Read Batak Simalungun 2 MUSA 16 Bible Online

2 MUSA 16 - Batak Simalungun bible

2 MUSA 16

¹Dob ai bingkat ma sidea hun Elim, gabe das ma ganup tumpuan ni halak Israel hu halimisan Sin, na i holangkolang ni Elim pakon Sinai, bani ari sapuluh lima, bani bulan dua, dob luar sidea hun tanoh Masir.

²Jadi marungut-ungut ma ganup tumpuan ni halak Israel dompak si Musa pakon si Aron i halimisan, [123]

³nini ma dompak sidea, “Ambit matei ma namin hanami ibunuh tangan ni Jahowa i tanoh Masir, sanggah na hundul hanami i lambung ni hudon na marisi gulei, sanggah na bosur hanami mangan ruti; ai iarahkon hanima do hanami luar hu halimisan on laho mamunuh ganup tumpuan on marhitei lohei.” [124]

⁴Dob ai nini Jahowa ma dompak si Musa, “Tonggor ma, parohon-Ku ma udan ruti bannima hun nagori atas; maningon ma luar bangsa in anjaha ipatumpu ma bohal sungkup-sungkup sadari, ase Hulajou sidea atap irikkonon ni sidea do titah-Ku atap lang.” [125]

⁵Bani ari paonomkon, sanggah na paulihon na binoban ni sidea ai sidea, gabe lompit dua ma ai marimbang na ipatumpu sidea ari-ari.

⁶Dob ai nini si Musa pakon si Aron ma dompak ganup halak Israel, “Bodari ma botohon nasiam paboa Jahowa do na paluarhon nasiam hun tanoh Masir,

⁷anjaha girah sogod idahon nasiam ma hasangapon ni Jahowa, ai domma ibogei parungut-unguton nasiam dompak Jahowa. Ai ise ma hanami mambahen pala nasiam marungut-ungut dompak hanami?”

⁸Anjaha nini si Musa ma, “Anggo ibere Jahowa gulei panganon nasiam bodari anjaha sogod bosur mangan ruti, halani domma ibogei Jahowa ungut-ungut nasiam, na marungut-ungut ai nasiam dompak-Si -- Ise ma anggo hanami? Seng dompak hanami nasiam na marungut-ungut ai, dompak Jahowa do.”

⁹Dob ai nini si Musa ma dompak si Aron, “Hatahon ma hubani ganup tumpuan ni Israel, ʻPadohor nasiam ma hu lobei ni Jahowa, ai domma ibogei parungut-unguton nasiam in.ʼ ”

¹⁰Jadi sanggah na marsahap si Aron hubani ganup tumpuan ni Israel, idompakkon sidea ma dompak halimisan, anjaha tonggor ma, taridah ma hasangapon ni Jahowa ibagas hombun ai. [126]

¹¹Anjaha nini Jahowa ma dompak si Musa,

¹²“Domma Hubogei parungut-unguton ni halak Israel, hatahon ma hubani sidea, ʻBodari mangan gulei ma hanima, anjaha sogod bosuran ma hanima mangan ruti, ase ibotoh hanima, Ahu do Jahowa Naibatanima.ʼ ”

¹³Bodari ni ai roh ma marhulan-hulan leto anjaha irongkob ma parbarung-barungan ai, anjaha patarni ai marrageian ma namur inggot parbarung-barungan ai. [127]

¹⁴Anjaha sanggah manaik namur na marrageian ai, tonggor ma, adong ma marrageian bani halimisan ai songon batu ni ambotik na matah paretekni pakon parhibulni.

¹⁵Dob ididah halak Israel ai, nini sidea ma samah sidea, “Man Hu” (Aha do on?), ai seng ibotoh sidea atap aha ai. Jadi nini si Musa ma dompak sidea, “On ma ruti na binere ni Jahowa hubani nasiam bahen sipanganon. [128]

¹⁶On ma hata na tinonahkon ni Jahowa, ʻPatumpu nasiam ma hunjin ganup marguru hubani na sungkup panganonni; satumba sahalak boi buaton nasiam hubani hasomanni salampolampo, marguru hubani buei ni bilangan nasiam.ʼ ”

¹⁷Jadi ibahen halak Israel ma sonai, ipatumpu sidea ma, deba buei deba otik.

