Read Batak Simalungun JOB 20 Bible Online

JOB 20 - Batak Simalungun bible

JOB 20

¹Dob ai nini si Sopar na hun Naama ma mambalosi,

²“Iojur pingkiranku do ahu marbalos, anjaha margilumbang do ai ibagas diringku.

³Ai hubogei do pangajaran na pahirihon ahu, tapi marbalos do tonduy ai ibagas uhurhu, nini, [280]

⁴ʻAi seng ibotoh ho, humbani sapari nari ope, singgan ni dong jolma inahkon i atas tanoh on,

⁵paboa tongkin tumang do surak-surak ni halak parjahat, anjaha tongkin tumang malas ni uhur ni halak silupahon Naibata?ʼ [281]

⁶Age pe ronsi langit naik gijang ni uhurni, anjaha uluni das bani hombun na i atas ai, [282]

⁷maningon masab do ia songon ginagatni sandiri sadokah ni dokahni, halak na ongga mangidahsi, mangkatahon, ʻAi ija do ia?ʼ [283]

⁸Songon nipi do ia habang, gabe seng jumpah be; masab do ia songon panonggoran borngin. [284]

⁹Mata na ongga mangidahsi, seng idahonni be ia, anjaha iananni hinan pe seng idahonni be ia. [285]

¹⁰Anakni pe maningon mangindo holong atei ni halak na musil, anjaha tanganni sandiri paulakkon na nirampokni. [286]

¹¹Age pe gok hagogohon hinan holiholini, maningon tibal do ai holi rapkonsi ibagas orbuk. [287]

¹²Age pe tobu hajahaton ai ibagas pamanganni, anjaha iponopkon ai i toruh ni dilahni, [288]

¹³isimpan pe ai, anjaha seng ra ia palahohon ai, iongom-ongom pe ai ibagas pamanganni,

¹⁴salih do na pinanganni ai ibagas boltokni, jadi bisa ni ulog darih ibagas dirini. [289]

¹⁵Habayakon na dob binondutni ai, lang boi lang utahkononni use, Naibata sandiri padaratkon ai hun bagas boltokni.

¹⁶Domma ionsop bisa ni ulog darih, gabe dilah ni ulog darih mamunuhsi. [290]

¹⁷Seng bulih ia mangkamalaskon minak na buei, barang manisan atap dadih na mabaor songon bah. [291]

¹⁸Maningon paulakonni buah ni na hinalojahonni, seng bulih bondutonni ai; humbani untung ni partiga-tigaonni, seng jumpahan malas ni uhur ia hunjai. [292]

¹⁹Halani na dob pinisatni anjaha ipaturutni sonin halak na musil, anjaha na nirampasni rumah, na so pinaulini. [293]

²⁰Ai seng ra sombuh uhur hautni ai, anjaha seng tarpaluahsi dirini marhitei artani ai. [294]

²¹Haganup do ibangkuhon hisapni ai, halani ai seng totap hauntunganni.

²²Age pe bayak tumang ia, sai tarsosak do ia, anjaha mangonai do bani hamagouan na gok. [295]

²³Laho manggoki boltokni ai, suruhon ni Naibata do bani gajag ni ringis-Ni ai, anjaha iudankon do ai bahen sipanganonni. [296]

²⁴Maluah pe ia humbani sinjata bosi, sai na tolpuson ni sior tombaga do ia, [297]

²⁵mandarat do sior ai humbani gurungni, ujungni ai mandarat humbani poguni; sogop do bani hagobiron. [298]

²⁶Lotir ni na lotir ipasirsir mamboiskon artani; apuy na so nipagara ni jolma mambondutsi, aha na teba ibagas lampolamponi bois mosog. [299]

²⁷Patalaron ni langit ai do hajahatonni, anjaha tanoh on jongjong mangimbangsi. [300]

²⁸Maningon bobanon ni halak do arta na ibagas rumahni, masab ganup bani ari panringison ni Naibata.

²⁹Ai ma rupei ni halak parjahat humbani Naibata, tean-teanan na tinontuhon ni Naibata bani. [301]