Read Batak Simalungun JOB 1 Bible Online

JOB 1 - Batak Simalungun bible

JOB 1

¹Adong ma sapari sada halak i tanoh Us, na margoran si Job; na daulat anjaha na bujur do paruhuran ni halak ai, sada halak sihabiari Naibata, anjaha ipadaoh do uhurni humbani hajahaton. [1]

²Tubuh do bani pitu anak ampa tolu boru. [2]

³Adong do bani pitu ribu biribiri, tolu ribu unta, lima ratus pasang lombu, ampa lima ratus pasang halode boru-boru, ambahni ai buei tumang jabolonni; ia do sisangapan humbani haganup halak na i hapoltakan. [3]

⁴Somal do anakni ai mambahen pesta i rumahni bei, marhorin-horin; isuruh sidea do homa mandilo botou ni sidea sitolu halak ai, laho mangan ampa minum rap pakon sidea. [4]

⁵Anjaha anggo domma salpu pesta ai, isuruh si Job ma mangalopi sidea, laho manguras sidea; ipagirah ma sogod puho, anjaha igalangkon ma galangan situtungon, domu hubani buei ni sidea ganupan. Ai ninuhur ni si Job do, “Atap na mardousa do anakkai, anjaha itundali Naibata ibagas uhurni.” Sonai ma tongtong ibahen si Job. [5]

⁶Bani na sadari roh bei ma anak ni Naibata jongjong hu lobei ni Jahowa, anjaha sibolis ai pe roh do hu tongah-tongah ni sidea. [6]

⁷Dob ai nini Jahowa ma dompak sibolis ai, “Roh hunja do ho?” Nini sibolis ai ma mambalosi Jahowa, “Roh hun paradou-adouan i tanoh ai, roh medang-edang, madou-adou hunjai.” [7]

⁸Ihatahon Jahowa ma hubani sibolis ai, “Ipardiateihon ho do juakjuak-Ku si Job ai? Seng dong songonsi marparuhuran i tanoh ai, daulat, pintor, mabiar mangidah Naibata, anjaha ipadaoh do uhurni humbani hajahaton.” [8]

⁹Nini sibolis ai ma mambalosi Jahowa, “Ai lang na marpambuat do pangkabiari ni si Job ai bani Naibata? [9]

¹⁰Ai lang iramotkon Ham do ia ampa rumahni inggot ampa haganup na dong bani? Horja ni tanganni pe itumpak Ham do manjadi, anjaha na dongni pe martambah do i tanoh ai. [10]

¹¹Tapi porini idurdurhon Ham tangan-Mu laho mambuat haganup na bani ai, mintor buraanni do Ham torang-torang.” [11]

¹²Dob ai nini Jahowa ma dompak sibolis ai, “Tonggor ma, ondos bani tanganmu ma ganup na bani ai, tapi seng bulih dais tanganmu anggo bani sandiri.” Dob ai luar ma sibolis ai hun lobei ni Jahowa.

¹³Dob ai bani na sadari, sanggah mangan anjaha minum anggur anak ampa boruni ai ibagas rumah ni sikahanan ai, [12]

¹⁴roh ma sada suruhan marayak si Job, nini ma, “Maninggala do nongkan horbou ai, anjaha halode boru-boru ai manampal i lambungni.

¹⁵Dob ai roh ma halak Seba mandorab sidea laho mangayob, anjaha itampuli do jabolon-jabolon ai bani podang; pitah ahu mando na maluah mamboan barita bamu.” [13]

¹⁶Sanggah na mangkatahon ai ope ia, roh ma siluk halak na legan mangkatahon, “Madabuh do apuy ni Naibata hun langit, anjaha bois do ipangan apuy ai biribiri ampa jabolon-jabolon ai; pitah ahu mando maluah mamboan barita bamu.” [14]

¹⁷Sanggah mangkatahon ai ope ia, roh ma siluk halak na legan Mangkatahon, “Roh do halak Kasdim tolu hulanan, idorab sidea ma unta ai lanjar iboan; itampuli sidea do jabolon-jabolon ai, pitah ahu mando na maluah mamboan barita bamu.” [15]

¹⁸Sanggah na mangkatahon ai ope ia, roh ma siluk halak na legan mangkatahon, “Tudu mangan pakon minum anggur do anakmu ampa borumu i rumah ni sikahanan ai. [16]

¹⁹Jadi tonggor ma, roh ma halisungsung na marpuyuh-puyuh hun halimisan manondol suhi-suhi ni rumah na ompat ai, gabe idabuhi ma dakdanakmu ai lanjar matei, pitah ahu mando na maluah mamboan barita bamu.” [17]

²⁰Dob ai jongjong ma si Job, irigati ma hiouni anjaha isuhur jambulan ni uluni; manrogop ma ia anjaha martonggo. [18]

²¹Jadi ihatahon ma, “Talanjang do ahu luar hun boltok ni inangku, anjaha talanjang do ahu mulak use. Jahowa do na mambere, Jahowa do na mambuat, pinuji ma goran ni Jahowa.” [19]

²²Ibagas haganupan ai seng mardousa si Job barang marhutuk ia bani Naibata. [20]