Read Batak Simalungun 2 MUSA 28 Bible Online

2 MUSA 28 - Batak Simalungun bible

2 MUSA 28

¹“Anjaha hatahon ma si Aron abangmin roh hubam, rap pakon sagala anakni ai luar hun tongah-tongah ni halak Israel, laho mambalosi Ahu gabe malim Bangku, ai ma si Aron pakon anakni si Nadab, si Abihu, si Eleasar pakon si Itamar.

²Bahen ma pakean na pansing hubani si Aron abangmin bahen hamuliaon pakon bahen jagar-jagar. [236]

³Hatahon ma hubani haganup halak na pentar maruhur, sagala na dob Hugoki uhurni bani tonduy hapentaran, ase sidea padearhon pakean bani si Aron laho papansingkonsi, ase ia gabe malim Bangku. [237]

⁴On ma pakean sipadearon ni sidea: Sada tutup tonton, sada baju epod, sada baju pardarat, sada baju parbagas na sinulam, sada gotong pakon sada gondit; maningon sidea do paulihon pakean na pansing bani si Aron abangmin pakon bani anakni in, ase ia gabe malim Bangku.

⁵Buaton ni sidea ma hujai omas, bonang na mahonda, na gerger anjaha na gerger sahalian pakon hiou silopak na alus na niangkup.

⁶Anjaha maningon padearon ni sidea do baju epod ai humbani omas, humbani bonang na mahonda, na gerger pakon na gerger sahalian pakon humbani hiou silopak na alus na niangkup.

⁷Maningon adong dua tutup abara ni epod ai, na mardomu hubani ujungni na dua ai, ase gabe sada.

⁸Gondit ni epod na i atas ni ai pe, na gabe panangkut ni ai, maningon sarupa pulunganni anjaha mardomu hujai, humbani omas, humbani bonang na mahonda, na gerger, na gerger sahalian pakon humbani hiou silopak na alus na niangkup.

⁹Maningon buatonmu do dua mata intan Kerisopras anjaha uhirhononmu hujai goran-goran ni anak ni Israel na sapuluh dua ai,

¹⁰onom goran ni sidea ai bani mata intan na sada, anjaha goran na onom nari hubani mata intan na sada nari, mangihutkon partubuh ni sidea.

¹¹Songon tuhang uhir na manguhir tintin tokan, sonai ma uhironmu goran ni anak ni Israel hubani batu na dua ai, anjaha marhait-kait omas bahen inggot.

¹²Dob ai bahen ma na dua mata intan ai hubani na dua tutup abara ni epod ai bahen batu pardingatan hubani halak Israel; anjaha maningon bobanon ni si Aron i atas ni abarani na dua ai goran-goran ni sidea i lobei ni Jahowa bahen pardingatan.

¹³Maningon bahenonmu do hait-kaitni humbani omas,

¹⁴ampa dua rantei humbani omas pitah, na niangkup songon tali, anjaha haitkon ma rantei na niangkup ai hubani hait-kait ai.

¹⁵Anjaha bahenonmu do sada tutup tonton panguhumion, na pinauli jenges; dos songon padearhon epod bahenonmu ai, humbani bonang na mahonda, na gerger ampa na gerger sahalian, pakon humbani hiou silopak na niangkup.

¹⁶Maningon marompat suhi do ai anjaha dua lapis, sanjongkal ganjangni anjaha sanjongkal bolagni.

¹⁷Maningon tatahkononmu do hujai ompat ristei batu intan. Bani ristei parlobei, batu intan sardis, topasion pakon samarah;

¹⁸bani ristei na paduahon, batu intan rubin, sapir pakon diamant;

¹⁹bani ristei na patoluhon, batu intan opal, achat pakon ametis;

²⁰bani ristei na paompatkon, batu intan korisolit, unam, pakon jaspis; maningon marpanangkutan omas bahenon batu intan na tinanahkonni ai.

²¹Maningon adong sapuluh dua batu margoran bei mangihutkon goran-goran ni anak ni Israel; songon tintin tokan ma ai bani na sapuluh dua marga ai, goran ni sidea bei iuhirhon hujai.

²²Anjaha maningon bahenonmu hubani tutup tonton ai rantei songon tali na niangkup humbani omas pitah;

²³anjaha bahenonmu do hubani tutup tonton ai dua tintin omas, anjaha nahkon ma na dua tintin ai hubani na dua tampakan ni tutup tonton ai.

