Read Batak Simalungun 2 MUSA 22 Bible Online

2 MUSA 22 - Batak Simalungun bible

2 MUSA 22

¹“Anggo itangko barang ise sada lombu jonggi atap biribiri, lanjar isayat atap ijual, maningon galaronni lima lombu jonggi abul ni sada lombu jonggi anjaha ompat biribiri abul ni sada biribiri. [178]

²Anggo tardapot panangko mambongkar, gabe tarbogbog pala matei, seng siabulon darohni ai.

³Tapi anggo domma sompat hasiangan ia, siabulon ma darohni. Maningon bereonni dangdang; anggo seng dong bani, jualon ma ia halani tinangkoni ai.

⁴Anggo dapot manggoluh ibagas tanganni na tinangkoni ai, lompit dua ma galaronni ai, atap lombu jonggi, halode barang biribiri pe ai.

⁵Anggo ipagagatkon barang ise pinahanni hu juma atap hu pohon anggur ni halak na legan marhitei na paluahkon pinahanni hujai, maningon bereonni dangdang humbani sijengesan ni jumani pakon humbani sijengesan ni pohon anggurni.

⁶Anggo rarat apuy, pala igagat hondor, gabe matutung radean barang gandum na jongjong ope barang juma ai, maningon dangdangan ni sipanutung ai ma ai.

⁷Anggo ipaalimihon barang ise duitni atap ugas-ugasni hubani hasomanni, gabe hona tangko hun rumah ni halak ai, maningon dua lompit ma galaron ni panangko ai, anggo tardapot ia.

⁸Tapi anggo seng dapot panangko ai, maningon dohoran ni simada rumah ai ma Naibata, atap ia do atap lang na paganjang tanganni hubani ugas ni hasomanni ai. [179]

⁹Sagala parkara partinggilan mangonai lombu jonggi, halode, biribiri, hiou, atap aha pe na magou, gabe ihatahon na mangkatahon: On ma ia, hu lobei ni Naibata ma boanon parkara ni sidea na dua ai; anjaha dua lompit ma dangdangan ni na sinalahkon ni Naibata hubani hasomanni ai.

¹⁰Anggo ipaalimihon barang ise bani hasomanni halode barang lombu jonggi barang atap pinahan aha pe, gabe matei barang ugahan barang itangko halak ai, seng dong na mangidahsi,

¹¹bija i lobei ni Naibata ma manontuhon i tongah-tongah ni sidea atap na so tanganni do laho hu ugas ni hasomanni ai; iharosuhkon simadasi ai ma ai, tapi seng pala mandangdangi na legan ai.

¹²Tapi anggo itangko panangko hun bani, maningon galaronni do ai hubani simadasi.

¹³Anggo na iparsilbak binatang do ai, iboan ma ai bahen tanda; seng pala dangdanganni na pinarsilbak ai. [180]

¹⁴Anggo ipinjam sada halak humbani hasomanni atap aha pe gabe ugahan atap matei, anjaha seng ijai dihut simadasi, maningon dangdanganni do.

¹⁵Tapi anggo ijai do dihut simadasi seng pala dangdanganni, anggo na niongkos do ai, ongkosni ai ma dangdangni.

¹⁶Anggo idormai barang ise sada anak boru, na so martunangan ope anjaha ihasomani modom, maningon bereonni bolini mintor, anjaha buatonni ia bahen parinangonni. [181]

¹⁷Tapi anggo mangengkar tumang do bapani ai mambere boruni ai hu bani, maningon galaronni ma duit ansa buei ni boli ni sada anak boru.

¹⁸Seng bulih pagoluhon puang-puang partondung. [182]

¹⁹Maningon bunuhon do barang ise na pasaor dirini modom hubani pinahan. [183]

²⁰Barang ise na manggalang naibata na legan, sobali hubani Jahowa tumang, maningon ripasonkon do.” [184]

²¹“Seng bulih arsikonmu atap sosakanmu halak pardagang, ai halak pardagang hinan do hanima i tanoh Masir. [185]

²²Seng bulih arsikon puang-puang na mabalu atap anak na tading maetek. [186]

²³Anggo sai iarsik ho sidea, anjaha doruh-doruh sidea hu Bangku, sai na tangihonon-Ku do doruh-doruh ni sidea ai.

²⁴Jadi gajag ma ringis-Ku anjaha bunuhon-Ku hanima bani podang, gabe mabalu ma parinangonnima anjaha gabe seng marbapa anaknima.

²⁵Anggo ipapinjamkon ho duit hubani bangsang-Ku, hubani halak na miskin na i lambungmu, ulang ho songon sipabungahon duit hu bani, ulang bahen marbunga duitmu hu bani. [187]

²⁶Anggo ijalo ho hiou ni hasomanmu bahen borot, maningon paulakonmu ai hubani paima sundut mata ni ari, [188]

²⁷ai pitah ai do na manrongkobsi, ai do hiou hubani hulingkulingni, bani aha ma ia modom? Anggo sai doruh-doruh ia hu Bangku, sai tangihonon-Ku do ia, ai paridop ni uhur do Ahu.

²⁸Seng bulih buraanmu Naibata, anjaha seng bulih pasambor-samboronmu pangintuai ni bangsamu. [189]

²⁹Seng bulih jolomanmu humbani lobih ni gandum ampa anggurmu. Maningon bereonmu hu Bangku bunga tubuhmu. [190]

³⁰Sonai ma bahen hubani lombumu pakon biribirimu. Pitu ari dokahni rap pakon indungni, bani ari paualuhkon bere ma hu Bangku. [191]

³¹Maningon halak na pansing hanima Bangku, halani ai seng bulih panganonnima gulei na pinarsilbak ni binatang i ladang, maningon hubani baliang do gijigkononkon ai.” [192]