¹⁸Tapi dob isuhat, gabe seng lobihan na patumpuhon na buei ai anjaha seng hurangan na patumpuhon na otik ai; ganup patumpuhon marguru hubani na boi panganonni. [129]

¹⁹Dob ai nini si Musa ma dompak sidea, “Ulang ma itebai atap ise hunjin das hubani patar.” [130]

²⁰Tapi seng itangihon sidea si Musa; adong do deba manebai hunjai das hubani patarni, gabe gilokon ma ai anjaha marbau; jadi manringis ma si Musa dompak sidea.

²¹Ipatumpu sidea ma hunjai siap sogod, marguru hubani na sungkup panganonni bei; tapi anggo milas ma ari, malala ma ai.

²²Bani ari paonomkon dua lompit ma ipatumpu sidea ruti ai, dua tumba sahalak; anjaha dob roh partua-partua ni bangsa ai patugahkon ai hubani si Musa,

²³nini ma dompak sidea, “On do itonahkon Jahowa, ʻPatar ari parsaranan, Sabat na pansing do bani Jahowa, pamasak nasiam hinan ma sipamasakon nasiam anjaha lompah nasiam hinan ma silompahon nasiam; tapi sagala na lobih, simpan nasiam ma ai bahen sipanganon nasiam patar.ʼ ” [131]

²⁴Jadi isimpan sidea ma ai das hubani patarni, songon na tinonahkon ni si Musa, gabe seng ra masik ai atap gilokon ibagas.

²⁵Nini si Musa ma, “Pangan nasiam ma in sadari on, ari parsaranan ni Jahowa do sadari on; seng jumpah nasiam in sadari on i ladang.

²⁶Onom ari patumpuon nasiam in, tapi bani ari papituhon, ari Sabat in, seng dong jumpah ijai.”

²⁷Bani ari papituhon adong do deba humbani bangsa ai na laho patumpuhon, tapi seng dong jumpahsi.

²⁸Jadi nini Jahowa ma dompak si Musa, “Sadia dokah on engkaronnima mangkorjahon tonah-Ku pakon titah-Ku?

²⁹Tonggor ma, domma ibere Jahowa hu bennima ari Sabat, halani ai ibere do bannima bani ari paonomkon ruti haporluan dua ari; ganup hanima tading ma bani iananni bei, ulang adong halak na luar humbani iananni bani ari na papituhon ai.”

³⁰Jadi marsaran ma bangsa ai bani ari papituhon ai.

³¹Manna ma ibahen halak Israel goranni ai; songon batu ni hatumbar do rumangni, lopak rupani anjaha daini songon ruti na tinanggulian.

³²Dob ai nini si Musa ma, “On do hata na tinonahkon ni Jahowa, ʻGoki hanima ma satumba hunjai sisimpanon bani ginomparnima, ase ididah sidea ruti na Hupapangankon bannima i halimisan sanggah na Hupaluar in hanima hun tanoh Masir.ʼ ”

³³Jadi nini si Musa ma dompak si Aron, “Buat ma sada tapongan, nahkon ma hujai manna gok satumba anjaha pajongjong ma ai hu lobei ni Jahowa, sisimpanon hubani ginompar nasiam.” [132]

³⁴Songon na tinonahkon ni Jahowa hubani si Musa, ipajongjong si Aron ma ai i lobei ni poti parpadanan ai bahen pardingatan.

³⁵Ompat puluh tahun do dokahni ipangan halak Israel manna ai, paima das sidea hu tanoh siianonkon ni sidea ai; sai manna ai do ipangan sidea paima das sidea hu parbalogan ni tanoh Kanaan. [133]

³⁶Ia satumba (homer) saparsapuluh ni satapongan (Efa) ma ai.