Read Batak Simalungun JOB 14 Bible Online

JOB 14 - Batak Simalungun bible

JOB 14

¹“Ia jolma na dob tubuh humbani naboru, otik do umurni, tapi buei do hasunsahanni. [187]

²Songon bunga-bunga do ia pondang, dob ai melus, songon halinoh do parmagouni, seng dong hatotaponni. [188]

³Hape pala ma tatapon-Mu jolma na sonai ai, anjaha iboan Ham ia hu paruhuman, hu lobei-Mu? [189]

⁴Ise ma na boi parohkon sada halak na pansing humbani na mabutak? Sahalak pe lang dong. [190]

⁵Halani domma binuhul ari-arini, anjaha itotapkon Ham bilangan ni bulanni, ibahen Ham balogni, na so bulih sidiparanni, [191]

⁶padaoh Ham ma panonggor-Mu hun bani, ase jumpahan hasonangan ia, ase tarhamalaskonsi ari-arini songon halak gajian. [192]

⁷Adong ope siarapkonon bani hayu, age domma iroboh, martumbor do use, anjaha seng maronti martunas.

⁸Age pe domma matua uratni ibagas tanoh, anjaha matei pe tutuhoni, [193]

⁹mintor martunas do use dobkonsi hona bah, anjaha manranting use songon na baru sinuan.

¹⁰Tapi mateihonsi jolma in, lanjar tibal sonin, anjaha rotapkonsi hosahni, huja be ia? [194]

¹¹Songon bah na manguap hun tao, songon binanga na marsik anjaha horah dobni. [195]

¹²Sonai ma modom manisia, seng be puho, sadokah adong ope langit seng bodak be ia, atap puho humbani na modom. [196]

¹³Ambit ra ma namin Ham mamonopkon ahu i nagori toruh, iondingkon Ham ahu paima mombun ringis-Mu, anjaha ibahen Ham namin buhulni bangku, dob ai mardingat Ham use bangku. [197]

¹⁴Anggo matei sada jolma, tumaram ma ia manggoluh? Ambit tongon sonai, marpangarapan do ahu bani ganup ari-ari ni paruntolonku, paima roh ari ni haluahonku. [198]

¹⁵Anggo mardilo Ham mintor balosanku do Ham, tontu siholan Ham bani jadi-jadian ni tangan-Mu. [199]

¹⁶Jadi bilangan-Mu ma langkah-langkahku, tapi seng pardiateihonon-Mu dousangku. [200]

¹⁷Domma tartokan panlanggaronku ibagas ranjut, anjaha irungkub Ham do hajahatonku. [201]

¹⁸Tapi maningon marumbak do age dolog, anjaha dolog batu mosor humbani iananni, [202]

¹⁹mangkaturtur batu ibahen bah, anjaha bah marbanggal mangayubkon tanoh; sonai do iparseda Ham pangarapan ni jolma in. [203]

²⁰Ipatunduk Ham do ia ronsi sadokah ni dokahni, gabe salpu ia, ipaubah Ham do bohini, dob ai ipalaho Ham ia.

²¹Marmulia pe anakni, seng ipabotoh-botoh, gabe madorun pe sidea, seng iahapkon. [204]

²²Pitah borit ni angkulani mando iahapkon, pasal ia tumang mando itangipkon tonduyni.”