Read Batak Simalungun JOB 19 Bible Online

JOB 19 - Batak Simalungun bible

JOB 19

¹Dob ai nini si Job ma mambalosi,

²“Sadiha dokah on sai pusokannima uhurhu, anjaha ripukonnima ahu bani hata-hata? [262]

³Domma sapuluh hali ahu isalig-saligi hanima, anjaha seng maila hanima mangarsik-arsik ahu.

⁴Porini pe tongon ahu marsalah, ai lang mangonai bangku do salahkai?

⁵Atap sihol hanima mangunsagah dompak ahu, anjaha papintoronnima ahu marhitei panreheion?

⁶Botoh hanima ma, Naibata do na paunduk ahu, anjaha na mangkonahon siding-Ni bangku.

⁷Tonggor ma, hudorakkon pe, ʻPangkilangon!ʼ Tapi seng dong na mambalosi. Mangindo pangurupion ahu, tapi seng dong na mamintori. [263]

⁸Domma irungga dalanku, gabe seng tarbontas ahu, anjaha irungkubkon do hagolapan bani dalanku. [264]

⁹Domma itanggali humbangku hamuliaonku, anjaha domma ibuat sortalingku humbani ulungku. [265]

¹⁰Domma iripuki ahu bani haganup, magou mando ahu, anjaha domma iurbat pangarapanku songon pangurbat-Ni bani sada hayu.

¹¹Domma gajag ringis-Ni dompak ahu, anjaha doskon munsuh-Ni do ahu ihira. [266]

¹²Marsada uhur do marrohan bala-Ni, roh sidea mandorab ahu, anjaha ihubu sidea do lampolampongku inggot. [267]

¹³Seng huidah be saninangku, anjaha seng itandai hasomanku magodang be ahu. [268]

¹⁴Seng itandai sindohorhu be ahu, anjaha domma ihalupahon huan-kuanku ahu. [269]

¹⁵Juakjuakku naboru pe ihira do ahu songon halak, songon halak na legan do ahu iahap sidea.

¹⁶Ia hudilo juakjuakku, seng ibalosi ahu, maningon mangelek-elek mando ahu bani.

¹⁷Oyakon do parinangonku manganggoh hosahku, age saninangku manganggoh baungku. [270]

¹⁸Gari dakdanak pe mandoruni ahu, anggo hehe ahu ipambebeoti sidea do ahu. [271]

¹⁹Magigi do haganup huan-kuanku na sangkan mangidah ahu, anjaha halak na huhaholongi marbalik mangimbang ahu. [272]

²⁰Tardos bani holiholingku mando hulingkuling pakon sibukku, pitah siratanku mando na so hona. [273]

²¹Holong, holong ma uhurnima bangku, nasiam hasomanku, ai domma mangonai tangan ni Jahowa bangku. [274]

²²Mase ipardakdak hanima ahu, songon pardakdak ni Naibata? anjaha seng sobalan ope hanima na mangarsik ahu ai? [275]

²³Ambit isuratkon ma namin hatangkai, anjaha iuhir ibagas pustaha. [276]

²⁴Anjaha ilatapkon namin bani panurat bosi pakon simbora, bani dolog batu bahen pardingatan sadokah ni dokahni.

²⁵ Tapi torang do hubotoh, manggoluh do Sipagoluh ahu, anjaha Ia parpudi jongjong i atas orbuk. [277]

²⁶ Anjaha dobkonsi malantur hulingkulingkon, anjaha tanggal ahu humbani dagingku, idahonku ma Naibata. [278]

²⁷ Tongon, ahu sandiri ma mangidah-Si gabe hatuahonku, matangku sandiri mangidah-Si, seng halak na legan. Itutung-tutung piah-piahku ibagas diringku halani siholni. [279]

²⁸Anggo ihatahon hanima, ʻSonaha ma bahenonta mardakdaksi, anjaha padapot bonsir ni pahara on bani?ʼ

²⁹Marhabiaran ma hanima bani podang, ai mangonai do ringis bani halak siparsalah, ase ibotoh hanima adong do hape Sipanguhum.”