Read Batak Simalungun JOB 10 Bible Online

JOB 10 - Batak Simalungun bible

JOB 10

¹“Domma sobalan ahu bani hagoluhan on; hupapuas ma tangis-tangisku, marsahap ibagas hapaeton ni tonduyhu. [130]

²Hatahononku ma hubani Naibata, ʻUlang ma papai Ham ahu! Pabotohkon Ham ma bangku, mase ma gilaan-Mu ahu?

³Ai marguna do Bamu, ase mangarsik-arsik Ham, ase ibuang Ham jadi-jadian ni tangan-Mu, tapi itumpaki Ham riah ni halak parjahat?

⁴Tor parmata songon jolma ma Ham? Tor songon pangidah ni manisia do pangidang-Mu? [131]

⁵Tor songon ari-ari ni manisia simatei-matei ma ari-ari-Mu, barang bilangan ni tahunmu doskon tahun ni sada halak dalahi, [132]

⁶ase sonai pangindahi-Mu bani salahku, anjaha ipareksai Ham dousangku,

⁷age pe domma ibotoh Ham hinan seng parjahat ahu, anjaha seng dong halak na boi paluahkon ahu hun tangan-Mu? [133]

⁸Domma itompa anjaha ijadihon tangan-Mu ahu, gok jengesni, tapi sonari sihol parsedaon-Mu ahu? [134]

⁹Dingat Ham ma na dob binahen-Mu ai ahu humbani tanoh halampung, anjaha paulakon-Mu ma ahu use gabe orbuk? [135]

¹⁰Ai lang domma iuseihon Ham ahu songon dadih, anjaha songon dadih nialhotan ahu ibahen Ham? [136]

¹¹Ihioui Ham do ahu bani hulingkuling pakon sibuk, anjaha isirat Ham ahu marhitei holiholi ampa urat-urat. [137]

¹² Ilayak-layakkon Ham do bangku goluh ampa idop ni uhur, anjaha iramotkon panatap-Mu do ahu. [138]

¹³Tapi iponopkon Ham do on ibagas uhur-Mu, hubotoh sonon do sura-sura-Mu:

¹⁴Anggo mardousa ahu, iingat Ham do ai, anjaha seng paluahon-Mu ahu humbani hajahatonkai. [139]

¹⁵Anggo marsalah ahu, magou ma ahu! Anggo pintor ahu, seng tarpadurgak ahu ulungku, ai domma gok habadoron ahu, paidah-idah sitarononku. [140]

¹⁶Porini pe na padurgak, mintor dorabon-Mu do ahu songon singa, anjaha ulakan-Mu do patuduhkon kuasa-Mu bangku. [141]

¹⁷Mardapot-dapot saksi-Mu idilo Ham manalahkon ahu, anjaha ipaganda Ham ringis-Mu dompak ahu; iparoh Ham do bala mandorab ahu. [142]

¹⁸Mase ma padaraton-Mu ahu hun partapaan? Mase ma lang mintor rotap hosahku, ase ulang dong mata na mangidah ahu? [143]

¹⁹Doskon halak na so ongga adong do ahu, na mintor iusung hun partapaan hu tanoman.

²⁰Ai lang otik do ari-ari ni goluhku? Mahua paturut Ham ma ahu, ase boi marmalas ni uhur ahu tongkin, [144]

²¹paima laho ahu, anjaha seng sinmulak-mulak be, hu tanoh na golap anjaha na lotir, [145]

²²hu nagori na lotir anjaha na geor, na lihar ijai doskon na golap.ʼ ”