Read Batak Simalungun 2 MUSA 7 Bible Online

2 MUSA 7 - Batak Simalungun bible

2 MUSA 7

¹Jadi nini Jahowa ma dompak si Musa, “Tonggor ma, domma Hupabangkit ho gabe Naibata ni Parao anjaha si Aron abangmin gabe nabimu. [34]

²Hatahon ma haganup na dob Huparentahkon in bam; anjaha abangmu si Aron ma padaskon ai hubani Parao, ase ipalopas laho halak Israel hun tanohni.

³Tapi pahengkengon-Ku ma uhur ni Parao, anjaha age pe Hupabuei tanda pakon halongangan-Ku i tanoh Masir, [35]

⁴seng tangihonon ni Parao hanima; jadi honahonon-Ku ma tangan-Ku hu Masir anjaha padaraton-Ku ma balang-Ku, bangsang-Ku halak Israel hun tanoh Masir marhitei uhum banggal.

⁵Jadi botohon ni halak Masir ma Ahu do Jahowa, anggo Hupagostong tangan-Ku dompak Masir anjaha Hupadarat halak Israel hun tongah-tongah ni sidea.” [36]

⁶Jadi ibahen si Musa pakon si Aron ma songon na pinarentahkon ni Jahowa hubani sidea; sonai do ibahen sidea.

⁷Ualuh puluh tahun ma umur ni si Musa anjaha umur ni si Aron ualuh puluh tolu tahun, sanggah na marsahap ai sidea pakon Parao.

⁸Dob ai nini Jahowa ma dompak si Musa pakon si Aron,

⁹“Anggo ihatahon Parao bannima, ʻPatuduhkon hanima ma marhitei sada tanda halongangan,ʼ jadi hatahon ma hubani si Aron, ʻBuat ma tungkotmin, gijigkon ma in hu lobei ni Parao, ase gabe ulog in.ʼ ” [37]

¹⁰Dob ai iparayak si Musa pakon si Aron ma Parao, ibahen sidea ma songon na pinarentahkon ni Jahowa. Igijigkon si Aron ma tungkotni ai hu lobei ni Parao pakon hu lobei ni juakjuakni, jadi gabe ulog ma ai.

¹¹Dob ai idilo Parao ma halak paruhur pakon datu. Jadi sidea pe, datu ni Masir, ibahen ma sonai marhitei tabas ni sidea. [38]

¹²Ipanggijigkon sidea bei ma tungkotni, jadi gabe ulog ma ai; tapi ibondut tungkot ni si Aron ma tungkot ni sidea ai.

¹³Gabe hengkeng ma uhur ni Parao, seng itangihon sidea songon na dob hinatahon ni Jahowa hinan. [39]

¹⁴Dob ai nini Jahowa ma dompak si Musa, “Na hengkeng do uhur ni Parao, manjua do ia palahohon bangsa in.

¹⁵Laho ma ho girah sogod hubani Parao, sanggah laho ia hu bah; jumpahkon ma ia hu topi ni bah ai, anjaha jolom ma ibagas tanganmu tungkot na dob gabe ulog ai.

¹⁶Hatahon ma hu bani, ʻJahowa, Naibata ni halak Heber do na marsuruh ahu hu bamu mangkatahon: Lopas ma bangsang-Ku laho, ase iidangi Ahu i halimisan; hape tonggor ma, seng itangihon ho ronsi nuan.ʼ [40]

¹⁷Sonon do nini Jahowa, ʻBotohonmu ma marhitei tanda on, Ahu do Jahowa; tonggor ma, libaskonon-Ku ma tungkot na ibagas tangankon hu bah na i Bah Nil in, jadi mubah ma in gabe daroh, [41]

¹⁸jadi matei ma nidurung na ibagas Bah Nil in, gabe marbau ma Bah Nil in anjaha gigian halak Masir manginum bah hun Bah Nil in.ʼ ”

¹⁹Dob ai nini Jahowa ma dompak si Musa, “Hatahon ma bani si Aron, ʻBuat ma tungkotmin, pagostong ma tanganmin hu atas ni ganup bah na i tanoh Masir, hu atas ni bah banggal ni sidea, bah angkatan ni sidea, bongbongan ni sidea, bah na ipatumpu sidea, ase gabe daroh haganup,ʼ ase daroh ma jumpah i sab tanoh Masir, ibagas ansubah ampa ibagas gusi.” [42]

²⁰Jadi ibahen si Musa pakon si Aron ma songon na tinitahkon ni Jahowa, iangkat ma tungkot ai hu atas, ilibas ma bah na i Bah Nil ai i lobei ni Parao pakon i lobei ni juakjuakni, jadi salih ma ganup bah na i Bah Nil ai gabe daroh.

²¹Matei ma dengke na i Bah Nil, anjaha marbau ma Bah Nil ai, gabe lang tarinum halak Masir be bah hun Bah Nil; anjaha sab do daroh ai bani haganup tanoh Masir.

²²Tapi ibahen datu ni Masir do homa sonai marhitei tabas ni sidea, gabe lanjar hengkeng ma uhur ni Parao, seng itangihon sidea, songon na hinatahon ni Jahowa hinan. [43]

²³Marhusor ma Parao laho mulak hu rumahni, anjaha seng homa iparuhurhon ai.

²⁴Jadi inggot Bah Nil ma ihurak ganup halak Masir bah bahen inumon, ai seng tarinum sidea bah hun Bah Nil.

²⁵Pala do gok pitu ari dokahni ai, dob na ilibas Jahowa bah Nil ai.