Read Batak Simalungun 2 MUSA 18 Bible Online

2 MUSA 18 - Batak Simalungun bible

2 MUSA 18

¹Jadi dob ibogei si Jetro, malim ni Midian, tulang ni si Musa, haganup na binahen ni Naibata bani si Musa pakon hubani Israel bangsani ai, ai ma na pinaluar ni Jahowa halak Israel hun Masir, [140]

²iboan si Jetro, tulang ni si Musa ma si Zippora, parinangon ni si Musa, na dob sinuruhni ai mulak, [141]

³rap pakon anakni na dua ai; goran ni na sada si Gersom, ai nini do, “Panginsolat do ahu i tanoh na legan;” [142]

⁴anjaha goran ni na sada nari si Elieser, “Ai Naibata ni bapa do pangurupingku anjaha ipaluah do ahu humbani podang ni Parao.”

⁵Jadi das ma si Jetro, tulang ni si Musa rap pakon anakni ampa parinangonni ai hubani si Musa i halimisan, hu parsarananni i lambung Dolog ni Naibata.

⁶Itonahkon ma hubani si Musa, “Domma roh ahu, tulangmu, si Jetro, marayak ho odor rap pakon parinangonmu ampa anakmu na dua in.”

⁷Jadi luar ma si Musa manjumpahkon simatuani ai, manrogop ma ia anjaha isummah ma ia; dob marsisungkunan sidea pasal hahorason ni sidea bei masuk ma sidea hu lampolampo ai.

⁸Ipajojor si Musa ma hubani simatuani ai ganup na binahen ni Jahowa hubani Parao pakon hubani halak Masir, halani halak Israel, ronsi ganup hasunsahan na mangonai hubani sidea i tongah dalan pakon na pinaluah ni Jahowa sidea.

⁹Jadi malas ma uhur ni si Jetro halani haganup na madear, na binahen ni Jahowa bani Israel, na pinaluah-Ni ai sidea hun tangan ni halak Masir.

¹⁰Nini si Jetro ma, “Pinuji ma Jahowa, na paluahkon nasiam hun tangan ni halak Masir pakon hun tangan ni Parao, na paluahkon bangsa on humbani pandondon ni tangan ni halak Masir.

¹¹Sonari ma hubotoh na banggalan do Jahowa humbani haganup naibata, ai hata jungkat ni sidea ihonahon do hubani sidea.” [143]

¹²Jadi igalangkon si Jetro, tulang ni si Musa ma sada galangan situtungon pakon galangan sisayaton hubani Naibata. Jadi roh ma si Aron pakon haganup partua ni Israel laho mangan ruti rap pakon tulang ni si Musa i lobei ni Naibata.

¹³Patarni ai hundul ma si Musa laho manguhum bangsa ai, gabe jongjong ma bangsa ai i lambung ni si Musa humbani sogod ronsi bod.

¹⁴Tapi dob ididah tulang ni si Musa haganup na binahenni ai hubani bangsa ai, nini ma, “Aha do na binahenmon hubani bangsa in? Mase ho tumang hundul anjaha ganup bangsa in jongjong i lambungmu humbani sogod ronsi bod?”

¹⁵Jadi nini si Musa ma dompak tulangni ai, “Na roh do bangsa in hu bangku laho manungkun uhum humbani Naibata.

¹⁶Anggo dong parkara ni sidea, roh ma sidea hu bangku, gabe huuhumi ma sidea anjaha hupabotohkon ma paraturan ni Naibata pakon titah-Ni.”

¹⁷Jadi nini tulang ni si Musa ma dompaksi, “Seng dear na binahenmin. [144]

¹⁸Mandatei holi ho, age bangsa on na rap pakon ho, ai maborattu do horja on bam, seng tarhorjahon ho tumang on.

¹⁹On pe tangihon ma hatangkon, hupodahi ma ho anjaha ihasomani Naibata ma ho. Ho ma siholang ni bangsa in i lobei ni Naibata, anjaha na mamboban parkara ni sidea hubani Naibata;

²⁰singatkon ma hubani sidea paraturan pakon titah, anjaha pabotohkon ma hubani sidea dalan sidalanan ni sidea ampa horja sihorjahonon ni sidea.

²¹Tapi pindahi ma humbani ganup bangsa in dalahi na pantas maruhur, sihabiari Naibata, dalahi hatengeran ni uhur, na mangkagigihon sisip; ai ma pabangkit bahen pangintuai, manggomgom sidea mar sasaribu, mar sasaratus, marlima-lima puluh ampa mar sasapuluh.

²²Anjaha sidea ma tongtong manguhumi bangsa in; sagala parkara na borat, hubam ma iboban sidea, tapi sagala parkara na etek, sidea ma manguhumi, gabe roh hampungni ma horjamu, anggo dihut sidea hasomanmu mamorsan.

²³Anggo ibahen ho sonai, anjaha iparentahkon Naibata bam sonai, jadi tahan ma ho mandalankon ai, mardamei-damei ma homa ganup bangsa in mulak hu iananni bei.”

²⁴Jadi itangihon si Musa ma hata ni tulangni ai anjaha ibahen ma ganup na hinatahonni ai.

²⁵Anjaha ipilih si Musa ma dalahi na pantas humbani ganup Israel, ipabangkit ma sidea gabe pangintuai ni bangsa ai, manggomgom mar sasaribu, mar sasaratus, marlima-lima puluh ampa mar sasapuluh.

²⁶Sidea ma tongtong manguhumi bangsa ai; parkara na borat iboban sidea ma hubani si Musa, tapi parkara na hampung sidea do manguhumi.

²⁷Dob ai ilopas si Musa ma tulangni ai laho, gabe mulak ma ia hu tanohni.