Read Batak Simalungun 2 MUSA 4 Bible Online

2 MUSA 4 - Batak Simalungun bible

2 MUSA 4

¹Dob ai nini si Musa ma mambalosi, “Tapi tonggor Ham ma, seng haporsayaan ni sidea ahu anjaha seng tangihonon ni sidea sorangku, tapi hatahonon ni sidea do, ʻSeng taridah Jahowa bam!ʼ ”

²Nini Jahowa ma dompaksi, “Aha do na i tanganmin?”Balosni, “Tungkot.”

³Dob ai nini ma, “Gijigkon ma in hu tanoh!”Jadi igijigkon ma ai hu tanoh, lanjar gabe ulog ma; pala lintun si Musa hun lobeini. [13]

⁴Tapi nini Jahowa ma dompak si Musa, “Surdukkon ma tanganmu anjaha tangkap ma ihurni.”Jadi isurdukkon ma tanganni, itangkap ma anjaha gabe tungkot ma ai i tanganni,

⁵ase porsaya sidea na dob taridah bam Jahowa Naibata ni ompung ni sidea, Naibata ni si Abraham, Naibata ni si Isak pakon Naibata ni si Jakob.

⁶Ambah ni ai nini Jahowa ope dompaksi, “Surukkon ma tanganmu hubagas bajumin.”Jadi isurukkon ma tanganni hubagas bajuni; sanggah itarik ai, tonggor ma, domma gadamon tanganni ai, malopak songon salju.

⁷Dob ai nini ma use, “Ulaki ma surukkon tanganmin hubagas bajumin. Jadi iulakkon ma manurukkon tanganni ai hubagas bajuni; sanggah itarik ai, tonggor ma, domma mulak dear songon dagingni hinan.

⁸“Anggo lang porsaya sidea bam, anjaha lang itangihon sora ni tanda na parlobei in, sai na porsaya do sidea bahenon ni sora ni tanda na paduahon in.

⁹Tapi anggo lang itangihon age tanda na dua on, anjaha lang itangihon soramu, buat ma bah hun Nil ai, anjaha useihon ma ai hu tanoh na horah; jadi gabe daroh ma bah na binuatmai hun Bah Nil ai i tanoh na horah ai.” [14]

¹⁰Tapi nini si Musa ma dompak Jahowa, “Ham Tuhanku, seng halak parsahap-sahap ahu, age i lobei ni on, age olat ni na dob marsahap Ham dompak ahu jabolonmu on; ai borat do pamanganku pakon dilahku.” [15]

¹¹Dob ai nini Jahowa ma dompaksi, “Ise do na mambahen pamangan ni jolma? Ise do na mambahen ia longah, nengel, marpangidah atap pitung? Ai lang Ahu, Jahowa do? [16]

¹²On pe, laho ma ho, Ahu pe mangkasomani pamanganmu anjaha mangajari ho atap aha sihatahononmu.” [17]

¹³Tapi nini ma, “Ham Tuhan, suruh Ham ma atap ise na legan.”

¹⁴Jadi manringis tumang ma Jahowa dompak si Musa, nini ma, “Ai lang saninamu do si Aron, halak Levi ai? Hubotoh na pandei do ia marsahap; tonggor ma homa, domma roh ia marjumpahkon ho, anjaha malas ma uhurni ibagas anggo ididah ho.

¹⁵Parsahapkon ma ia anjaha nahkon ma ganup hata ai hu pamanganni; Huhasomani pe pamanganmu ampa pamanganni anjaha Huajari pe hanima atap aha sibahenonnima.

¹⁶Ia pe gantihmu marsahap hubani bangsa ai, ia ma songon pamangan bam anjaha ho songon Naibata bani. [18]

¹⁷Boan ma tungkot in ibagas tanganmu, parhiteianmu mambahen sagala tanda ai.”

¹⁸Dob ai laho ma si Musa mulak hubani si Jetro, tulangni ai, nini ma hu bani, “Mahua lopas ham ma ahu laho mulak hubani saninangku na i tanoh Masir, ase huidah atap na manggoluh ope sidea.” nini si Jetro ma, “Laho ma ho ibagas damei.” [19]

¹⁹Dob ai nini Jahowa ma dompak si Musa i Midian, “Laho ma ho mulak hu Masir, ai domma matei ganup halak na mantahihon hosahmu.”

²⁰Dob ai iboan si Musa ma parinangonni pakon anakni, ipahundul ma sidea hubani sada halode, jadi mulak ma ia hu tanoh Masir. Iboan do homa tungkot ni Naibata ai ibagas tanganni.

²¹Nini Jahowa ma dompak si Musa, “Anggo mulak ho hu tanoh Masir, ingat ma mambahen ganup halongangan na Huondoskon in hubagas tanganmu i lobei ni Parao. Tapi pahengkengon-Ku do uhurni ase ulang ilopas bangsa ai laho. [20]

²²Anjaha hatahon ma dompak Parao, Sonon do hata ni Jahowa, “Anak-Ku sikahanan do Israel, [21]

²³halani ai Huhatahon ma bam, lopas ma anak-Ku laho ase ipasangap Ahu. Anggo mangengkar ho palopaskonsi laho, tonggor ma, bunuhon-Ku ma bunga tubuhmu.” [22]

²⁴Tapi i tongah dalan sanggah ibagas sada rumah parbornginan ia, ijumpahkon Jahowa ma ia sihol mambunuhsi.

²⁵Jadi ibuat si Zippora ma sada batu na marot, isunat ma sibur-sibur ni anakni, igiut ma nahei ni si Musa marhitei ai anjaha nini ma, “Siparunjuk daroh do ho bangku.” [23]

²⁶Jadi ipaluah Jahowa ma ia. Ihatahon pe ijia “Siparunjuk daroh”, halani parsunaton ai do.

²⁷Dob ai nini Jahowa ma dompak si Aron, “Laho ma ho manjumpahkon si Musa hu halimisan.” Jadi laho ma ia, gabe jumpahsi ma ia i Dolog ni Jahowa anjaha isummah ma ia.

²⁸Ipatugah si Musa ma hubani si Aron haganup hata ni Jahowa na hinatahonni, pakon haganup tanda na tinonahkon-Ni bani.

²⁹Dob ai laho ma si Musa pakon si Aron, ipatumpu sidea ma ganup partua-partua ni halak Israel.

³⁰Ipatugah si Aron ma haganup hata ai, na hinatahon ni Jahowa dompak si Musa, anjaha ibahen ma ganup tanda ai i lobei ni bangsa ai.

³¹Jadi porsaya ma bangsa ai; anjaha dob ibogei sidea, na dob iparayak Jahowa halak Israel anjaha itatap hamarsikonni, mangunduk bei ma sidea anjaha manrogop. [24]