Read Batak Simalungun 2 MUSA 32 Bible Online

2 MUSA 32 - Batak Simalungun bible

2 MUSA 32

¹Dob ididah bangsa ai na madokahtu si Musa ase tuad hun dolog ai, martumpu ma bangsa ai marayak si Aron, nini ma dompaksi, “Eta bahen ma bennami naibata sibobahon hanami, halani seng ibotoh hanami atap na mahua do si Musa, halak ai, na mambobahon hanami luar hun tanoh Masir.”

²Nini si Aron ma dompak sidea, “Tanggali nasiam ma anting-anting omas bani pinggol ni parinangon nasiam, anak nasiam pakon boru nasiam anjaha boban ma ai bangku.”

³Jadi itanggali ganup bangsa ai ma anting-anting omas na bani pinggol ni parinangon ni sidea, anak ni sidea pakon boru ni sidea anjaha iboban ma ai bangku.

⁴Ijalo ma ai hun tangan ni sidea, ibahen ma rumangni marhitei panurat, anjaha ai ma iusihi mambahen sada lombu tuangan; jadi nini sidea ma, “On ma naibatamu, ale Israel, na mambobahon ho tangkog hun tanoh Masir.” [262]

⁵Dob ididah si Aron ai, ipajongjong ma sada anjapanjap i lobeini, jadi martingting ma ia, nini ma, “Patar ma ari raya bani Jahowa.”

⁶Jadi ipagirah sidea ma patarni ai puho, igalangkon ma galangan hatarimakasihon; dob ai hundul ma bangsa ai mangan minum anjaha jongjong ma sidea marguro-guroi. [263]

⁷Dob ai nini Jahowa ma dompak si Musa, “Tuad ma ho, ai domma maruhur magou bangsamin, na binobahonmin tangkog hun tanoh Masir. [264]

⁸Podas ni ai manimbil sidea humbani dalan na dob hupatuduhkon bani sidea. Domma ibahen sidea bani sidea lombu tuangan, domma pala marsombah anjaha manggalang sidea hujai, anjaha ihatahon, ʻOn ma naibatamu, ale Israel, na dob mambobahon ho tangkog hun tanoh Masir.ʼ ”

⁹Nini Jahowa ma use dompak si Musa, “Domma huidah bangsa on, bangsa na hengkeng maruhur do on.

¹⁰On pe palopas ma gajag ringis-Ku bani sidea laho mansiapkon sidea; tapi Hubahen pe ho sada bangsa na banggal.” [265]

¹¹Tapi ielek-elek si Musa ma Jahowa, Naibatani, nini ma, “Mase ma gajag ringis-Mu, ale Jahowa mangidah bangsa-Mu, na dob Binobahon-Mu luar hun tanoh Masir, marhitei kuasa bolon pakon marhitei tangan na marhagogohon?

¹²Mase ma maningon hatahonon ni halak Masir sonon, ʻLaho mangagou sidea do ase ibobahon sidea luar, laho mamunuh sidea i atas ni dolog anjaha manripaskon sidea hun atas tanoh on?ʼ Pahombun Ham ma ringis-Mu na banggal in, marpangulaki ma uhur-Mu pasal hamagouan na sihol pasogopon-Mu hubani bangsa-Mu.

¹³Ingat Ham ma si Abraham, si Isak pakon si Israel jabolon-Mu in, na dob pala marbulawan Ham bani diri-Mu mangkatahon bani sidea, ʻSai pabueion-Ku do ginomparnima songon bintang na i langit, anjaha ganup tanoh on na dob Huparbagah ai sai berehonon-Ku do hubani ginomparmu, bahen siteanon ni sidea sadokah ni dokahni.ʼ ” [266]

¹⁴Jadi marpangulaki ma uhur ni Jahowa pasal hamagouan na dob Nilumbahon-Ni sibahenon-Ni hubani bangsa-Ni.

¹⁵Dob ai marhusor ma si Musa anjaha tuad hun dolog ai rap pakon na dua batu panuratan hasaksian ai bani tanganni, na marsurat hadualopahsi; na salopah on pakon na salopah nari marsurat do.

