Read Batak Simalungun 2 MUSA 39 Bible Online

2 MUSA 39 - Batak Simalungun bible

2 MUSA 39

¹Ipauli sidea ma pakean tohonan, sipakeion marugas bani ianan na pansing ai humbani bonang na mahonda, na gerger pakon na gerger sahalian; ipauli homa ma pakean na pansing sipakeion ni si Aron songon na tinonahkon ni Jahowa hubani si Musa. [308]

²Anjaha ipauli ma baju epod ai humbani omas pakon humbani bonang na mahonda, na gerger anjaha na gerger sahalian pakon humbani hiou silopak na alus na niangkup.

³Itopa sidea ma omas ai marlambar-lambar na nipis, iiris ma ai gabe purada, sitonunonkon saor ni bonang na mahonda, na gerger ampa na gerger sahalian ai, pakon saor ni hiou silopak na alus na niangkup ai, sada tonunan na alus.

⁴Ibahen sidea ma hubani baju epod ai dua tutup abara, na pinadomu bani tampakanni na dua ai.

⁵Gondit ni epod na i atas ni ai pe, na gabe panangkut ni ai, dos do pulunganni pakon pardearni, humbani omas, humbani bonang na mahonda, na gerger, na gerger sahalian pakon humbani hiou silopak na alus na niangkup, songon na tinonahkon ni Jahowa hubani si Musa.

⁶Itukangi ma batu intan unam ai, ililit ma bani tali omas anjaha iuhirhon ma hujai, goran-goran ni anak ni Israel na sapuluh dua ai, songon na manguhir tintin tokan.

⁷Inahkon ma ai hubani na dua tutup abara ni baju epod ai, gabe batu pardingatan bani anak ni Israel, songon na tinonahkon ni Jahowa hubani si Musa.

⁸Ipauli ma tutup tonton ai, ai ma sada horja na alus, dos songon na padearhon baju epod ai, humbani bonang na mahonda, na gerger, na gerger sahalian pakon hiou silopak na alus na niangkup.

⁹Marompat suhi do ai ibahen anjaha dua lapis, sanjongkal ganjangni anjaha sanjongkal bolagni, dua lapis ibahen.

¹⁰Anjaha itatahkon sidea ma hujai ompat ristei batu intan. Bani ristei na parlobei: Batu intan sardis, topasion pakon samarah;

¹¹bani ristei na paduahon: batu intan rubin, sapir pakon diamant;

¹²bani ristei na patoluhon: batu intan opal, achat pakon ametis;

¹³bani ristei na paompatkon: batu intan korisolit, unam pakon jaspis; anjaha marlilit omas ibahen ristei na tinatahkon ai inggot.

¹⁴Adong do ijai sapuluh dua batu margoran bei mangihutkon goran-goran ni anak ni Israel, songon tintin tokan ma ai bani Israel na sapuluh dua marga ai, goran ni sidea bei iuhirhon hujai.

¹⁵Anjaha ibahen sidea ma hubani tutup tonton ai rantei songon tali na niangkup humbani omas pitah;

¹⁶ibahen sidea ma homa dua rantei-rantei omas pakon dua tintin omas, anjaha inahkon sidea ma na dua tintin ai hubani na dua tampakan ni tutup tonton ai.

¹⁷Anjaha inahkon sidea do na dua tali omas ai hubagas tintin na dua ai, na i tampakan ni tutup tonton ai.

¹⁸Tapi haduasi ujung ni tali omas na dua ai ihaitkon sidea do hubani rantei-rantei na dua ai, anjaha inahkon ma ai hubani tutup abara ni baju epod ai hampit lobei.

¹⁹Ibahen sidea ma use dua tintin omas, inahkon ma ai bani na dua tampakan ni tutup tonton ai bani topini hampit bagas na padompak pakon baju epod ai.

²⁰Ibahen use ope dua tintin omas, anjaha inahkon ma ai hubani na dua tutup abara ni baju epod ai, hampit toruh dompak lobei, sangkan pardomuanni, i atas ni gondit ni baju epod ai.

