Read Batak Simalungun 2 MUSA 35 Bible Online

2 MUSA 35 - Batak Simalungun bible

2 MUSA 35

¹Dob ai ipatumpu si Musa ma ganup tumpuan ni halak Israel anjaha nini ma hubani sidea, “On do hata na tinonahkon ni Jahowa sihorjahononnima.

²Onom ari ma horjahon hanima horjanima, tapi anggo ari papituhon in ari Sabat na pansing do in bennima, sipapansingon bani Jahowa; barang ise na marhorja bani ari in, maningon marutang hosah ia. [300]

³Seng bulih pagara apuy hanima ibagas ganup rumahnima bani ari Sabat in.”

⁴Dob ai ihatahon si Musa ma hubani ganup tumpuan ni halak Israel, “On do hata na tinonahkon ni Jahowa,

⁵ʻPatumpu hanima ma hun bennima galangan hubani Jahowa; barang ise na rosuh uhurni, iboban ma galangan hubani Jahowa: Omas, pirak, tombaga, [301]

⁶hiou simahonda pakon sigerger, hiou hasumba, kaen linnen silopak pakon ambulu ni hambing,

⁷bobak ni biribiri tunggal na tinubar pakon bobak ni hambing, hayu nangka,

⁸minak hubani parpalitaan in pakon minak na morum sipakeion mamminaki pakon manutung dahupa,

⁹batu intan Kerisopras pakon batu intan na tinatah sinahkonon hu baju epod pakon hubani tutup tonton.

¹⁰Barang ise na pantas maruhur i tongah-tongahnima roh bei ma mangkorjahon ganup na tinonahkon ni Jahowa;

¹¹in ma ianan na pansing in, tendani pakon langit-langitni, hait-kaitni, papanni, ransang-ransangni, tiangni pakon onjolanni,

¹²poti parpadanan in rap pakon lanja-lanjani, langkob pardearan in pakon tireini,

¹³meja in pakon lanja-lanjani ampa ganup parugasni ronsi ruti;

¹⁴parpalitaan in bahen panondangi ronsi parugasni, palitani pakon minak hubani parpalitaan in,

¹⁵anjapanjap pardahupaan in rap pakon lanja-lanjani, minak pamminaki pakon rium-riuman bahen dahupa na misbou, ampa tirei tutup ni labah bani labah ni ianan na pansing in,

¹⁶anjapanjap panggalangan ni galangan situtungon rap pakon hondor-hondorni humbani tombaga, lanja-lanjani pakon ganup parugasni, tong parburihan pakon onjolanni,

¹⁷tirei ni alaman in rap pakon tiangni ampa onjolanni, tirei tutup ni horbangan ni alaman in,

¹⁸paku hubani ianan na susi in pakon hubani alaman in ampa hubani talini,

¹⁹pakean tohonan laho marugas ibagas ianan na pansing in, pakean na pansing bani Malim Aron pakon pakean ni anakni laho mangkorjahon hamalimon in.

²⁰Dob ai luar ma ganup tumpuan ni halak Israel hun lobei ni si Musa.

²¹Jadi roh bei ma ganup halak na tarojur uhurni pakon ganup na hia-hia tonduyni, iboban bei ma galangan bani Jahowa, ai ma sipakeion paulihon lampolampo partumpuan ai pakon hubani ganup horja ijai ampa hubani pakean na susi ai. [302]

²²Roh bei ma sidea paramangon age parinangon, ganup na marosuh uhur, marsiboban golangni, anting-antingni, tintinni, horung-horungni, ugas-ugas omas marbagei-bagei, ganup manggalangkon omas hubani Jahowa.

²³Anjaha ganup halak na marnah kaen simahonda pakon sigerger, hasumba, kaen linnen silopak, ambulu ni hambing, bobak ni biribiri tunggal na tinubar atap bobak ni biribiri, ipamboan ma ai.

²⁴Ganup na boi manggugui pirak pakon tombaga iboban bei ma ai bahen galanganni hubani Jahowa; anjaha ganup na marnah hayu nangka itaruhkon bei ma ai sipakeion hubani ganup horja tohonan na marbagei-bagei ai.

²⁵Anjaha sagala parinangon na pentar maruhur manorha bei do pakon tanganni, anjaha iboban bei ma na pinorhani ai, hiou simahonda pakon sigerger, hiou hasumba pakon hiou linnen silopak.

²⁶Sagala puang-puang na puho uhurni anjaha na marhapentaran manorha imbulu ni hambing.

²⁷Tapi sagala pangintuai iboban bei ma batu intan unam pakon batu intan na tinatah sinahkonon hu baju epod pakon hu tutup tonton ai,

²⁸pakon rium-riuman pakon minak hu parpalitaan pakon minak na morum sipakeion laho mamminaki pakon manutung dahupa.

²⁹Sagala paramangon pakon parinangon, na tarojur uhurni mamboban sibere-bere hubani sagala horja na tinonahkon ni Jahowa sibahenon marhitei si Musa, iboban halak Israel ma ai songon galangan niojur ni uhurni bei hubani Jahowa.ʼ ”

³⁰Dob ai nini si Musa ma hubani halak Israel, “Tonggor ma, domma idilo Jahowa sahalak na margoran si Besaleel, anak ni si Uri, in ma anak ni si Hur humbani marga Juda.

³¹Domma igoki ia marhitei Tonduy ni Naibata, marhitei hapentaran, torus ni uhur pakon hapandeian ibagas ganup horja ai,

³²laho mamingkiri hapandeian na tarsulur, laho manukangi omas, pirak pakon tombaga,

³³manguhir pakon mamijor batu intan, manukangi hayu pakon mangkorjahon horja na marbagei in.

³⁴Anjaha domma iberehon Jahowa hubani hapentaran laho mangajari, ia pakon si Aholiab, anak ni si Ahisamak humbani marga Dan.

³⁵Domma igoki uhur ni sidea bani hapentaran laho mambahen ganup horja sihorjahonon ni tuhang, horja ni kopala tuhang, horja ni sibahen hiou simahonda pakon sigerger, hiou hasumba pakon hiou silopak na alus ampa horja ni sipartonun, ai ma mangkorjahon bagei ni horja pakon mambahen ranggian.”