Read Batak Simalungun 2 MUSA 19 Bible Online

2 MUSA 19 - Batak Simalungun bible

2 MUSA 19

¹Patolubulankon dob luar halak Israel hun tanoh Masir, bani ari ai das ma sidea hu halimisan Sinai.

²Dob misir sidea hun Papidim anjaha das hu halimisan Sinai, marsaran ma sidea i halimisan ai; ijai do marsaran Israel tontang ni dolog ai.

³Dob ai tangkog ma si Musa marayak Naibata. Idilohon Jahowa ma hubani hun dolog ai, nini ma, “Sonon ma hatahononmu hubani ginompar ni si Jakob anjaha patugahonmu hubani halak Israel,

⁴ʻDomma ididah hanima na Hubahen in hubani halak Masir, ampa na Hubobahon in hanima songon i atas ni habong ni manuk-manuk nanggordaha das hu Bangku. [145]

⁵ Ai pe anggo itangihon hanima hatang-Ku, anjaha ihorjahon hanima padan-Kin, gabe Ahu ma simada hanima humbani sagala bangsa, ai gok Bangku do ganup dunia on. [146]

⁶ Gabe harajaon malim-malim ma hanima Bangku anjaha sada bangsa na pansing.ʼ On ma hata sihatahononmu hubani halak Israel.” [147]

⁷Jadi roh ma si Musa, idilo ma pangintuai ni bangsa ai, anjaha ipadas ma hubani sidea haganup hata ondi, na tinonahkon ni Jahowa hu bani.

⁸Anjaha sahata do ganup bangsa ai mambalosi, nini sidea ma, “Haganup na hinatahon ni Jahowa ibahen hanami pe.” Jadi mulak ma si Musa padaskon hata ni bangsa ai hubani Jahowa.

⁹Dob ai nini Jahowa ma dompak si Musa, “Tonggor ma, na roh ma Ahu marayak ho ibagas hombun na hapal, ase ibogei bangsa ai anggo marsahap Ahu pakon ho, ase porsaya sidea age bam sadokah ni dokahni.” Jadi ipatugah si Musa ma hata ni bangsa ai bani Jahowa.

¹⁰Dob ai nini Jahowa ma dompak si Musa, “Laho ma ho marayak bangsa ai, uras ma sidea sadari on pakon patar, anjaha suruh ma itaptapi sidea hiou ni sidea.

¹¹Anjaha sirsir ma sidea bani ari patoluhon; ai tuad ma Jahowa bani ari patoluhon i lobei ni ganup bangsa ai hu atas ni Dolog Sinai.

¹²Anjaha bahen ma bolat-bolat bani bangsa ai inggot, hatahon ma, ʻJaga hanima ase ulang itangkogi hanima dolog in atap ijamah bonani. Sagala na manjamah dolog in maningon matei do; [148]

¹³seng bulih dais tangan ni atap ise hujin, maningon gijigon barang panahon ia matei; age pinahan, age jolma seng bulih pagoluhon. Tapi anggo marhata ma tarompit, bulih ma sidea tangkog hu dolog in.ʼ ” [149]

¹⁴Dob ai tuad ma si Musa hubani bangsa ai, anjaha iuras ma bangsa ai; sidea pe itaptapi ma hiouni.

¹⁵Nini ma dompak bangsa ai, “Sirsir ma nasiam managam ari patoluhon ai; ulang ma idohori atap ise parinangon.” [150]

¹⁶Bani ari patoluhon, siangkonsi ari, masa ma longgur, hilap pakon hombun hapal i atas dolog ai ampa sora ni tarompit na gogoh tumang, gabe gobir ma ganup bangsa na i parsaranan ai. [151]

¹⁷Dob ai ibobahon si Musa ma bangsa ai luar hun parsaranan ai laho manjumpahkon Naibata, jadi jongjong ma sidea i bona ni dolog ai.

¹⁸Jadi gok timus ganup Dolog Sinai ai, ai ibagas apuy do tuad Jahowa hu atasni, manaik ma timusni ai songon timus ni pamurunan, anjaha ganup dolog ai dugur tumang.

¹⁹Jadi dob lambin gogohni sora ni tarompit ai, marsahap ma si Musa, gabe ibalosi Naibata ma ia marhitei longgur.

²⁰Tuad ma Jahowa hu Dolog Sinai, hu pakpak ni dolog ai; idilo Jahowa ma si Musa hu pakpak ni dolog ai, gabe tangkog ma si Musa.

²¹Dob ai nini Jahowa ma dompak si Musa, “Tuad ma ho anjaha palumba ma bangsa ai, ase ulang majomba sidea marayak Jahowa sihol mangidah, gabe matei sidea buei.

²²Sonai homa malim na roh mandohori Jahowa, iuras ma dirini, ase ulang idorab Jahowa sidea.”

²³Dob ai nini si Musa ma dompak Jahowa, “Seng tarbahen bangsa in tangkog hu Dolog Sinai, ai domma ipalumba Ham hanami, ʻHondor dolog in anjaha papansing ma in.ʼ ”

²⁴Nini Jahowa ma dompaksi, “Laho ma ho tuad, tangkog ma ho use rap pakon si Aron; tapi sagala malim pakon bangsa in, ulang ma ijomba hondor ai laho marayak Jahowa, ase ulang hona dorab sidea.”

²⁵Jadi tuad ma si Musa marayak bangsa ai, anjaha ipatugah ma ai hubani sidea.