²⁴Anjaha maningon nahkononmu do na dua rantei omas ai hubagas na dua tintin na bani ujung ni tutup tonton ai;

²⁵haduasi ujung ni na dua rantei ai maningon haitkononmu do ai hubani na dua hait-kait ai, anjaha nahkononmu do ai hubani tutup abara ni baju epod ai hampit lobei.

²⁶Maningon bahenonmu do dua tintin omas anjaha nahkon ma ai bani na dua ujung ni tutup tonton ai, bani topini hampit bagas padompak pakon baju epod ai.

²⁷Ambah ni ai maningon bahenonmu ope dua tintin omas sinahkononkon hubani na dua tutup abara ni baju epod ai, hampit toruh, dompak lobei, tongon bani pardomuanni, i atas ni gondit ni baju epod ai.

²⁸Anjaha maningon sangkutkonon ni sidea do tutup tonton ai rap pakon tintinni ai hubani tintin ni baju epod ai marhitei bonang na mahonda, ase longkot ai i atas ni gondit ni baju epod ai anjaha ase ulang boi sirang tutup tonton ai humbani baju epod ai.

²⁹Jadi sonai ma bahenon ni si Aron goran-goran ni Israel i atas ni pusu-pusu ibagas tutup tonton panguhumion ai, anggo laho ia masuk hubagas ianan na pansing ai, bahen pardingatan tongtong i lobei ni Jahowa.

³⁰Anjaha maningon bahenonmu do hubagas tutup tonton panguhumion ai Urim pakon Tumim, maningon i atas ni pusu-pusu ni si Aron do ai anggo masuk ia hu lobei ni Jahowa; sonin ma tongtong boanon ni si Aron panguhumion ni halak Israel i atas ni pusu-pusu i lobei ni Jahowa.” [238]

³¹“Anjaha maningon bahenonmu do baju pardarat ni epod ai, humbani bonang na mahonda ganup.

³²I tongah-tongahni ma parborgokanni, martopi na tinonun inggot songon topi ni baju partohonan, ase ulang ra marigat.

³³Maningon bahenonmu hu rambuni ai inggot, buah ni dalima humbani bonang na mahonda, na gerger anjaha na gerger sahalian pakon giring-giring omas i tongah-tongahni ai inggot,

³⁴giring-giring omas sada, dob ai buah ni dalima, giring-giring omas sada, dob ai buah ni dalima, sonai ma inggot bani rambu ni baju pardarat ai.

³⁵Maningon sorungkonon ni si Aron baju-baju ai anggo marugas ia, ase tarbogei sora ni giring-giring ai sanggah masuk ia hu lobei ni Jahowa, hubagas ianan na pansing ai ampa sanggah luar ia, ase ulang matei ia. [239]

³⁶Maningon paulionmu homa sada tutup pardompakan humbani omas pitah, anjaha uhirhononmu hujai songon panguhiron bani tintin tokan: Pinapansing bani Jahowa.

³⁷Anjaha maningon longkotkononmu do ai marhitei bonang na mahonda hubani gotong ai; maningon i lobei ni gotong ai do ai.

³⁸Maningon bani pardompakan ni si Aron ma ai, ase boi si Aron mamorsan hahurangan ni ganup galangan na pansing, na dob pinapansing ni halak Israel gabe sibere-bere na pansing ni sidea; maningon totap ma ai i pardompakanni ase dapotan idop ni uhur halak Israel i lobei ni Jahowa.

³⁹Maningon paulionmu do baju parbagas ai humbani hiou silopak na alus, anjaha sada gotong humbani hiou silopak na alus bahenonmu, tapi anggo gonditni maningon humbani na tinonun do bahenonmu.

⁴⁰Bani anak ni si Aron pe maningon paulionmu do baju-baju parbagas, gondit pakon tangkuluk bahen hamuliaon pakon pajagarhon.

⁴¹Maningon sorungkononmu do ai hubani si Aron abangmin pakon hubani sagala anakni na rapkonsi, anjaha maningon minakanmu do sidea, gokanmu tangan ni sidea anjaha papansingonmu sidea ase sidea gabe malim Bangku. [240]

⁴²Anjaha bahenonmu do bani sidea saluar humbani hiou silopak na alus manrongkob daging ni sidea na talar olat ni ulu ni towod ronsi binongei ganjangni.

⁴³Maningon pakeion ni si Aron pakon anakni ai do ai laho masuk sidea hubagas lampolampo partumpuan ai atap laho dohoran ni sidea anjapanjap ai sihol marugas bani ianan na pansing ai, ase ulang marsalah sidea gabe matei sidea. Ai ma aturan na hot sadokah ni dokahni bani halak Israel ronsi ginompar ni sidea i pudini.”