda pakon na mangajaksi isampakkon do hubagas laut. [115]

²Jahowa do hagogohonku pakon dodingku, anjaha Ia do hatuahon bangku; Ia do Naibatangku, pasangaponku ma Ia, Naibata ni bapangkin, patimbulonku ma Ia. [116]

³Puanglima do Jahowa, Jahowa do goran-Ni. [117]

⁴Isampakkon do gareta porang ni Parao pakon balani hubagas laut; anjaha mogap do puanglima pilihanni ibagas Laut Sigerger.

⁵Isangkobi bah do sidea; mogap do sidea songon batu hu toruh.

⁶Marmulia marhitei hagogohon do tangan siamun-Mu, Ham Jahowa; tangan siamun-Mu in do, Ham Jahowa, manropuki munsuh in.

⁷Marhitei hatimbulon ni hasangapon-Mu iraseihon Ham do na manlawan Ham; ipadalan Ham do ringis-Mu mamboiskon sidea songon anggala.

⁸Marhitei hosah ni igung-Mu bongbong bah in, jongjong gilumbang songon dingding, himpang sagala bah luhung i tongah-tongah ni laut.

⁹Nini munsuh ai, ʻHuayak, hutangkap ma; bagionku ma taban, sombuh uhurhu mangidah sidea; sintakonku ma podangku, boiskonon ni tanganku ma sidea.ʼ

¹⁰Iombuskon Ham hosah-Mu, gabe ilangkobi laut sidea; mogap sidea songon simbora hubagas bah na majangin.

¹¹Ise ma songon Ham, ale Jahowa, i tongah-tongah ni sagala naibata? Ise ma na songon Ham, marmulia ibagas hapansingon, jombut ibagas pambahenan sipujion, na mambahen halongangan? [118]

¹²Dob ipagostong Ham tangan-Mu siamun, ibondut tanoh in ma sidea.

¹³Ibobahon Ham do marhitei habujuron-Mu bangsa na tinobus-Mu, itogu-togu Ham do sidea marhitei hagogohon-Mu hubagas ianan hapansingon-Mu.

¹⁴Ibogei sagala bangsa ma in, gabe gobir sidea; godor ma pangisi ni tanoh Palistim. [119]

¹⁵Tarsonggot ma ijia sagala raja ni Edom, hitir-hitir parkuasa ni Moab; mabiar ganup pangisi ni Kanaan.

¹⁶Madabuh ma hubani sidea songgot-songgot pakon biar; halani hinatimbul ni tangan-Mu, jonong sidea songon batu, paima mandipar bangsa-Mu ale Jahowa, paima mandipar bangsa na tinobus-Mu.

¹⁷Ipamasuk Ham do sidea anjaha isuan Ham do sidea hu dolog Parbagianan-Mu; ianan na pinauli-Mu Jahowa, bahen hundulan-Mu, ianan hapansingon na ipasuk tangan-Mu, ale Tuhan.

¹⁸Jahowa do na manrajai ronsi sadokah ni dokahni.” [120]

¹⁹Ai sanggah na bongkot huda ni Parao rap pakon gareta porangni ampa na mangajaksi hubagas laut ai, ipasuang Jahowa ma bah ni laut ai, manlangkobi sidea; tapi mardalan bani na horah do halak Israel i tongah-tongah ni laut ai. [121]

²⁰Dob ai roh ma si Miryam sada nabi puang-puang, botou ni si Aron, ibuat ma sada husapi bani tanganni; anjaha luar ma ganup puang-puang mangirikonsi marsijolom husapini anjaha manortor.

²¹Jadi mandoding ma si Miryam marsibalos-balosan pakon sidea, “Mandoding ma nasiam bani Jahowa, ai marmulia tumang do Ia; isampakkon do huda pakon na mangajaksi hubagas laut.”

²²Dob ai ihatahon si Musa ma halak Israel bingkat hun Laut Sigerger, jadi laho ma sidea hu halimisan Sur; tolu ari ma sidea mardalan i halimisan, anjaha seng jumpahan bah sidea.

²³Dob ai das ma sidea hu Mara, tapi seng tarinum sidea bah hun Mara, mapaet do ai; halani ai do ase igoran ia Mara.

²⁴Jadi marungut-ungut ma bangsa ai dompak si Musa, nini ma, “Aha ma siinumonnami?”

²⁵Dob ai doruh-doruh ma ia hubani Jahowa, gabe ipatuduh ma bani sada hayu; igijigkon ma ai hubagas bah ai, gabe matobu ma bah ai. Ijai ma ibere bani sidea sada titah pakon aturan, anjaha ijai ma sidea ilajou,

²⁶nini ma, “Anggo bujur itangihon ho hata ni Jahowa Naibatamu, anjaha ihorjahon ho na pintor bani uhur-Ni, iparimbagaskon ho titah-Ni, anjaha ilahoi ho sagala aturan-Ni, seng pamasaon-Ku bam age sada naborit, na Hupamasa ai bani Masir, ai Ahu do Jahowa panambarimu.” [122]

²⁷Dob ai das ma sidea hu Elim; adong do ijai bah tubuh sapuluh dua ampa pitu puluh kambona kurma; jadi marsaran ma sidea ijai i lambung ni bah ai.