Read Batak Simalungun 2 MUSA 3 Bible Online

2 MUSA 3 - Batak Simalungun bible

2 MUSA 3

¹Tapi si Musa do na marmahan biribiri ni si Jetro, tulangni ai, malim ni halak Midian. Bani na sahali ialai ma biribiri ai salpu halimisan ai, das ma ia hu Dolog ni Naibata, hu Horeb.

²Jadi taridah ma bani malekat ni Jahowa, ibagas gajag ni apuy, hun tongah-tongah ni naporon. Dob ai itorih ma, ididah ma apuy gajag ibagas naporon ai, tapi seng mosog naporon ai. [4]

³Nini si Musa ma, “Laho ma ahu hujai mangidah halongangan bolon ai, mase ma tongon lang mosog naporon ai?”

⁴Tapi dob ididah Jahowa ia sihol roh mangidah, dilo-dilo ma Naibata hubani hun tongah-tongah ni naporon ai, nini ma, “Musa, Musa!” nini ma, “Ijon do ahu.”

⁵Dob ai nini ma, “Ulang dohori hujon; tanggali ma sipatumin humbani naheimin, ai tanoh na pansing do hajongjonganmon.” [5]

⁶Nini ope, “Ahu do Naibata ni bapamu, Naibata ni si Abraham, Naibata ni si Isak pakon Naibata ni si Jakob.”Jadi irongkob si Musa ma bohini, halani biarni mangidah Naibata. [6]

⁷Dob ai nini Jahowa ma, “Domma tangkas Huidah sahit ni panaronon ni bangsang-Ku na i tanoh Masir, anjaha domma Hutangar doruh-doruh ni sidea halani pambahen ni na mangarsik-arsik sidea; domma Hubotoh sitaronon ni sidea. [7]

⁸Halani ai do ase tuad Ahu paluahkon sidea hun tangan ni halak Masir, anjaha paluarhon sidea hun tanoh on hu tanoh na madear anjaha na lumbang, hu tanoh habaoran ni dadih pakon manisan, hu tanoh ianan ni halak Kanaan, Het, Amori, Peresi, Hewi pakon Jebus.

⁹On pe, tonggor ma, domma das doruh-doruh ni halak Israel hu Bangku, anjaha domma Huidah homa pangarsikon ni halak Masir hubani sidea.

¹⁰On pe, laho ma ho, Husuruh ma ho marayak Parao, ase ipadarat ho bangsang-Ku, halak Israel hun tanoh Masir.”

¹¹Tapi nini si Musa ma dompak Naibata, “Ise ma ahu, ase ahu laho marayak Parao, anjaha padaratkon halak Israel hun Masir?” [8]

¹²Nini ma, “Huhasomani pe ho; on ma tandani bam paboa Ahu do na marsuruh ho; ia dob ipadarat ho bangsa ai hun tanoh Masir, pasangaponnima ma Naibata i atas dolog on.”

¹³Dob ai nini si Musa ma dompak Naibata, “Tonggor ma, anggo das ma ahu hubani halak Israel anjaha huhatahon dompak sidea, ʻNaibata ni ompung nasiam do marsuruh ahu hubani nasiam,ʼ gabe ihatahon sidea holi hu bangku, ʻIse ma goran-Ni? Aha ma balosku dompak sidea?ʼ ”

¹⁴Nini Naibata ma dompak si Musa, “Ahu Adong na Ahu Adong.” Nini ope, “Sonon do hatahononmu hubani halak Israel, ʻAhu Adong do na marsuruh ahu hubani nasiam.ʼ ” [9]

¹⁵Nini Naibata ope dompak si Musa, “Sonon do hatahononmu hubani halak Israel, ʻJahowa Naibata ni ompung nasiam, Naibata ni si Abraham, Naibata ni si Isak pakon Naibata ni si Jakob marsuruh ahu hubani nasiam.ʼ Ai ma goran-Ku sadokah ni dokahni, anjaha sonai ma goran-Ku diloon marsundut-sundut. [10]

¹⁶Laho ma ho, patumpu ma sagala partua-partua ni Israel, hatahon ma dompak sidea, Jahowa, Naibata ni ompung nasiam, na dob taridah bangku, Naibata ni si Abraham, si Isak pakon si Jakob do na mangkatahon, ʻDomma itatap uhur-Hu nasiam sonai age na ibahen hubani nasiam i tanoh Masir.

¹⁷Domma Huhatahon sai padaraton-Ku do hanima humbani hamarsikon ni Masir hu tanoh ni halak Kanaan, Het, Amori, Peresi, Hewi pakon Jebus, hu tanoh habaoran ni dadih pakon manisan.

¹⁸Sai balosan ni sidea do soramu; laho ma ho pakon partua-partua ni Israel mangadap raja ni Masir, anjaha hatahon hanima ma dompaksi. Jahowa, Naibata ni halak Heber marjumpahkon hanami; on pe, lopas ham ma hanami laho hu halimisan tolu ari mardalan daohni, ase igalangi hanami Jahowa Naibatanami. [11]

¹⁹Tapi domma Hubotoh hinan, seng anjai lopason ni raja ni Masir hanima laho, age marhitei tangan na gogoh.

²⁰Tapi pagostongon-Ku ma tangan-Ku laho mambogbogi Masir marhitei buei halongangan, na sihol bahenon-Ku i tongah-tongah ni sidea; dob ai palopasonni ma hanima laho.

²¹Dapotan idop ni uhur pe bangsa on humbani halak Masir bahenon-Ku; ase anggo mandarat holi hanima, lang mandarat lumei tumang. [12]

²²Tapi pindoon ni ganup puang-puang ma humbani hombar rumahni pakon humbani tondokanni ugas pirak, ugas omas pakon hiou, sipakeihononnima ma ai hubani anak pakon borunima; sonai ma ayobonnima halak Masir.ʼ ”