Read Batak Simalungun 2 MUSA 40 Bible Online

2 MUSA 40 - Batak Simalungun bible

2 MUSA 40

¹Dob ai nini Jahowa ma dompak si Musa,

²“Bani ari sada bulan sada maningon pajongjongonmu do ianan na pansing, lampolampo partumpuan ai.

³Maningon nahkononmu do hujai poti hasaksian ai, anjaha lingodkononmu poti ai bani tirei ai.

⁴Maningon boanonmu do meja ai hubagas, anjaha aturonmu siaturonkon i atasni, anjaha maningon boanonmu do parsuluhan ai hubagas anjaha pannahkononmu suluh ai hujai.

⁵Maningon pajongjongonmu do anjapanjap pardahupaan omas ai i lobei ni poti hasaksian ai, anjaha tirei ai maningon gantungkononmu do i lobei ni labah ni ianan na pansing ai.

⁶Maningon pajongjongonmu do anjapanjap panggalangan ni galangan situtungon ai i lobei ni labah ni ianan na pansing, lampolampo partumpuan ai.

⁷Maningon pajongjongonmu do tong parburihan ai i holangkolang ni lampolampo partumpuan ai pakon anjapanjap ai, anjaha nahkon ma bah hubagas.

⁸Maningon paulionmu do alaman ai inggot, anjaha gantungkononmu tirei i lobei ni horbangan ni alaman ai.

⁹Dob ai buat ma minak pamminaki ai, minaki ma ianan na pansing ai pakon ganup na adong ibagas, anjaha urasi ma ai pakon haganup parugasni, ase gabe pansing ma ai.

¹⁰Maningon minakanmu do anjapanjap panggalangan ni galangan situtungon ai pakon haganup parugasni, maningon urasonmu do anjapanjap ai, ase gabe pansing sahalian anjapanjap ai.

¹¹Maningon minakanmu do tong parburihan ai pakon onjolanni, maningon urasonmu do ai.

¹²Dob ai boan ma si Aron pakon anakni ai roh hun dohor hu labah ni lampolampo partumpuan ai, anjaha burihi ma sidea bani bah;

¹³sorungkon ma hubani si Aron pakean na pansing ai, minaki ma ia anjaha urasi ma ia, ase ia mangkorjahon hamalimon Bangku.

¹⁴Boan ma homa anakni ai hun dohor, anjaha sorungkon ma hubani sidea baju parbagas ai,

¹⁵anjaha minaki ma sidea songon na mininakanmu bapa ni sidea, ase sidea mangkorjahon hamalimon Bangku; ia pamminakion na bani sidea ai gabe tanda hamalimon do ai bani sidea sadokah ni dokahni torus marsundut-sundut.”

¹⁶Jadi ipasaud si Musa ma ganup songon na tinonahkon ni Jahowa hu bani, sonai do ibahen.

¹⁷Anjaha bani bulan sada, tahun paduahon, bani ari parlobei ni bulan ai, ipajongjong ma ianan na pansing ai.

¹⁸Ipajongjong si Musa ma ianan ai; ibahen ma onjolanni, ipamasuk papanni, ibahen ransang-ransangni anjaha ipajongjong tiangni.

¹⁹Ipaherbang ma tenda ni lampolampo ai hu atas ni ianan na pansing ai, anjaha inahkon ma tutup ni lampolampo ai hu atasni, songon na tinonahkon ni Jahowa hubani si Musa.

²⁰Ibuat ma hasaksian ai anjaha inahkon hubagas poti ai, isurukkon ma lanja-lanja ai hubani poti ai anjaha inahkon langkob pardearan ai hu atas ni poti ai.

²¹Dob ai iboban ma poti ai hubagas ianan na pansing ai, anjaha igantungkon ma tirei ai bahen tutup ni poti hasaksian ai, songon na tinonahkon ni Jahowa hubani si Musa.

²²Ipajongjong ma meja ai hubagas lampolampo partumpuan ai hampit lopah parutara ni ianan na pansing ai i darat ni tirei ai,

²³anjaha iatur ma ruti i atasni i lobei ni Jahowa, songon na tinonahkon ni Jahowa hubani si Musa.

²⁴Ipajongjong ma homa parsuluhan ai ibagas ianan na pansing ai tontang ni meja ai hampit lopah pardangsina ni ianan na pansing ai.

²⁵Inahkon ma suluh ai i atasni i lobei ni Jahowa, songon na tinonahkon ni Jahowa hubani si Musa.

²⁶Inahkon ma anjapanjap omas ai ibagas lampolampo partumpuan ai i lobei ni tirei ai,

²⁷anjaha itutung ma dahupa na misbou i atasni songon na tinonahkon ni Jahowa hinan hubani si Musa.

²⁸Igantungkon ma pakon tirei ai i lobei ni labah ni ianan na pansing ai.

²⁹Tapi anggo anjapanjap panggalangan ni galangan situtungon ai ipajongjong do bani labah ni ianan na mapansing, lampolampo partumpuan ai, anjaha igalangkon ma i atasni galangan situtungon pakon galangan sipanganon songon na tinonahkon ni Jahowa hinan hubani si Musa.

³⁰Ipajongjong ma tong parburihan ai i holangkolang ni lampolampo partumpuan ai pakon anjapanjap ai, anjaha ibahen ma bah hujai bahen parburihan;

³¹bani bah ai ma iburihi si Musa, si Aron pakon anakni ai tangan pakon nahei ni sidea.

³²Anggo masuk sidea hubagas lampolampo partumpuan ai, anjaha anggo roh sidea hun dohor bani anjapanjap ai, maningon marburih sidea, songon na tinonahkon ni Jahowa hinan hubani si Musa.

³³Ipauli ma alaman ai inggot ianan na mapansing ai pakon anjapanjap ai, anjaha igantungkon ma tirei ni horbangan ni alaman ai. Jadi sonai ma pardob ni ganup horja ai ibahen si Musa.

³⁴Dob ai roh ma hombun ai manrungkub lampolampo partumpuan ai, anjaha igoki hamuliaon ni Jahowa ma ianan na mapansing ai, [310]

³⁵gabe seng tarbahen si Musa masuk hubagas lampolampo partumpuan ai, ai sorap do i atasni hombun ai, anjaha hamuliaon ni Jahowa manggoki ianan na mapansing ai. [311]

³⁶Layur ibagas pardalanan ni sidea ai, anggo manaik ma hombun ai hun datas ni ianan na pansing ai, bingkat ma halak Israel mardalan;

³⁷tapi anggo seng manaik hombun ai, seng bingkat sidea, das ronsi ari parnaikni ai.

³⁸Ai sai i atas ni ianan na mapansing ai do hombun ni Jahowa ai ia arian, anjaha apuy do i atasni anggo borngin, ipaidah-idah ganup ginompar ni Israel, sadokah pardalanan ni sidea ai.