Read Batak Simalungun 2 MUSA 5 Bible Online

2 MUSA 5 - Batak Simalungun bible

2 MUSA 5

¹Dob ai laho ma si Musa pakon si Aron mangadap Parao, nini sidea ma, “Sonon do hata ni Jahowa Naibata ni Israel, ʻLopas ma laho bangsang-Kin, ase ibahen sidea pesta Bangku i halimisan.ʼ ” [25]

²Nini Parao ma mambalosi, “Ise do Jahowa, ase maningon tangihononku sora-Ni palopaskon laho Israel? Seng hupabotoh-botoh Jahowa anjaha halak Israel pe seng hulopas laho.” [26]

³Nini sidea ma, “Na marjumpah do Naibata ni halak Heber pakon hanami, lopas ham ma hanami laho tolu ari mardalan daohni hu halimisan, ase manggalang hanami hubani Jahowa Naibatanami, ase ulang ihonahon bennami sampar atap podang pe.”

⁴Tapi nini raja ni Masir ma dompak sidea, “Ho Musa pakon ho Aron, mase ma langlangannima bangsa in bani horjani? Laho ma hanima mangkorjahon rodinima.”

⁵Ambah ni ai nini Parao ma, “Tonggor ma, domma sonin buei ni bangsa in i tanoh on, gabe sihol ope pasaranonnima sidea humbani rodini sidea?” [27]

⁶Lanjar bani ari ai iparentahkon Parao ma hubani mandur pakon partua-partua ni bangsa ai, nini ma,

⁷“Ulang be bere hanima anggala hubani bangsa in laho mambahen batu merah songon na somal; sidea sandiri ma patumpuhon anggala bani.

⁸Tapi anggo buei ni batu merah sibahenon ni sidea songon na somal, tong do pabobankononnima hubani sidea; seng bulih oruannima ai, ai parrayoh do sidea. Halani ai do ase dilo-dilo sidea, ʻLaho ma hita manggalang hubani Naibatanta!ʼ

⁹Maningon patorikon do horja hubani halak ai silahoan ni sidea, ase ulang ipatangi-tangi hata guak.”

¹⁰Jadi luar ma mandur pakon partua-partua ni bangsa ai, nini sidea ma hubani bangsa ai, “Sonon do hata ni Parao, ʻSeng ra be ahu mambere anggala hu bennima.

¹¹Laho ma hanima, pindahi hanima ma bannima anggala atap ija boi jumpah hanima ai, tapi anggo horjanima otik pe lang boi hurang.ʼ ”

¹²Jadi mampar ma bangsa ai hu sab tanoh Masir laho patumpuhon panabian gantih ni anggala.

¹³Sai isosak-sosak mandur ai do sidea, anjaha ihatahon: “Dobkon hanima horjanima siap arian songon na somal sanggah adong ope anggala.”

¹⁴Jadi hona balbal ma partua ni halak Israel, na niangkat ni mandur ni Parao manjaga sidea, nini ma, “Mase ma lang idobkon hanima sadari on nasa bilangan ni batu merah na dob tinontuhon songon na sain dokah?”

¹⁵Halani ai laho ma partua ni halak Israel dorak-dorak hubani Parao, nini sidea ma, “Mase ma sonin ibahen ham hubani jabolonmu?

¹⁶Seng dong be anggala ibere hubani jabolonmu, hape sai ihatahon sidea do bennami, ʻBahen batu merah!ʼ Tonggor ma, hona bogbog do jabolonmu; tapi bangsamu do parsalah.” [28]

¹⁷Tapi nini ma, “Sabonar parrayoh do hanima. Halani ai do ase ihatahon hanima, ʻLaho ma hita manggalang hubani Jahowa.ʼ

¹⁸Laho ma hanima marhorja! Seng be bereon bannima anggala, tapi maningon bereonnima do atap sadiha bilangan ni batu merah ai.”

¹⁹Jadi ididah partua ni halak Israel ma hamagouan ni sidea ai, halani hata ai, “Seng bulih hurangannima bilangan ni batu merah sipaulionnima ai siap arian.”

²⁰Dob ai jumpah sidea ma si Musa pakon si Aron jongjong paimahon sidea sanggah na luar ai sidea hun lobei ni Parao,

²¹nini sidea ma dompak sidea, “Jahowa ma na mangidah pakon na manguhum hanima, ai ibahen hanima do hanami gabe hagigi ni Parao pakon juakjuakni, anjaha mambere podang hu tangan ni sidea laho mamunuh hanami.” [29]

²²Jadi idompakkon si Musa ma use Jahowa, nini ma, “Ham Tuhan, mase ma ibahen Ham na masambor hubani bangsa on? Mase ma isuruh Ham ahu hujon?

²³Ai olat ni dob laho ahu mangadap Parao marsahap marhitei goran-Mu, roh jahatni do pambahenni hubani bangsa on, anjaha seng ipaluah Ham bangsa-Mu.”