Read Batak Simalungun 2 MUSA 30 Bible Online

2 MUSA 30 - Batak Simalungun bible

2 MUSA 30

¹“Anjaha pauli ma sada anjapanjap panutungan ni dahupa; maningon humbani hayu nangka do paulionmu ai.

²Saasta ganjangni, saasta bolagni; maningon marompat suhi ai, anjaha dua asta gijangni; tandukni pe luar hunjai ma.

³Lampis ma ai pakon omas pitah, sonai homa tutupni, dingdingni inggot pakon tandukni; maningon bahenonmu homa marlampis omas pitah inggot.

⁴Bahen ma dua pinggol-pinggol omas i toruh ni laisni ai; maningon bahenonmu do ai bani lambungni na dua ai angkup, bahen panurukan ni lanja-lanja ase boi marhitei ai usungon.

⁵Bahen ma lanja-lanja ai humbani hayu nangka, anjaha lampis ma ai bani omas.

⁶Pajongjong ma anjapanjap ai i lobei ni tirei ai, na mangondingi poti hasaksian ai, i lobei ni tutup pardearan ai, na i babou ni hasaksian ai, hujai ma jumpahkononku ho. [251]

⁷Maningon manutung dahupa na misbou ma si Aron i atasni; ganup sogod sanggah na padearhon lampu ai ia, maningon manutung dahupa ia. [252]

⁸Sonai homa anggo sihol nahitan ni si Aron lampu ai sanggah bod ari, maningon tongtong ia manutung dahupa i lobei ni Jahowa torus marsundut-sundut.

⁹Seng bulih galangkononnima i atasni dahupa na legan, sonai homa galangan situtungon, galangan sipanganon barang manguseihon galangan siinumon hujai. [253]

¹⁰Maningon si Aron mambahen pardearan i atas tandukni sahali satahun; marhitei daroh ni galangan pardearan maningon bahenonni pardearan sahali satahun torus marsundut-sundut, ai na pansing sahalian do ai bani Jahowa. [254]

¹¹Ambah ni ai nini Jahowa ma dompak si Musa:

¹²Anggo ibilangi ho buei ni halak Israel mangihutkon bilangan ni sidea, maningon ganup sidea mambere partobus ni hosahni bani Jahowa sanggah binilanganmin, ase ulang hona papa sidea sanggah na binilanganmin sidea.

¹³On do na maningon sibereon ni ganup na tarbilang ai: Satongah sekel mangihutkon sekel bani ianan na pansing ai (sasekel mararga dua puluh gera); satongah sekel gabe galangan bani Jahowa.

¹⁴Ganup na dob tarbilang ai olat ni na marumur dua puluh tahun hu atas maningon mambere galangan bani Jahowa.

¹⁵Halak na bayak seng bulih gandaanni, anjaha halak na miskin seng bulih oruanni mambere sisatongah sekel ai bahen galangan bani Jahowa pajongjong pardearan bani hosahnima.

¹⁶Maningon buatonmu duit partobus ai humbani halak Israel anjaha pakeionmu ai bani horja i lampolampo partumpuan ai; ai ma pardingatan i lobei ni Jahowa laho mardingat halak Israel, gabe pardearan bani hosahnima.”

¹⁷Nini Jahowa ma use dompak si Musa,

¹⁸“Bahen ma homa sada tong tombaga ampa onjolanni humbani tombaga bahen parburihan. Bahen ma ai i holangkolang ni lampolampo partumpuan pakon anjapanjap ai, anjaha nahi ma bah hujai.

¹⁹Bah ai ma buaton ni si Aron pakon anakni mamurihi tangan pakon nahei ni sidea.

²⁰Anggo masuk sidea hubagas lampolampo partumpuan ai, maningon lobei marburih sidea, ase ulang matei sidea; sonai homa anggo idohori sidea anjapanjap ai sihol marugas, manutung galangan situtungon bahen dahupa hubani Jahowa,

²¹maningon lobei burihan ni sidea tangan pakon nahei ni sidea, ase ulang matei sidea. Ai ma gabe aturan na totap bani sadokah ni dokahni ronsi bani ginomparni marsundut-sundut.”

²²Ambah ni ai nini Jahowa ma dompak si Musa,

²³“Tapi anggo ho, buat ma bam rompah-rompah sijengesan: Hamonan na manjalir lima ratus sekel, kulit manis satongahni, ai ma dua ratus lima puluh sekel pakon hasowor ampa halawas dua ratus lima puluh sekel,

²⁴anjaha jarangou lima ratus sekel mangihutkon sekel na bani ianan na pansing ai, ampa minak jetun sahin.

²⁵Masak ma hujai minak na pansing, manambahi minak pulung-pulungan na sinaor mangihutkon hapandeian ni tuhang pulung, minak pamminaki na pansing ma ai.

²⁶Maningon minakanmu ma marhitei ai lampolampo partumpuan ai, poti parpadanan ai,

²⁷meja ai ampa ganup parugasni, parpalitaan ai ampa parugasni, anjapanjap pardahupaan ai,

²⁸anjapanjap panggalangan ni galangan situtungon ai ampa ganup parugasni, tong parburihan ai ronsi onjolanni.

²⁹Maningon papansingonmu do ai ase gabe pansing sahalian; ganup na manjamah ai sai na gabe pansing do. [255]

³⁰Maningon minakanmu do si Aron pakon ganup anakni ai, anjaha urasonmu do sidea gabe malim Bangku. [256]

³¹Hatahon ma hubani halak Israel sonon, ʻOn ma minak pamminaki na pansing Bangku torus marsundut-sundut.ʼ

³²Seng bulih useihononkon ai bani angkula ni atap ise jolma, anjaha seng bulih bahenonmu minak na legan na sonon parmasakni, ai na pansing do ai, anjaha maningon pansing do ai bannima.

³³Barang ise na mambahen minak na sonin parmasakni, atap na manguseihon ai hubani halak na legan, maningon siapkonon ia humbani bangsani.”

³⁴Dob ai nini Jahowa ma use dompak si Musa, “Buat ma bam rompah-rompah na misbou, gotah ni hamonan, banei batu, mangemange, rompah-rompah pakon dahupa na pitah, dos bei bueini.

³⁵Masak ma ai bahen dahupa, na sinampur mangihutkon hapandeian ni tuhang pulung, ginaraman, pitah anjaha pansing.

³⁶Giling ma ai deba lumat sahalian, anjaha nahkon ma deba hunjai hu lobei ni hasaksian ai ibagas lampolampo partumpuan ai, ase roh Ahu marayak ho hujai; na pansing sahalian ma ai bannima. [257]

³⁷Ia dahupa simasakonmai, seng bulih bahenonnima sonai parmasakni bannima, maningon pansing do ai bam i lobei ni Jahowa.

³⁸Barang ise na mambahen sonai, bahen rium-riumanni, maningon rotaponkon ia humbani bangsani.”