Read Batak Simalungun 2 MUSA 6 Bible Online

2 MUSA 6 - Batak Simalungun bible

2 MUSA 6

¹Jadi nini Jahowa ma dompak si Musa, “Idahonmu ma sonari na sihol bahenon-Ku hubani Parao, ai marhitei tangan na gogoh lopasonni ma sidea laho, anjaha marhitei tangan na gogoh juaronni ma sidea hun tanohni.”

²Marsahap ma use Naibata dompak si Musa, nini ma dompaksi, “Ahu do Jahowa.

³Domma Hupatalar diring-Ku hubani si Abraham, si Isak pakon si Jakob songon Naibata Pargogoh Na So Tarimbang, tapi goran-Ku Jahowa seng ope Hupatalar hubani sidea. [30]

⁴Domma homa Hupajongjong padan-Ku pakon sidea sihol mamberehon tanoh Kanaan hubani sidea, ai ma tanoh panginsolatan ni sidea. [31]

⁵Domma homa Hutangihon dorak-dorak ni halak Israel na pinarjabolon ni halak Masir, anjaha domma Huingat padan-Ku.

⁶Halani ai hatahon ma hubani halak Israel, ʻAhu do Jahowa, padaraton-Ku do hanima humbani horja rodi ni halak Masir, paluahon-Ku do hanima humbani parjabolonan ni sidea, anjaha tobuson-Ku do hanima marhitei tangan na gostong pakon marhitei uhum banggal.

⁷Jaloon-Ku do hanima gabe bangsang-Ku, anjaha Ahu ma gabe Naibatanima; botohonnima ma Ahu do Jahowa Naibatanima na padaratkon hanima humbani horja rodi ni Masir.

⁸Anjaha arahkonon-Ku ma hanima hu tanoh na dob Hubulawankon berehonon-Ku hubani si Abraham, si Isak pakon si Jakob. Berehonon-Ku ma ai bahen bagiannima. Ahu do Jahowa.ʼ ” [32]

⁹Dob ai ipatugah si Musa ma sonai hubani halak Israel, tapi lang itangihon sidea si Musa halani sosak ni uhur pakon borat ni parjabolonan ai.

¹⁰Jadi marsahap ma Jahowa dompak si Musa, nini ma,

¹¹“Laho ma, hatahon ma hubani Parao, raja ni Masir, ase ipalopas halak Israel mandarat hun tanohni.”

¹²Tapi nini si Musa ma i lobei ni Jahowa, “Tonggor Ham ma, seng anjai itangihon halak Israel ahu; sonaha ma tangihonon ni Parao ahu, ai seng pandei ahu marsahap.” [33]

¹³Jadi marsahap ma Naibata dompak si Musa ampa si Aron, anjaha ibere ma hubani sidea parentah sihatahonon ni sidea hubani halak Israel pakon hubani Parao, raja ni Masir, ase ipadarat halak Israel hun tanoh Masir.

¹⁴On ma pangku ni sidea mar sasaompung: Anak ni si Ruben, bunga tubuh ni si Israel: Si Henok, si Palu, si Hezron pakon si Karmi; ai ma ginompar ni si Ruben.

¹⁵Anak ni si Simeon: Si Jemuel, si Jamin, si Ohad, si Jakin, si Zohar pakon si Saul, tinubuhkon ni boru Kanaan; ai ma ginompar ni si Simeon.

¹⁶On ma goran ni anak ni si Levi mangihutkon partubuh ni sidea, Si Gerson, si Kahat pakon si Marari. Anggo umur ni si Levi saratus tolu puluh pitu tahun do.

¹⁷Anak ni si Gerson: Si Libni pakon si Simei mangihutkon partubuh ni sidea.

¹⁸Anak ni si Kahat: Si Amram, si Izhar, si Hebron pakon si Usiel. Anggo umur ni si Kahat saratus tolu puluh tolu tahun do.

¹⁹Anak ni si Merari: Si Mahli pakon si Musi. On ma ginompar ni si Levi mangihutkon partubuh ni sidea.

²⁰Jadi ibuat si Amram ma si Jokebed, namboruni ai, bahen parinangonni, gabe itubuhkon ma si Musa pakon si Aron. Anggo umur ni si Amram saratus tolu puluh pitu tahun do.

²¹Anak ni si Izhar: Si Korah, si Nefeg pakon si Zichri.

²²Anak ni si Usiel: Si Misael, si Elsapan pakon si Sitri.

²³Jadi ibuat si Aron ma Eliseba, boru ni si Aminadab, botou ni si Nahason bahen parinangonni, gabe itubuhkon ma si Nadab, si Abihu, si Eleasar pakon si Itamar.

²⁴Anak ni si Korah: Si Asir, si Elkana, si Abiasap; on ma ompung ni halak Korah.

²⁵Jadi ibuat si Eleasar, anak ni si Aron ma sada humbani boru ni si Putiel bahen parinangonni, gabe itubuhkon ma si Pinehas; ai ma pangku ni halak Levi sasaompung mangihutkon marga ni sidea bei.

²⁶Ai ma si Aron pakon si Musa na pinarsahapkon ni Jahowa, na mangkatahon dompak sidea, “Arahkon ma mandarat halak Israel hun tanoh Masir, iatur bala ni sidea bei.

²⁷Sidea ma na mangkatahon hubani Parao, raja ni Masir, ase iarahkon halak Israel mandarat hun Masir, ai ma si Musa pakon si Aron.”

²⁸Jadi bani panorang na marsahap Jahowa hubani si Musa i tanoh Masir,

²⁹nini Jahowa ma dompak si Musa, “Ahu do Jahowa; padas ma hubani Parao, raja ni Masir, haganup na Huhatahon bam.”

³⁰Tapi nini si Musa ma dompak Jahowa, “Tonggor Ham ma, seng pandei ahu marsahap, sonaha ma ra tangihonon ni Parao ahu?” (ay 12)