²¹Anjaha isangkutkon sidea ma tutup tonton ai rap pakon tintinni hubani tintin ni baju epod ai marhitei bonang na mahonda, ase longkot ai i atas ni gondit ni baju epod ai, songon na tinonahkon ni Jahowa hubani si Musa.

²²Ipauli ma homa baju pardarat ni epod ai, humbani bonang na mahonda do ganupan ai itonun.

²³I tongah-tongahni do parborgokanni, martopi na tinonun inggot songon topi ni baju partohonan, ase ulang marigat.

²⁴Ibahen sidea do hubani rambu ni baju pardarat ai buah ni dalima humbani bonang na mahonda, na gerger, na gerger sahalian pakon humbani hiou silopak na alus na niangkup.

²⁵Ibahen sidea ope homa giring-giring humbani omas pitah, inahkon ma ai hu holangkolang ni buah ni dalima ai inggot bani rambu ni baju pardarat ai;

²⁶giring-giring omas sada dob ai buah dalima, giring-giring omas sada dob ai buah dalima, sonai ma inggot bani rambu ni baju pardarat ai, sipakeion marugas songon na tinonahkon ni Jahowa hubani si Musa.

²⁷Ibahen sidea ma homa baju parbagas, itonun humbani hiou silopak na alus, hubani si Aron pakon anakni ai,

²⁸pakon tangkuluk humbani hiou silopak na alus, pakon gotong-gotong humbani hiou silopak na alus, pakon saluar humbani hiou silopak na alus na niangkup,

²⁹pakon gondit humbani hiou silopak na alus na niangkup, ampa humbani bonang na mahonda, na gerger pakon na gerger sahalian, sada tonunan sampurborna songon na tinonahkon ni Jahowa hubani si Musa.

³⁰Ibahen sidea do homa sada tutup pardompakan na pansing humbani omas pitah, anjaha iuhirhon hujai songon panguhiron bani tintin tokan: Pinapansing bani Jahowa. [309]

³¹Ilongkotkon sidea ma hujai tali bonang na mahonda, laho padomuhon ai bani tangkuluk ai i babou, songon na tinonahkon ni Jahowa hubani si Musa.

³²Sonai ma pardob ni ganup horja paulihon ianan na pansing, lampolampo partumpuan ai; ibahen halak Israel do ganup hombar hubani na hinatahon ni Jahowa hubani si Musa, sonai do ibahen sidea.

³³Iboban sidea ma ianan na pansing ai hubani si Musa, lampolampo ai pakon ganup parugasni, hait-kaitni, papanni, ransang-ransangni, tiangni pakon onjolanni;

³⁴langit-langitni na humbani bobak ni biribiri tunggal na sinolop, langit-langitni humbani bobak ni hambing ampa tirei panutupni,

³⁵poti hasaksian ai pakon lanja-lanjani ampa langkob pardearan ai,

³⁶meja ai rap pakon haganup parugasni ampa ruti sigalangonkon;

³⁷parsuluhan na humbani omas pitah ai pakon suluhni rap pakon tampeianni ronsi haganup parugasni ampa minak hubani parsuluhan ai,

³⁸anjapanjap omas ai, minak pamminaki ai, dahupa na misbou ai pakon tirei tutup ni labah ni lampolampo ai,

³⁹anjapanjap tombaga ai pakon hondor-hondor tombagani, lanja-lanjani rap pakon ganup parugasni, tong parburihan ai rap pakon onjolanni,

⁴⁰tirei ni horbangan ni alaman ai, talini pakon pakuni, ampa haganup parugas sipakeion bani haganup horja ibagas ianan na pansing ai, ai ma lampolampo partumpuan ai;

⁴¹pakean tohonan marugas ibagas ianan na pansing ai, pakean na pansing bani Malim Aron pakon pakean bani anakni ai laho mangkorjahon hamalimon ai.

⁴²Hombar hubani na tinonahkon ni Jahowa hubani si Musa, sonai do idobkon halak Israel haganup horja ai.

⁴³Jadi itorih si Musa ma haganup horja ai, anjaha tonggor ma, domma dob ibahen sidea; songon na tinonahkon ni Jahowa hubani si Musa, lanjar sonai do ibahen sidea. Dob ai ipasu-pasu si Musa ma sidea.