Read Batak Simalungun JOB 16 Bible Online

JOB 16 - Batak Simalungun bible

JOB 16

¹Dob ai nini si Job ma mambalosi,

²“Domma buei hubogei parsahapan na sonai, pangapoh sigandai hasunsahan do hanima. [225]

³Sadihari pe marujung hata sisoya-soya in? Aha gakni mangonjar uhurmu marbalos sonai bangku? [226]

⁴Ahu pe tarbahen do marhata-hata songon hanima, anggo songon partibalhon partibalnima; buei hata-hata na mantin hatahononku bannima, anjaha mupir-upir ulungku bahenonku bannima. [227]

⁵Tarbahen ahu do patenger uhurnima marhitei pamanganku, anjaha apoh-apoh ni bibirhu palamlam pangahapnima.

⁶Anggo marsahapi ahu, seng lambin lamlamni pangahapanku, anjaha anggo sip ahu, lambin hampungni do?

⁷Tapi sonari, domma ibuat Naibata ganup gogoh humbangku, maseda ganup sindohorhu. [228]

⁸Idorab ham do ahu, gabe hasaksian do ai dompak ahu, iaduhon hamerungonku do ahu songon na boi idahon bani bohingku. [229]

⁹Iparrigat anjaha imunsuhi ringis-Ni do ahu, harat-harat ipon Ia dompak ahu, anjaha imbangku pamarot panonggor dompak ahu. [230]

¹⁰Ipangangang halak do babahni dompak ahu, itompas sidea huyumku marhasoman panreheion, sauhur sidea mangimbang ahu. [231]

¹¹Iondoskon Naibata do ahu bani halak pargeduk, anjaha ipadas do ahu hubagas tangan ni halak parjahat.

¹²Sonang hinan do ahu, tapi sompong do iropukkon ahu; itangkap do borgokku anjaha itompaskon, anjaha ipajongjong do ahu bahen panonjolanni. [232]

¹³Marngongos-ngongos do sior-Ni hun lambungku, anjaha seng maralang-alangan Ia manolpus piah-piahku; iuseihon do pogungku hu tanoh. [233]

¹⁴Martambah-tambah do panluhai-Ni bangku, anjaha idorab do ahu songon pandorab ni puanglima.

¹⁵Domma husorungkon hiou bani angkulangku, anjaha domma hutibalhon gogohku bani orbuk. [234]

¹⁶Bosol do bohingku halani tangis-tangis, anjaha golap do pangidah ni matangku, [235]

¹⁷age pe seng dong longkot hajahaton ibagas tanganku, anjaha pitah do partonggongku. [236]

¹⁸O ale tanoh, ulang rungkub darohku, anjaha ulang ma jumpah parsaranan bani doruh-doruhku. [237]

¹⁹Gari nuan, tonggor ma, i surga do saksingku, anjaha na mangapiti ahu i nagori atas. [238]

²⁰Irehei hasoman-hasomanku do ahu; gok iluh mangkawah do matangku dompak Naibata, [239]

²¹ase iapiti dalahi on i lobei ni Naibata, anjaha ipintori halak on dompak hasomanni.

²²Halani lang piga tahun nari be, seng boi lang, dalananku dalan na so tarulaki be.” [240]