¹⁶Na binahen ni Naibata do batu panuratan ai, anjaha surat ai pe surat ni Naibata do, na niuhirhon-Ni hubani batu panuratan ai. [267]

¹⁷Dob ibogei si Josua sora ni bangsa ai marsurak-surak, nini ma dompak si Musa, “Adong songon sora ni na marporang ibagas parsaranan ai.”

¹⁸Tapi nini si Musa ma, “Sedo sora ni surak-surak hamonangan ai, atap sora ni doruh-doruh hataluan, tapi sora ni doding na marsibalos-balosan do ai.”

¹⁹Jadi dob dohor ia hubani parsaranan ai anjaha ididah lombu ai pakon tortor ai, gajag ma ringis ni si Musa, igijigkon ma humbani tanganni batu panuratan ai, gabe mabolah i toruh ni dolog ai.

²⁰Dob ai ibuat ma lombu na dob pinauli ni sidea ai; itutung ma ibagas apuy, iduda ma lumat tumang, itirtirhon ma hu atas bah anjaha ipainumkon ma ai bani halak Israel.

²¹Nini si Musa ma dompak si Aron, “Aha gakni ibahen bangsa on bam, ase iparoh ho dousa na sonai banggalni bani sidea?”

²²Nini si Aron ma, “Ulang ma gajag ringis ni tuanku; ai itanda ham do bangsa on, na bajan do paruhur ni sidea.

²³Nini sidea do hu bangku, ʻPauli bennami naibata, na mambobahon hanami, ai seng ibotoh hanami atap na mahua do si Musa, halak ai, na mangarahkon hanami tangkog hun tanoh Masir.ʼ

²⁴Jadi ningku ma tongon, ʻBarang ise na maromas, itanggali ma anjaha ibere ma ai hu bangku; hugijigkon ma ai hubagas apuy, gabe luar ma lombu on.ʼ ”

²⁵Dob ididah si Musa na so marrantei be bangsa ai, ai domma ipalopas si Aron gabe habadoron i tongah-tongah ni imbang ni sidea,

²⁶jadi jongjong ma si Musa i horbangan ni parsaranan ai, anjaha nini ma, “Ise hampit Jahowa? Roh ma hu bangku!” Jadi martumpu ma humbani ganup halak Levi.

²⁷Dob ai nini ma dompak sidea, “Sonon do hata ni Jahowa, Naibata ni Israel, ʻGanup ma mambahen podangni hu binongeini, mulak-ulak ma nasiam hun horbangan on hu horbangan ai ibagas parsaranan in, anjaha ganup ma mambunuh saninani, hasomanni pakon sindohorni.ʼ ”

²⁸Jadi ibahen halak Levi ma hombar hubani na hinatahon ni si Musa, gabe rasei ma bani na sadari ai hira-hira tolu ribu halak.

²⁹Nini si Musa ma, “Domma iuras nasiam diri nasiam sadari on bani Jahowa, ai ganup do manlawan anakni pakon saninani, gabe boi ibere pasu-pasu bani nasiam sadari on.” [268]

³⁰Patarni ai nini si Musa ma dompak bangsa ai, “Banggal tumang do dousa na binahen nasiam ai. Tangkog ma ahu sonari marayak Jahowa, andohar jumpah ahu pardearan pasal dousa nasiam ai.”

³¹Jadi dob mulak si Musa hubani Jahowa, nini ma, “Ah, banggal tumang do dousa na binahen ni bangsa on; ibahen sidea do bani sidea naibata humbani omas.

³²On pe, sai marpangulaki ma uhur-Mu bani dousa ni sidea ai, anggo lang sasap Ham ma goranku gelah humbani pustaha na dob sinurat-Mu ai.” [269]

³³Tapi nini Jahowa ma dompak si Musa, “Ise na mardousa dompak Ahu, goranni ai do sasapon-Ku humbani pustahang-Ku.

³⁴On pe, laho ma ho, arahkon ma bangsa in hu tanoh na dob Huhatahon bam. Tonggor ma, malekat-Kin do mardalan i lobeimu, tapi bani ari pambalason-Ku, balaskonon-Ku do hubani sidea dousa ni sidea ai.” [270]

³⁵Jadi iajar Jahowa ma bangsa ai, halani isombah sidea lombu na pinauli ni si Aron ai.