Read Batak Simalungun 2 MUSA 25 Bible Online

2 MUSA 25 - Batak Simalungun bible

2 MUSA 25

¹Nini Jahowa ma dompak si Musa,

²“Hatahon ma hubani Israel ase iboban sidea Bangku tumpak bahen galangan, humbani ganup halak niojur ni uhurni jaloonnima tumpak ai Bangku. [222]

³Anjaha on ma tumpak sijaloonnima humbani sidea: Omas, pirak, tombaga,

⁴bonang na mahonda, sigerger ampa na gerger tumang, kain linnen alus na niangkup, ambulu ni hambing,

⁵bobak ni biribiri tunggal na tinubar, bobak ni hambing, hayu nangka,

⁶minak bani lampu, rompah-rompah pakeion mamminaki pakon manutung dahupa,

⁷mata intan unam pakon mata intan sitatahkonon hubani baju epod pakon tutup tonton.

⁸Anjaha maningon bahenon ni sidea Bangku sada ianan na pansing, ase marianan Ahu i tongah-tongah ni sidea.

⁹Romban hubani haganup na Hupatuduhkon in bam, rumang ni rumah ai pakon parugasni haganup, maningon sonai do bahenonnima.” [223]

¹⁰“Maningon paulion ni sidea ma sada poti humbani hayu nangka, tongah tolu asta ganjangni, tongah dua asta bolagni anjaha dua asta gijangni.

¹¹Maningon lampisonmu do ai pakon omas pitah, humbagas pakon hun darat lampisonmu ai, anjaha maningon bahenonmu do bibirni marlais-lais omas inggot.

¹²Maningon tuangonmu do hujin ompat pinggol-pinggol omas, sibahenonmu hubani suhi-ni na ompat ai, dua pinggol-pinggol hu na salopah, dua pinggol-pinggol hubani na salopah nari.

¹³Pauli ma lanja-lanja humbani hayu nangka, anjaha lampis ma ai bani omas.

¹⁴Anjaha surukkon ma lanja-lanja ai hubagas pinggol-pinggol na longkot bani poti ai laho mangusung poti ai.

¹⁵Tapi maningon paturutonmu do lanja-lanja ai ibagas pinggol-pinggol ni poti ai, seng bulih buaton hunjai.

¹⁶Anjaha maningon pamasukonmu do hubagas poti ai surat hasaksian na sihol berehonon-Ku bam. [224]

¹⁷Maningon paulionmu homa sada langkob pardearan humbani omas pitah; tongah tolu asta ganjangni anjaha tongah dua asta bolagni. [225]

¹⁸Anjaha maningon paulionmu dua herub humbani omas, humbani omas na tinopa paulionmu ai, hubani na dua tampakan ni langkob pardearan ai.

¹⁹Nahkon ma sada herub hu tampakan na sada anjaha sada herub hu tampakan na sada nari; marsada rap pakon langkob pardearan ai paulionmu herub ai bani tampakan na dua ai.

²⁰Paherbangon ni herub ai ma habongni dompak datas laho manrongkob langkob pardearan ai marhitei habong ni sidea, anjaha padompak sidea; maningon dompak langkob pardearan ai bohi ni herub ai.

²¹Anjaha nahkononmu ma langkob pardearan ai hu atas ni poti ai, anjaha pamasuk ma hubagas poti ai surat hasaksian siberehonon-Ku bam. [226]

²²Ijai ma parayakon-Ku ho, anjaha marsahap Ahu pakon ho hun datas ni langkob pardearan ai, hun holangkolang ni herub na dua ai, na i babou ni poti parpadanan ai, pasal haganup sitonahkonon-Ku hubam, sipatugahonmu hubani halak Israel.” [227]

²³“Maningon paulionmu do sada meja humbani hayu nangka, dua asta ganjangni, saasta bolagni anjaha tongah dua asta gijangni.

²⁴Lampisonmu ma ai pakon omas pitah, anjaha bahenonmu martopi omas inggot.

²⁵Anjaha bahen ma topini santopap bolagni inggot, ampa laisni humbani omas inggot.

²⁶Tuang ma ompat pinggol-pinggol omas, sibahenonmu hubani suhini na ompat ai, na bani naheini na ompat ai.

²⁷Maningon dohor i toruh ni lais ai bahenonmu pinggol-pinggol ai bahen panurukan ni lanja-lanja laho mangusung meja ai.

²⁸Humbani hayu nangka ma lanja-lanja ai paulionmu anjaha lampis ma ai pakon omas anjaha ai ma ipakei mangusung meja ai.

²⁹Anjaha bahen ma pinggan bolakni, pingganni, batilni pakon mangkukni bahen panguseian ni galangan siinumon; maningon humbani omas pitah do paulionmu ai.

³⁰Anjaha maningon nahkononmu tongtong i lobei-Hu bani meja ai ruti sigalangonkon. [228]

³¹“Anjaha maningon paulionmu sada parsuluhan humbani omas pitah; sangkimpal parsuluhan ai topaonmu ampa badanni, dangkahni, boltokni, tungkulni pakon bungani.

³²Maningon onom dangkahni luar hun lambungni, tolu dangkah hun salopah ni parsuluhan ai, anjaha tolu dangkah humbani na salopah nari;

³³martolu boltok songon bunga ni buah pala ganup dangkahni ai bahenonmu martungkul anjaha marbunga, anjaha martolu boltok songon bunga ni buah pala ganup dangkah ai bahenonmu, martungkul anjaha marbunga; sonai ma bahenonmu dangkah na onom ai na luar hun parsuluhan ai.

³⁴Tapi bani parsuluhan ai maningon ompat do bahenonmu boltokni, songon bunga ni buah pala marhasoman tungkul pakon bunga,

³⁵anjaha santungkul i toruh ni dua dangkah na luar hunjai, santungkul use i toruh ni dua dangkah na luar hunjai anjaha santungkul nari use i toruh ni dua dangkah na luar hunjai; ase bani na onom dangkah, na luar hunjai ai.

³⁶Ai maningon luar hunjai do tungkulni pakon dangkahni; ganupan ai ipauli humbani sangkimpal omas pitah.

³⁷Anjaha bahenonmu do pitu suluhni, sibahenon hu atasni ase marsinalsal ai dompak lobeini.

³⁸Panurturini pakon pangintopini maningon humbani omas pitah do.

³⁹Humbani satalenta omas pitah do paulionmu ganupan ai, ronsi parugasni ganup.

⁴⁰Anjaha ingat ma mambahensi usih hubani usihan na nididahmu i dolog ai.” [229]