Read Batak Simalungun 2 MUSA 24 Bible Online

2 MUSA 24 - Batak Simalungun bible

2 MUSA 24

¹Dob ai nini ma dompak si Musa, “Tangkog ma hanima hubani Jahowa, ho pakon si Aron, si Nadab pakon si Abihu, ampa sipitupuluh halak pangituai ni Israel, anjaha mandaoh-daoh ma hanima marsombah hu Bangku. [211]

²Si Musa tumang boi mandohori Jahowa, tapi na legan in ulang ma idohori, anjaha bangsa in pe seng bulih tangkog rap pakonsi.”

³Dob ai roh ma si Musa, ipajojor ma hubani bangsa ai ganup hata ni Jahowa pakon ganup paraturan-paraturan ai. Jadi sahata ma ganup bangsa ai mambalosi, nini sidea ma, “Ganup hata na pinatugah ni Jahowa sai na bahenonnami do.” [212]

⁴Jadi isuratkon si Musa ma ganup hata ni Jahowa. Girah ma ia puho patarni ai, ipauli ma sada anjapanjap i bona ni dolog ai pakon sapuluh dua tugu mangihutkon marga ni Israel na sapuluh dua ai. [213]

⁵Dob ai isuruh ma garama humbani halak Israel, ase igalangkon sidea galangan situtungon pakon lombu bahen galangan pardearan bani Jahowa.

⁶Ibuat si Musa ma satongah daroh ai, ibahen ma ai hubagas batil, anjaha na satongah nari hu anjapanjap ai do ipispiskon.

⁷Dob ai ibuat ma pustaha parpadanan ai, ibasahon ma ai i lobei ni bangsa ai, jadi nini sidea ma, “Ganup na hinatahon ni Jahowa, sai na bahenonnami anjaha tangihononnami do.” [214]

⁸Ibuat si Musa ma daroh ai, ipispiskon ma hu bangsa ai, anjaha nini ma, “Tonggor ma, on ma daroh parpadanan na pinatotap ni Jahowa hubani nasiam romban hubani haganup hata nongkan.” [215]

⁹Dob ai tangkog ma si Musa pakon si Aron, si Nadab pakon si Abihu ampa pangintuai ni halak Israel na pitu puluh halak ai,

¹⁰gabe ididah sidea ma Naibata ni Israel; adong do i toruh ni Nahei-Ni songon batu intan Sapir tompani anjaha songon langit na lihar rupani. [216]

¹¹Anjaha seng isurdukkon tangan-Ni hubani pangintuai ni halak Israel. Ikawahkon sidea ma Naibata, dob ai mangan anjaha minum ma sidea. [217]

¹²Dob ai nini Jahowa ma hubani si Musa, “Tangkog ma ho hu Bangku, hu atas dolog on, paima ma ijin, ase Hubere bam batu panuratan na marisi titah pakon paraturan na dob Husurati, sipodahkononmu bani sidea.” [218]

¹³Jadi marugas ma si Musa pakon si Josua juakjuakni ai, gabe tangkog ma si Musa hu Dolog ni Naibata.

¹⁴Nini ma dompak pangintuai ai, “Tading ma nasiam ijon paima mulak hanami bani nasiam; anjaha tonggor ma, rap pakon nasiam do si Aron pakon si Hur; barang ise na marparkara, hubani sidea ma ia laho.”

¹⁵Jadi tangkog ma si Musa hu dolog ai, anjaha irungkub hombun ai ma dolog ai.

¹⁶Sogop ma hamuliaon ni Jahowa hu atas Dolog Sinai, anjaha irungkub hombun ma dolog ai onom ari dokahni; bani ari papituhon idilo ma si Musa humbagas hombun ai. [219]

¹⁷Songon apuy na marjimbur do rupa ni hamuliaon ni Jahowa i pakpak ni dolog ai ididah halak Israel. [220]

¹⁸Jadi masuk ma si Musa hubagas hombun ai laho tangkog hu dolog ai. I dolog ai ma si Musa ompat puluh ari ompat puluh borngin dokahni. [221]