Read Batak Simalungun JOB 21 Bible Online

JOB 21 - Batak Simalungun bible

JOB 21

¹Dob ai nini si Job ma mambalosi, “

²“Tangi ma hanima bani hatangku, ai ma gabe pangapoh bangku hun bannima. [302]

³Sabar ma hanima, ase marsahap ahu, anggo salpu ma ahu marsahap, age pe nunut hanima manrehei.

⁴Bani jolma do ahu na adu-adu ai? Mase ma lang unduk uhurhu? [303]

⁵Dompakkon hanima ma ahu, anjaha hirjat ma, anjaha songom hanima ma pamangannima. [304]

⁶Anggo hudingat ai, jadi gobir do ahu, manorgi ambulu ni angkulangku. [305]

⁷Mase ma manggoluh halak parjahat, das bani na sayur matua anjaha lambin margogoh? [306]

⁸Marsonang-sonang dakdanakni i lambungni, anjaha sombuh paidah-idah ginomparni. [307]

⁹Marsonang-sonang do rumah ni sidea, seng marhabiaran, anjaha seng ongga mangonai simambu ni Naibata bani sidea. [308]

¹⁰Manggargar jonggini, jadi-jadi maranaki lombuni, seng ongga molei.

¹¹Isuruh sidea anakni mardalani doskon hulanan ni biribiri, anjaha manortor-nortori anakni.

¹²Mandoding sidea marpangiring gonrang ampa husapi, anjaha marolob-olob sidea pabogei-bogei tarompit. [309]

¹³Manggoluh sidea ibagas na marsonang-sonang, anjaha ibagas damei tuad sidea hu nagori toruh.

¹⁴Nini sidea dompak Naibata, ʻLaho hun bennami! Seng marosuh hanami pabotoh-botoh dalan-Mu! [310]

¹⁵Ise ma Ia Pargogoh Na So Tarimbang in, ase pabalos-balosannami Ia? Anjaha aha ma untung bennami, anggo martonggoi hanami Bani?ʼ [311]

¹⁶Tonggor ma, lang ibagas tangan ni sidea hadoharon ni sidea. Sai daoh ma humbangku pingkiran ni halak parjahat. [312]

¹⁷Ai gati do mintop suluh ni halak parjahat, anjaha sogop hamagouan bani sidea? Ai gati do iparoh Naibata hinamagou bani sidea ibagas Ringis-Ni? [313]

¹⁸Songon anggala do sidea i lobei ni alogo, anjaha songon omei lapung pinurpurhon ni habahaba. [314]

¹⁹Isimpan Naibata do papani bani ginompar ni sidea. Sai bani sidea sandiri ma namin ai ibalaskon Naibata, ase mangahap sidea ijai. [315]

²⁰Sai sompat ma namin ididah mata ni sidea sandiri hamagouan ni sidea ai, sidea sandiri ma namin minum humbani ringis ni Pargogoh Na So Tarimbang in. [316]

²¹Ai ia ope na sari bani ginomparni, dob matei ia, dobkonsi gok bilangan ni bulanni?

²²Ai jolma do na mangajarhon parbinotohan bani Naibata, Ia, siuhumi parnagori atas? [317]

²³Adong deba na matei ibagas hadoharon, marsonang-sonang anjaha mardamei-damei,

²⁴sanggah gok taboh-taboh angkulani, anjaha gok utok-utok ope holiholini. [318]

²⁵Adong deba nari matei marpusok ni uhur tumang, seng ongga mandai hasonangan.

²⁶Hape rap sidea modom ibagas orbuk, anjaha gilokni manrungkub sidea. [319]

²⁷Tonggor ma, hubotoh do pingkirannima in, ampa sura-suranima na sihol mangodoh ahu.

²⁸Nini hanima, ʻIja do nuan rumah ni halak siparkuasa, anjaha ija do rumah ni halak parjahat?ʼ [320]

²⁹Naha, ai lang ongga isungkun hanima halak sipardalan daoh, anjaha seng tarporsou hanima hasaksian ni sidea ai,

³⁰paboa seng marmara halak parjahat bani ari hamagouan, anjaha bansah sidea bani ari pambalason? [321]

³¹Ise ma na mangkutuksi pasal parlahouni i lobeini? Anjaha ise ma na mambalaskon bani, domu hubani na binahenni ai?

³²Dob itaruhkon ia hu tanoman, ibahen do parjaga bani tanomanni. [322]

³³Lampot marradagan i atasni tanoh himpal ni habungan ai, ganup jolma mangihut hun pudini, anjaha halak na dob parlobei humbani seng tarhira. [323]

³⁴Mase ma nunutonnima mangapoh ahu? Ah, soyani in pangapohnima bangku, anjaha balosnima ai, na so sintong hansa ai.”