Read Batak Simalungun 2 MUSA 8 Bible Online

2 MUSA 8 - Batak Simalungun bible

2 MUSA 8

¹Dob ai nini Jahowa ma dompak si Musa, “Laho ma ho mangadap Parao anjaha hatahon ma hu bani, ʻSonon do hata ni Jahowa, lopas ma laho bangsang-Kin, ase isombah sidea Ahu. [44]

²Tapi anggo mangengkar ho manlopas sidea laho, tonggor ma, arsikon-Ku ma ganup gomgomanmu marhitei tohuk;

³gumayon ma Bah Nil in ibahen tohuk, manangkihi anjaha masuk ma hu rumahmu, hu kamar podoman pakon hu podomanmu, hu rumah ni juakjuak pakon bangsamu, hu tataring pakon hudonmu,

⁴tangkihon ni tohuk ai ma ho, bangsamu pakon juakjuakmu.ʼ ”

⁵Dob ai nini Jahowa ma dompak si Musa, “Hatahon ma bani si Aron, ʻPagostong ma tanganmu rap pakon tungkotmu hu babou ni sagala bah banggal, bah angkatan pakon bongbongan, anjaha patangkog ma tohuk ai hu tanoh Masir.ʼ ”

⁶Jadi ipagostong si Aron ma tanganni hu babou ni bah i tanoh Masir, gabe tangkog ma tohuk ai anjaha irongkob ma tanoh Masir.

⁷Dob ai ibahen datu ai ma homa sonai marhitei tabas ni sidea, ipatangkog sidea ma tohuk ai hu tanoh Masir. [45]

⁸Idilo Parao ma si Musa pakon si Aron, nini ma, “Martonggo ma hanima hubani Jahowa ase ipadaoh tohuk in hum bangku pakon hun bangsangku, hulopas pe bangsa in laho manggalang hubani Jahowa.” [46]

⁹Nini si Musa ma dompak Parao, “Uhurmu ma mangkatahon antigan ma tonggohononku ham, juakjuakmu pakon bangsamu, ase ipadaoh tohuk ai hun bamu pakon hun rumahmu; pitah i Bah Nil tumang ma tading.”

¹⁰Nini ma, “Patar ma.” nini si Musa ma, “Songon na hinatahonmu ai ma, ase ibotoh ham, paboa seng dong barang ise na songon Jahowa Naibatanami.

¹¹Maningon misir ma tohuk ai hun bamu, hun rumahmu, humbani juakjuak pakon bangsamu; pitah ibagas Bah Nil mando tading.” [47]

¹²Kaluar ma si Musa pakon si Aron hun lobei ni Parao, jadi dilo-dilo ma si Musa hubani Jahowa halani tohuk, na pinaroh-Ni ai hubani Parao.

¹³Jadi ibahen Jahowa ma songon na hinatahon ni si Musa, marmateian ma tohuk ai hun rumah, hun alaman pakon hun juma.

¹⁴Ipatumpu sidea ma ai margugun-gugun, gabe bau ma tanoh ai.

¹⁵Jadi dob ididah Parao domma hun lunggar, gabe ipahengkeng ma uhurni, seng ra be ia manangihon sidea songon na hinatahon ni Jahowa hinan. [48]

¹⁶Dob ai nini Jahowa ma dompak si Musa, “Hatahon ma hubani si Aron, ʻPagostong ma tungkotmin, pukul ma orbuk ni tanoh in, ase gabe siranggang ma in i sab tanoh Masir.ʼ ”

¹⁷Ibahen sidea ma sonai, ipagostong si Aron ma tanganni pakon tungkotni ai, ipukul ma orbuk ni tanoh ai, gabe marrohan ma siranggang hubani jolma pakon pinahan; ganup orbuk ni tanoh ai gabe siranggang ma i sab tanoh Masir.

¹⁸Ibahen datu ai ma sonai marhitei tabas ni sidea laho parohkon siranggang namin, tapi seng tarpajadi sidea. Jadi isogopi siranggang ai ma jolma pakon pinahan. [49]

¹⁹Nini datu ai ma dompak Parao, “Jadi-jadian ni Naibata do in.” Tapi lanjar hengkeng do uhur ni Parao, seng itangihon hata ni sidea, songon na hinatahon ni Jahowa hinan. [50]

²⁰Dob ai nini Jahowa ma dompak si Musa, “Pagirah ma girah sogod puho laho jongjong i lobei ni Parao, sanggah na laho ia hu bah, anjaha hatahon ma hu bani, ʻSonon do hata ni Jahowa, Lopas ma bangsang-Ku laho, ase isombah sidea Ahu. [51]

²¹Tapi anggo seng ilopas ho bangsang-Ku laho, tonggor ma, parohon-Ku ma hubam, hu juakjuakmu, hu bangsamu pakon hu rumahmu rongit, ase gok rongit rumah ni halak Masir pakon tanoh ianan ni sidea.

²²Marhasurungan ma bahenon-Ku bani ari ai tanoh Gosen ianan ni bangsang-Ku, seng anjai dong ijai rongit, ase itanda ho Ahu do Jahowa i tongah-tongah ni tanoh in. [52]

²³Pajongjongon-Ku ma parbalogan i holangkolang ni bangsang-Ku pakon bangsamu. Patar ma masa tanda ai.ʼ ”

²⁴Jadi ibahen Jahowa ma sonai; roh ma marhulan-hulan rongit, hu rumah ni Parao, hu rumah ni juakjuak ronsi hu sab tanoh Masir; bois tumang do tanoh ai ibahen rongit ai.

²⁵Dob ai idilo Parao ma si Musa pakon si Aron, ihatahon ma, “Ne, galangi hanima ma Naibatanima i tanoh on.”

²⁶Tapi nini si Musa ma, “Lang malo sonai bahenon, ai pantang ni halak Masir do sigalangkononnami hubani Jahowa Naibatanami; tonggor ma, anggo igalangkon hanami pantang ni halak Masir i lobei ni sidea, ai lang pargijigon ni sidea ma hanami bani batu? [53]

²⁷Sihol do hanami laho hu halimisan tolu ari pardalanan daohni, laho manggalang bani Jahowa Naibatanami, songon na hinatahon-Ni hu bennami.” [54]

²⁸Jadi nini Parao ma, “Hulopas pe hanima laho hu halimisan manggalang bani Jahowa Naibatanima, asal ulang madaohtu hanima laho, anjaha tonggohon hanima ahu.” [55]

²⁹Dob ai nini si Musa ma, “Tonggor ma, luar ma ahu hun lobeimu on, anjaha hutonggohon ma hubani Jahowa, ase ipadaoh rongit in patar humbani Parao, humbani juakjuak pakon humbani bangsani, asal ulang be iguak-guaki Parao hanami, marhitei na lang manlopas bangsa in laho manggalang bani Jahowa.”

³⁰Luar ma si Musa hun lobei ni Parao, anjaha martonggo ma ia hubani Jahowa. [56]

³¹Jadi ibahen Jahowa ma songon na hinatahon ni si Musa, ipadaoh ma rongit ai humbani Parao, ididah juakjuak pakon humbani bangsani, sada pe lang na tading.

³²Tapi ipahengkeng Parao do homa uhurni age sahali on, seng ipalopas laho bangsa ai. [57]