Read Batak Simalungun 2 MUSA 31 Bible Online

2 MUSA 31 - Batak Simalungun bible

2 MUSA 31

¹Dob ai nini Jahowa ma dompak si Musa,

²“Tonggor ma, domma Hudilo sahalak na margoran si Besaleel, anak ni si Uri, ai ma anak ni si Hur humbani marga Juda.

³Domma pala Hugoki uhurni bani Tonduy ni Naibata, pakon hapentaran, torus ni uhur ampa habotohon bani haganup horja ai, [258]

⁴laho mamingkiri hatukangon na laingan, manukangi omas, pirak pakon tombaga,

⁵homa manguhir anjaha mamijor batu intan, manukangi hubani situkangon na marbagei-bagei ai.

⁶Anjaha tonggor ma, domma Hupabangkit hasomanni, ai ma si Ahaliab, anak ni Ahisamak humbani marga Dan; domma Hubere homa hapentaran hubagas uhur ni ganup halak na pentar laho mangkorjahon haganup na dob Hutonahkon ai bam,

⁷lampolampo partumpuan, poti parpadanan ampa tutup pardearan na i atasni ai, pakon haganup parugas ni lampolampo ai,

⁸meja ai ampa parugasni, parsuluhan na humbani omas pitah ai ampa ganup parugasni, pakon anjapanjap pardahupaan ai.

⁹Sonai homa anjapanjap panggalangan ni galangan situtungon ampa parugasni haganup, pakon tong parburihan ampa onjolanni,

¹⁰pakean tohonan pakon pakean na pansing bani Malim Aron ampa pakean ni anakni laho mangkorjahon hamalimon ai,

¹¹ronsi minak pamminaki pakon dahupa na misbou hubani ianan na pansing ai; hombar hubani ganup na huhatahon ai hubam, sibahenon ni sidea ai.”

¹²Dob ai nini Jahowa ma dompak si Musa,

¹³“Hatahon ma hubani halak Israel, ʻManingon papansingonnima do Sabat-Ku, ai ai do tanda ni parpadanan Bangku pakon bannima ronsi bani ginomparnima, ase ibotoh hanima, Ahu do Jahowa na papansingkon hanima. [259]

¹⁴Maningon papansingonnima do Sabat ai, ai na pansing do ai bannima; ganup na pabutakkon ai, maningon marutang hosah ia; barang ise na mangkorjahon horja ijai maningon rotaponkon do hosahni hun tongah-tongah ni bangsani.

¹⁵Onom ari do horjaonkon horja, tapi ari papituhon ai, ari parsaranan na pansing ma ai bani Jahowa; barang ise na marhorja bani ari Sabat ai, maningon marutang hosah ia.

¹⁶Halani ai maningon papansingon ni halak Israel do ari Sabat ai anjaha papansingon ni sidea torus marsundut-sundut, gabe padan na totap sadokah ni dokahni.

¹⁷Gabe tanda ma ari Sabat ai Bangku pakon bani halak Israel sadokah ni dokahni, ai ibagas na onom ari do itompa Jahowa langit pakon tanoh on, tapi bani ari papituhon ai marsaran ma Ia anjaha pahosahkon.ʼ ” [260]

¹⁸Jadi dobkonsi Jahowa marsahap pakon si Musa i atas Dolog Sinai, ibere ma bani dua batu panuratan ni hasaksian ai, na sinurat marhitei jari-jari ni Naibata. [261]