Read Batak Simalungun JOB 2 Bible Online

JOB 2 - Batak Simalungun bible

JOB 2

¹Dob ai bani na sadari use roh bei ma anak ni Naibata jongjong hu lobei ni Jahowa, anjaha sibolis ai pe roh do hu tongah-tongah ni sidea jongjong i lobei ni Jahowa. [21]

²Dob ai nini Jahowa ma dompak sibolis ai, “Roh hunja do ho?” Jadi nini sibolis ai ma mambalosi Jahowa, “Roh hun paradou-adouan i tanoh ai, roh medang-edang hunjai.”

³Dob ai nini Jahowa ma dompak sibolis ai, “Domma ididah ho juakjuak-Ku si Job ai? Ai seng dong halak na marparuhuran songonsi i tanoh ai, daulat, pintor, sada halak na mangkabiari Naibata, anjaha ipadaoh do uhurni humbani hajahaton. Sai tong do ia marsijoloman hubani hadaulatonni, age pe iojur ho Ahu mangagousi, seng marhala.” [22]

⁴Dob ai nini sibolis ai ma mambalosi Jahowa, “Hulingkuling gantih ni hulingkuling. Sagala na dong bani jolma in ra do ia mambere gantih ni hosahni. [23]

⁵Tapi porini idurdurhon Ham tanganmu, laho manjamah holiholini ampa dagingni mintor buraanni do Ham torang-torang.” [24]

⁶Dob ai nini Jahowa ma dompak sibolis ai, “Tonggor ma, ondos hubagas tanganmu ma ia; pitah hosahni ulang kahua.” [25]

⁷Dob ai luar ma sibolis ai hun lobei ni Jahowa, gabe hona puru na parah ma si Job ai ibahen, hubani jampal ni naheini das humbani pakpak ni uluni. [26]

⁸Dob ai ibuat si Job ma sanga-sanga mangkabusi dagingni, lanjar ihundulhon ma dirini ibagas abuan. [27]

⁹Dob ai nini parinangonni ai ma dompaksi, “Sai tong ope marsijoloman uhurmu bani hadaulatonmu? Burai ma Naibata, ase matei ho!” [28]

¹⁰Tapi nini ma dompaksi, “Songon hata ni naboru na lontong do parsahapmu. Domma ijalo hita na matobu humbani Naibata, ia na mapaet seng jaloonta?”Ibagas haganupan ai seng mardousa si Job marhitei parsahapni. [29]

¹¹Jadi dob ibogei hasoman ni si Job haganupan sitaronon na mangonai hubani ai, roh bei ma sidea, ganup humbani iananni bei, si Elipas hun Teman, si Bildad hun Sua ampa si Sopar hun Naama, anjaha manriah ma sidea laho hujai, laho manorih ampa mangapohisi. [30]

¹²Jadi dob itatap sidea ia humbani na daoh, seng itanda sidea be ia, gabe ipagogoh sidea ma sorani tangis-tangis, iparrigat ma hiouni bei, anjaha ipasaburhon sidea ma orbuk dompak babou ampa bani uluni. [31]

¹³Dob ai hundul ma sidea rap pakonsi i tanoh pitu ari pitu borngin dokahni, seng dong na marsahap pakonsi, halani ididah sidea parah ni sidageionni ai. [32]