Read Batak Simalungun 2 MUSA 21 Bible Online

2 MUSA 21 - Batak Simalungun bible

2 MUSA 21

¹“Anjaha on ma paraturan siaturhononmu hu lobei ni sidea.

²Anggo iboli ho sada jabolon halak Heber, onom tahun ma dokahni mangkorja ia bam, tapi bani tahun papituhon maningon maluah sonin ma ia. [168]

³Anggo sahalak ia roh, sahalak ia ma laho; anggo marrumah tangga ia roh, jadi rap pakon parinangonni ma ia laho.

⁴Anggo marrumah tangga ia ibahen tuanni, gabe itubuhkon bani anak atap boru, tuanni ai ma simada parinangon ai pakon dakdanak ai, pitah ia tumang do na maluah.

⁵Tapi anggo gomos hata ni jabolon ai mangkatahon: Holong do uhur hubani tuanku, bani parinangonku ampa bani dakdanakku, seng bangku maluah,

⁶arahkonon ni tuanni ai ma ia hubani Naibata, arahkononni ma ia hu labah atap hu tiang, anjaha turaon ni tuanni ai ma ia pakon tura-tura, gabe jabolonni ma ia lalab. [169]

⁷Tapi anggo ijual atap ise boruni bahen jabolon, seng bulih maluah ia songon parluah ni jabolon dalahi. [170]

⁸Anggo seng iharosuhkon tuanni ai ia, dobkonsi ibahen ia parsondukni, maningon lopasonni do ia tobuson; seng bulih jualhononni ia hubani bangsa na legan, halani na dob mangosei ia.

⁹Tapi anggo ipatunangankon ia hubani anakni, adat parboruon ma bahenonni hu bani.

¹⁰Anggo ibuat naboru na legan bani sandiri, seng bulih oruanni sipanganonni, hiouni atap hak parrumahtanggaonni.

¹¹Tapi anggo seng ibahen uhum na tolu ondi hu bani, maluah sonin ma ia, seng pala marduit panobus.

¹²Atap ise na mambogbog halak, gabe matei ia, maningon marutang hosah ia. [171]

¹³Tapi anggo seng na ginompanganni ia, tapi na pinatongon ni Naibata do ia hu tanganni, Ahu pe patuduhkon ianan haporusanni bam. [172]

¹⁴Tapi anggo sangaja atap ise mamunuh hasomanni marhitei akal-akal, saradonmu ma ia hun anjapanjap-Ku laho mamunuhsi. [173]

¹⁵Atap ise na mambogbog bapani atap inangni, maningon marutang hosah ia.

¹⁶Atap ise na mamangus jolma anjaha ijual, barang jumpah i tanganni, maningon marutang hosah ia. [174]

¹⁷Atap ise na mamurai bapani atap inangni maningon marutang hosah ia. [175]

¹⁸Anggo maringor dalahi, anjaha ibogbogi na sada imbangni ai bani batu atap itenju ia, tapi seng pala matei ia, tibal hansa bani podomanni,

¹⁹jadi anggo boi ma ia jongjong use anjaha mardalani martungkot-tungkot i darat, gabe borsih ma na mambogbogsi ai; pitah halojaonni ma igalar ampa partambarni ronsi malum tumang.

²⁰Atap ise na mambogbog jabolonni dalahi atap jabolonni naboru bani hayu anjaha matei ibagas tanganni, maningon abulon do ia.

²¹Tapi anggo manggoluh do sadari atap dua ari nari, seng pala abulonni, ai duitni mando ai.

²²Anggo maringor dalahi, gabe tarbogbogsi sada naboru na boratan rumah, pala saburan rudang, tapi seng mahua hosahni, maningon dondaon ia, marguru hubani pangkatahon ni paramangon ni naboru ai hu bani, anjaha maningon galaronni songon na dob tinontuhon ni panguhum.

²³Tapi anggo tarmara do, maningon hosah do abul ni hosah. [176]

²⁴Mata abul ni mata, ipon abul ni ipon, tangan abul ni tangan, nahei abul ni nahei,

²⁵na matutung abul ni na matutung, ugah abul ni ugah, na marbulistang abul ni na marbulistang.

²⁶Anggo ilonsing atap ise mata ni jabolonni dalahi atap jabolonni naboru, pala seda matani, maningon sonai tumang paluahonni ia, abul ni matani ai.

²⁷Anjaha anggo iropangkon ipon ni jabolonni dalahi atap jabolonni naboru, maningon sonai tumang paluahonni ia, abul ni ipon ai.”

²⁸“Anggo idugu lombu jonggi sada dalahi atap naboru, pala matei ia, maningon matei gijigon lombu jonggi ai bani batu, anjaha seng bulih panganon guleini, tapi borsih do simada lombu jonggi ai.

²⁹Tapi anggo pandugu hinan do lombu jonggi ai nasain dokahni, anjaha domma pinalumba hinan simadasi ai hape lang iramotkon, gabe ibunuh lombu jonggi ai sahalak dalahi atap naboru, maningon matei gijigon lombu jonggi ai bani batu, sonai homa simadasi ai maningon bunuhon. [177]

³⁰Anggo domma ipaporsankon uhum pardearan bani, maningon bereonni do partobus ni hosahni ai ansa na dob pinaporsankon hu bani.

³¹Atap anak idugu atap boru, uhum nongkan ai ma sibahenon hu bani.

³²Tapi anggo jabolon dalahi atap jabolon naboru idugu lombu jonggi ai, tolu puluh sekel pirak ma bereon ni simadasi ai hubani tondokanni ai, anjaha maningon matei gijigon bani batu lombu jonggi ai.

³³Anggo dong barang ise na patanggak godung, atap anggo dong barang ise na mangkurak godung hape lang irungkup, gabe madabuh hujai sada lombu atap halode,

³⁴maningon bahenon ni simada godung ai ma pardearan, duit ma paulakonni hubani ompungni ai, tapi anggo bangkeini ai bani ma ai.

³⁵Anggo idugu lombu jonggi ni sada halak lombu jonggi ni hasomanni, pala matei, jualon ni sidea ma lombu jonggi na manggoluh ai anjaha ibagi bolini ai; lombu jonggi na matei ai pe ibagi sidea ma.

³⁶Tapi anggo domma binotoh hinan pandugu do lombu jonggi ai nasain dokah, hape seng iramotkon simadasi ai, maningon abulonni do, lombu jonggi abul ni lombu jonggi, bani ma anggo na matei ai.”