Read Batak Simalungun JOB 15 Bible Online

JOB 15 - Batak Simalungun bible

JOB 15

¹Dob ai nini si Elipas, halak Teman ai ma mambalosi,

²“Patut ma sada halak na maruhur marbalos marhitei habotohon na soya-soya, anjaha ipaburnang dirini marhitei logou na hun purba? [205]

³Patut ma maminsang ia marhitei parsahapan na so marguna, atap marhitei hata na so marhagogohon?

⁴Tapi anggo ho, ilangkon ho do biar dompak Naibata, anjaha iorui ho tonggo i lobei ni Naibata.

⁵Ai hajahatonmu sandiri do mangajari pamanganmu, anjaha ipilih ho do hata ni halak na pantas.

⁶Pamanganmu sandiri manguhum ho, seng ahu; bibirmu sandiri manaksii dompak ho. [206]

⁷Ai ho do jolma na parlobei tubuh? Barang parlobei do ho jadi humbani dolog-dolog? [207]

⁸Ongga do ho manangi-nangi i karapatan ni Naibata, gabe marhiteihon ai marhapentaran ho? [208]

⁹Aha ma na binotohmu, na so binotohnami? Aha ma na niarusanmu, na so niarusannami? [209]

¹⁰Bennami pe dong do halak na dob ubanon anjaha sayur matua, torasan humbani bapamu. [210]

¹¹Hurang maharga do iahap ho pangapohon ni Naibata, barang hata na lamlam na dob ondos bam? [211]

¹²Mase ma ipaboan-boan uhurmu ho, anjaha mase ma jawar-jawar pangkawahmu, [212]

¹³gabe pag ho marringis dompak Naibata, anjaha sonai toal ni parsahap ni pamanganmu?

¹⁴Aha ma jolma manisia ase boi borsih ia? Barang tubuh ni sada naboru, gabe boi bonar ia? [213]

¹⁵Tonggor ma, seng marhatengeran Naibata bani halak na pansing na rap pakon-Si, anjaha langit ai pe seng pansing bani panonggor-Ni. [214]

¹⁶Lambin naha ma dompak sada halak paruhur magou anjaha na masik-masik, jolma na manibur hajahaton songon bah? [215]

¹⁷Sihol patuduhonku do bam, tangihon ma ahu, anjaha barang aha na dob huidah, sihol do baritahononku,

¹⁸ai ma na dob ipatugah halak na pentar, na dob binogeini humbani ompung ni sidea, lang ihurang-hurangi,

¹⁹bani sidea tumang iondoskon tanoh in, anjaha seng dong halak partoloh manginsolat i tongah-tongah ni sidea.

²⁰Sadokah manggoluh halak parjahat parngit do pandageianni, manipat bilangan ni tahun na dob binuhul bani siunsagahkon gogoh. [216]

²¹Sora songgot-songgot maraloling tong ibagas pinggolni; sanggah hadoharonni roh pangagou bani. [217]

²²Seng ihaporsayai, paboa tarbahensi ope maluah hun hagolapan, ai domma itontuhon, sipanganon ni podang mando ia.

²³Sai madou-adou do ia mangindahi sipanganon atap ija do ai. Ai ibotoh, domma sirsir bani ari hagolapan. [218]

²⁴Pusok uhurni ibahen hasunsahan ampa hasosakan; idorab do ia, songon raja na dob gopas hu parporangan.

²⁵Halani na dob pinagostongni ai tanganni mangimbang Naibata, anjaha oga-oga ia dompak Pargogoh Na So Tarimbang ai,

²⁶marpojong ia dompak-Si marhitei borgok na durgak, marhitei gantar na hapal latapni.

²⁷Halani domma iminaki bohini, anjaha inahkon taboh-taboh bani hae-haeni, [219]

²⁸anjaha marianan ia ibagas huta na dob tarulang, ibagas rumah na so patut siianan, na dob tinontuhon sireongkononkon; [220]

²⁹seng anjai bayak ia, seng anjai totap haadonganni, anjaha seng anjai ganda artani i tanoh on.

³⁰Seng anjai maluah ia humbani hagolapan, melus do tumborni ibahen dilah ni apuy, anjaha mapurpur do bungani ibahen logou. [221]

³¹Ulang ma marhatengeran ia bani na lumei, laho paoto-otohon dirini, ai sisoya-soya do upah ni pambahenanni ai.

³²Seng jumpah ope panorangni domma bois ia, anjaha seng ra be ratah dangkahni.

³³Songon hayu anggur mardabuhan buahni, seng mabei ope, anjaha songon hayu jetun mangkarurus bungani. [222]

³⁴Ai seng anjai manggargar ginompar ni halak silupahon Naibata, anjaha boiskonon ni apuy do lampolampo ni halak sijalo sisip. [223]

³⁵Boratan rumah do sidea bani hangaluton, anjaha itubuhkon hamagouan, ijullak-jullakkon uhur ni sidea do sipaoto-oto.” [224]