Read Batak Simalungun 2 MUSA 29 Bible Online

2 MUSA 29 - Batak Simalungun bible

2 MUSA 29

¹“Anjaha on ma partureini bahenonmu hubani sidea laho papansingkon sidea gabe malim Bangku: buat ma sada anak ni lombu pakon dua biribiri tunggal na so martikas;

²pakon ruti na so niigaran, ruti gemong na so niigaran na niagu pakon minak pakon lopat na so niigaran na marlapu minak. Maningon humbani itak na alus paulionmu in.

³Nahkon ma ai hubagas sada raga anjaha ibagas raga ai ma ai galangkon rap pakon anak ni lombu pakon biribiri na dua ai.

⁴Boan ma si Aron pakon anakni ai dohor hu labah ni lampolampo partumpuan ai, anjaha paridi ma sidea bani bah.

⁵Anjaha buat ma pakean ai, sorungkon ma ai hubani si Aron, baju-baju parbagas, baju-baju pardarat, baju epod pakon tutup tonton ai, anjaha gonditkon ma bani gondit ni baju epod ai.

⁶Nahkon ma gotong ai hu atas ni uluni anjaha longkotkon ma sortali hapansingon ai hubani gotong ai. [241]

⁷Buat ma minak siminakkonon ai anjaha useihon ma ai hubani uluni laho mamminakisi. [242]

⁸Hatahon ma homa anakni ai roh hun dohor anjaha sorungkon ma baju parbagas ai hubani sidea;

⁹gonditkon ma gondit ai hubani sidea, hubani si Aron pakon hubani anakni ai, anjaha tangkuluk ai longkotkon ma hubani ulu ni sidea; jadi ondos ma hamalimon ai hubani sidea marhitei aturan sisadokah ni dokahni. Sonin ma parpabangkitmu bani si Aron pakon anakni ai. [243]

¹⁰Dob ai boban ma lombu jonggi ai hu lobei ni lampolampo partumpuan ai. Itampeihon si Aron pakon anakni ai ma tanganni hu atas ni ulu ni lombu jonggi ai.

¹¹Anjaha bunuhon ma lombu jonggi ai i lobei ni Jahowa, bani labah ni lampolampo partumpuan ai.

¹²Buat ma deba humbani daroh ni lombu jonggi ai, daiskon ma ai hubani tanduk ni anjapanjap ai marhitei jari-jarimu; tapi duruskon ma daroh na teba ai bani nahei ni anjapanjap ai.

¹³Buat ma ganup taboh-taboh panutup ni bituha pakon harambuyan na tampei hubani atei-atei pakon hubani piah-piah na dua ai ronsi taboh-taboh na longkot hujai anjaha tutung ma ai i atas anjapanjap ai. [244]

¹⁴Tapi anggo daging ni lombu jonggi ai, hulingkulingni pakon ginagatni maningon tutungonmu do ai pakon apuy i darat ni parsaranan ai; ai ma na gabe galangan pardousaon. [245]

¹⁵Dob ai buat ma biribiri tunggal na sada ai, hatahon ma si Aron pakon anakni manampeihon tangan ni sidea hu atas ulu ni biribiri tunggal ai.

¹⁶Dob ai sayat ma biribiri tunggal ai, buat ma darohni anjaha pispiskon ma ai hubani anjapanjap ai inggot.

¹⁷Dob ai toktoki ma biribiri tunggal ai, burihi ma bituhani pakon naheini anjaha nahkon ma ai bani gorini pakon hubani uluni,

¹⁸anjaha tutung ma ganup biribiri tunggal ai i atas ni anjapanjap ai; galangan situtungon ma ai bani Jahowa, uap na misbou, galangan marhitei apuy hubani Jahowa.

¹⁹Dob ai buat ma biribiri tunggal na sada nari, anjaha itampeihon si Aron pakon anakni ai ma tangan ni sidea hubani ulu ni biribiri tunggal ai.

²⁰Sayat ma biribiri tunggal ai, buat ma deba darohni, anjaha daiskon ma ai hu pinggol siamun ni si Aron pakon hu pinggol siamun ni anakni ai, hubani ompuompu ni tangan siamun pakon hubani ompuompu ni nahei siamun ni sidea; dob ai pispiskon ma daroh ai hubani anjapanjap ai inggot.

²¹Dob ai buat ma deba humbani daroh na i atas ni anjapanjap ai pakon humbani minak siminakkonon ai anjaha pispiskon ma ai hubani si Aron pakon hubani pakeanni, hubani anakni ampa hubani pakean ni anakni ai, ase pansing si Aron pakon pakeanni ai, pansing pakon anakni ronsi pakean ni anakni ai na rap pakonsi.

²²Anjaha maningon buatonmu do homa taboh-taboh ni biribiri tunggal ai, taboh-taboh ni ihurni, taboh-taboh panutup ni bituhani, harambuyan na tampei hubani atei-ateini pakon piah-piah na dua ai ampa taboh-taboh na longkot hujai, ronsi hae-hae lobei hampit siamun, ai biribiri tunggal paondoskon jabatan do ai, [246]

²³sada ruti, sada ruti gemong na maragu minak, sada lopat humbagas raga isian ni ruti na so niigaran na i lobei ni Jahowa;

²⁴nahkon ma ganupan ai hu tangan ni si Aron pakon hu tangan ni anakni ai, anjaha itatang ma ai bahen galangan tatangan i lobei ni Jahowa.

