Read Batak Simalungun 2 MUSA 2 Bible Online

2 MUSA 2 - Batak Simalungun bible

2 MUSA 2

¹Adong ma sada halak humbani ginompar ni si Levi na mambuat sada boru Levi bahen parinangonni.

²Boratan rumah ma puang-puang ai anjaha itubuhkon ma sada anak. Dob ididah, jenges do dakdanak ai, iponopkon ma ia tolu bulan dokahni. [1]

³Tapi dob lang tarponopkonsi be ia, ibuat ma sada poti humbani arung-arung, irohat ma ai bani aspal ampa damar, inahkon ma dakdanak ai hubagas poti ai, anjaha itibalhon ma ai hubagas arung-arung na i topi ni Bah Nil ai.

⁴Tapi jongjong do botouni hun daoh manatap-natap ase ibotoh atap aha do ibahen hu bani.

⁵Jadi tuad ma boru ni Parao laho maridi hu bah ai, anjaha mardalan-dalan do jabolonni naboru i topi ni Bah Nil ai; ididah ma poti ai i tongah-tongah ni arung-arung, gabe isuruh ma jabolonni mambuat ai.

⁶Dob iungkap, ididah ma dakdanak ai, anjaha tonggor ma, sai tangis-tangis do dakdanak ai. Idop ma uhurni mangidahsi, anjaha nini ma, “Humbani dakdanak ni halak Heber do on.”

⁷Dob ai nini botouni ai ma dompak boru ni Parao ai, “Mahua laho ahu mandilo sada puang-puang pangasuh humbani puang-puang ni halak Heber, ase ipainum dakdanak on bamu.”

⁸Nini boru ni Parao ai ma dompaksi, “Anggo sonai laho ma ho!” Jadi laho ma anak boru ai, idilo ma inang ni dakdanak ai.

⁹Nini boru ni Parao ai ma, “Boban ma dakdanak on, anjaha pauli-uli ma bangku, hubere pe upahmu.”Jadi iboban puang-puang ai ma dakdanak ai anjaha ipauli-uli ma.

¹⁰Dob magodang dakdanak ai, itaruhkon ma ia hubani boru ni Parao, anjaha iain ma ia bahen anakni; ibahen ma goranni si Musa, halani nini, “Ai humbani bah do ia hudokdok.”

¹¹Bani panorang ia, dob magodang si Musa, laho ma ia sahali marayak saninani, gabe ididah ma hamarsikon ni sidea. ididah ma sada halak Masir na mangonai tangan bani sada halak Heber, sada humbani saninani.

¹²Itonggor ma hujai-hujon, dob ididah seng adong jolma ijai, ibunuh ma halak Masir ai, anjaha iponopkon ma ia ibagas horsik.

¹³Luar ma ia patarni ai, tonggor ma, dua halak Heber Martinggili. Nini ma hubani parsalah ai, “Mase ma ibogbogi ho hasomanmu?”

¹⁴Nini ma mambalosi, “Ise pabangkit ho gabe kopala ampa panguhum bennami? Sihol bunuhonmu gatni ahu, songon na dob binunuhmu halak Masir ai?”Mabiar ma si Musa, nini ma, “Tongon do, domma sar hata ai.”

¹⁵Dob ibogei Parao hata ai, ipindahi ma dalan laho mamunuhsi. Tapi maporus ma si Musa hun lobei ni Parao, marsaran ma ia i tanoh Midian, hundul i lambung ni sada parigi.

¹⁶Pitu do boru ni malim na i Midian ai; roh do sidea manahui bah, igoki sidea ma ganup palangka laho pasiburhon biribiri ni bapa ni sidea.

¹⁷Jadi roh ma parmahan, iusir ma sidea; jongjong ma si Musa, iurupi ma sidea pasiburhon biribiri ni sidea ai. [2]

¹⁸Dob das sidea hubani si Reguel, bapa ni sidea ai, nini ma, “Mase ma sonon podasni hanima sadari on?”

¹⁹Nini sidea ma, “Adong do sada halak Masir na paluahkon hanami humbani tangan ni parmahan ai, na manahui bah homa bennami, anjaha na pasiburhon biribiri ai.”

²⁰Nini ma dompak boruni ai, “Ija do ia? Mase itadingkon hanima dalahi ai? Dilo ma ia, ase mangan.”

²¹Marosuh do si Musa tading i lambung ni halak ai, anjaha ibere ma boruni si Zippora bahen parinangon ni si Musa.

²²Itubuhkon ma sada anak, jadi ibahen ma goranni si Gersom, ai nini, “Panginsolat do ahu i tanoh na legan.”

²³Dob ai bani labang-labang ni ari matei ma raja ni Masir. Tapi morong-orong do halak Israel ibagas parjabolonan ni sidea ai anjaha mandoruhi, jadi das ma doruh-doruh ni sidea halani parjabolonan ai hu lobei ni Naibata.

²⁴Itangar Naibata ma doruh-doruh ni sidea ai, anjaha idingat ma padan-Ni na hubani si Abraham, si Isak pakon si Jakob. [3]

²⁵Itatap Naibata ma halak Israel, anjaha ipatandahon Naibata ma diri-Ni bani sidea.