Read Batak Simalungun 2 MUSA 27 Bible Online

2 MUSA 27 - Batak Simalungun bible

2 MUSA 27

¹“Bahen ma sada anjapanjap humbani hayu nangka, lima asta ganjangni, lima asta bolagni; maningon marompat suhi anjapanjap ai anjaha tolu asta gijangni.

²Bahen ma tandukni bani suhi-suhi na ompat ai; sada ma ai pakon tandukni ai, anjaha lapisonmu do ai bani tombaga.

³Bahen ma parabuananni, suyuk-suyukni, mangkukni, garpuni pakon parapuyanni; humbani tombaga ma ganup pauli parugasni ai.

⁴Bahen ma homa hondor-hondorni humbani tombaga na iangit, anjaha bahen ma hubani jala ai ompat pinggol-pinggol tombaga hubani suhi-suhi na ompat ai.

⁵Bahen ma hondor-hondor ai i toruh ni topi ni anjapanjap ai, das hubani parsitongahan ni anjapanjap ai.

⁶Anjaha maningon bahenonmu do lanja-lanja bani anjapanjap ai, lanja-lanja humbani hayu nangka, anjaha lapisonmu do ai bani tombaga.

⁷Pamasukon ma lanja-lanja ai hubagas pinggol-pinggol ai, ase marlanja-lanja ma angkup anjapanjap ai, sanggah mangusung.

⁸Pauli ma ai marruang, marpapan; songon na dob pinatuduhkon bam i dolog ai, sonai ma bahen.” [235]

⁹Bahen ma alaman ni lampolampo ai; martirei humbani hiou silopak na alus, na niangkup ma bahen alaman ai hampit dangsina, saratus asta ganjangni bani na salopah;

¹⁰dua puluh tiangni anjaha ondolanni dua puluh, humbani tombaga, tapi hait-kait ni tiang ai ampa ransang-ransangni pirak do.

¹¹Sonai homa mangihutkon ganjangni hampit utara maningon martirei do, saratus asta ganjangni, tiangni dua puluh anjaha onjolanni dua puluh, humbani tombaga; tapi hait-kait ni tiangni ampa ransang-ransangni pirak do.

¹²Anggo buha ni alaman ai hampit hasundutan maningon martirei do, lima puluh asta ganjangni, sapuluh tiangni anjaha sapuluh onjolanni.

¹³Buha ni alaman ai hampit hapoltakan lima puluh asta do.

¹⁴Anjaha sapuluh lima asta ganjang ni tirei ai bani salopah hampit horbangan ai, tolu tiangni anjaha tolu onjolanni.

¹⁵Bani na salopah nari pe sapuluh lima asta ganjang ni tireini, tolu tiangni anjaha tolu onjolanni.

¹⁶I lobei ni horbangan ni alaman ai maningon adong do tirei dua puluh asta ganjangni humbani bonang na mahonda, na gerger pakon na gerger sahalian pakon humbani hiou silopak na alus, na niangkup anjaha na tinonunkon, tiangni ompat anjaha onjolanni ompat.

¹⁷Ganup tiang ni alaman ai inggot maningon mardomu marhitei ransang-ransang pirak pakon hait-kait pirak anjaha onjolanni tombaga do.

¹⁸Ganjang ni alaman ai saratus asta, bolagni lima puluh asta, anjaha gijangni lima asta, martirei humbani bonang na niangkup, tapi onjolanni tombaga do.

¹⁹Ganup parugas na pinakei bani lampolampo ai laho mandalankon horja na marbagei-bagei ai, ronsi haganup pakuni pakon ganup paku ni alaman ai maningon humbani tombaga do.

²⁰Parentahkon ma hubani halak Israel, ase iboban sidea hubam minak jetun pitah na niduda, bahen minak ni parsuluhan ai, ase tongtong gara parsuluhan ai,

²¹ibagas lampolampo partumpuan ai, i darat ni tirei ai, na i lobei ni poti parpadanan ai; maningon nahitan ni si Aron pakon anakni parsuluhan ai, olat ni bodari ronsi patarni ai i lobei ni Jahowa. Ai ma aturan na totap sadokahni-dokahni bani halak Israel ronsi ginompar ni sidea.”