²⁵Dob ai buat ma ai hun tangan ni sidea, anjaha tutung ma ai bahen dahupa i atas anjapanjap ai tambah ni galangan situtungon bahen uap na misbou i lobei ni Jahowa; galangan marhitei apuy ma ai bani Jahowa.

²⁶Dob ai buat ma tonton ni biribiri tunggal paondoskon jabatan hubani si Aron anjaha tatang ma ai bahen galangan bani Jahowa; ai ma na gabe rupeimu.

²⁷Sonin ma urasonmu tonton galangan tatangan pakon hae-hae lobei bahen galangan tatangan na tinatang anjaha na niangkat humbani biribiri tunggal paondoskon jabatan hubani si Aron pakon hubani anakni ai. [247]

²⁸Maningon gabe aturan na hot ma ai hubani halak Israel, bani si Aron pakon bani anakni ronsi sadokah ni dokahni, ai parbagianan ni malim do ai sigalangkonon ni halak Israel humbani galangan pardameian ni sidea; galangan ni sidea do ai bani Jahowa.

²⁹Ia pakean ni si Aron na pansing ai, ondos bani anakni ma ai use, sipakeion sanggah mamminaki ampa mangondoskon jabatan hubani sidea. [248]

³⁰Maningon pitu ari dokahni pakeionni pakean ai, atap ise humbani anakni si Aron na gabe malim gantihni, anggo sihol masuk ia hubagas lampolampo partumpuan ai laho marugas ibagas ianan na pansing ai.

³¹Maningon buatonmu ma biribiri tunggal paondoskon jabatan ai, anjaha lompah ma dagingni ibagas ianan na mapansing ai. [249]

³²Anjaha maningon panganon ni si Aron pakon anakni ai ma juhut ni biribiri tunggal ai rap pakon ruti na ibagas raga ai, bani labah ni lampolampo partumpuan ai.

³³Maningon panganon ni sidea do galangan, na mangadongkon pardearan, laho paondoskon jabatan ai bani sidea pakon papansingkon sidea; tapi anggo halak parluar seng bulih panganonni ai, ai na pansing do ai.

³⁴Anggo adong na teba humbani juhut paondoskon jabatan ai, barang humbani ruti das ronsi patarni, maningon tutungonmu do na teba ai bois ibagas apuy; seng bulih panganon ai, ai na pansing do ai.

³⁵Sonin ma sibahenonmu hubani si Aron pakon anakni ai, songon na dob hutonahkon ai bam; pitu ari dokahni mangondoskon jabatan ai bani sidea.”

³⁶“Anjaha ganup ari maningon sayatonmu do sada lombu bahen galangan pardousaon laho pajongjong pardearan. Maningon urasonmu do homa anjapanjap ai marhitei galangan pardearan sigalangkononmu i atasni, anjaha maningon minakanmu do ai laho papansingkonsi; sagala na manjolom anjapanjap ai gabe pansing ma.

³⁷Pitu ari dokahni bahenonmu galangan pardearan i atas anjapanjap ai. Maningon papansingonmu ai ase gabe pansing sahalian ai.

³⁸On do na maningon galangkononmu i atas ni anjapanjap ai: Dua anak ni biribiri na marumur satahun ganup ari torus.

³⁹Sada biribiri galangkononmu sogod, anjaha biribiri na sada nari galangkononmu malele bod.

⁴⁰Anjaha hasoman ni biribiri na parlobei ai maningon bahenonmu satumba nitak marsaor minak na giniling saparompat hin, ambah ni saparompat hin anggur bahen galangan siinumon.

⁴¹Ia anak ni biribiri na sada nari sigalangkononmu malele bod, songon panggalangkonmu bani galangan sipanganon pakon galangan siinumon sogod ma panggalangkononmu ijai bahen uap na misbou ampa galangan situtungon bani Jahowa.

⁴²Ai ma galangan situtungon na tongtong bani ginomparnima bani labah ni lampolampo partumpuan ai i lobei ni Jahowa; hujai do jumpahkonon-Ku hanima ase marsahap Ahu pakon ho ijai.

⁴³Ijai ma Ahu sihol marjumpah ampa halak Israel, jadi gabe pansing ma ianan ai marhitei hamuliaon-Ku. [250]

⁴⁴Papansingon-Ku ma lampolampo partumpuan ai pakon anjapanjap ai; papansingon-Ku ma homa si Aron pakon sagala anakni gabe malim Bangku.

⁴⁵I tongah-tongah ni halak Israel do Ahu marianan, ase Ahu gabe Naibata ni sidea.

⁴⁶Ase ibotoh sidea Ahu do Naibata ni sidea na mambobahon sidea luar hun tanoh Masir, ase marianan Ahu i tongah-tongah ni sidea; Ahu do Jahowa, Naibata ni sidea.”