Read Batak Simalungun JOB 22 Bible Online

JOB 22 - Batak Simalungun bible

JOB 22

¹Dob ai nini si Elipas na hun Teman ma mambalosi,

²“Mintor dong ma nani guna ni jolma bani Naibata? Lang, bani dirini tumang do marguna halak na maruhur. [324]

³Mintor adong ma tumaram gunani bani Pargogoh Na So Tarimbang in, anggo pintor ho? Atap mintor adong ma untung-Ni hunjai, anggo ipadaulat ho parlahoumu? [325]

⁴Mintor tumaram ma pinsangon-Ni ho anggo halani hadaulatonmu, anjaha masuk hu paruhuman rap pakon ho?

⁵Ai lang banggal do hajahatonmu? Anjaha lang marsibar hasalahanmu?

⁶Ibuat ho do humbani saninamu sikoram lang marhala, anjaha ibuat ho do hiou ni halak na talag-talag. [326]

⁷Bani halak na mandatei seng ibere ho bah, anjaha seng ibere ho sipanganon bani halak na loheian. [327]

⁸Halak simada gogoh do simada tanoh in, anjaha halak na sangap do marianan ijai.

⁹Lumei do halak na mabalu ipalaho ho, anjaha tangan ni halak na tading maetek iripuki ho. [328]

¹⁰Halani ai do ase hona taon siding inggot bam, anjaha mangonai bam songgot-songgot na so niarapkon, [329]

¹¹gabe golap sinalsalmu, gabe aha pe lang ididah ho, anjaha irungkub bah marbanggal ho. [330]

¹²Ai lang i langit pardatas do marianan Naibata? Tonggor ma, bintang sigijangan, gijangni in ai!

¹³Hape nim, ʻAha ma ipabotoh-botoh Naibata? Boi ma Ia manguhum hun hombun na golap ai? [331]

¹⁴Hombun do na manrungkubsi, gabe lang boi Ia mangidah; mardalan bani lopah ni langit do Ia.ʼ [332]

¹⁵Sihol mandalani dalan sinabasaia do ho, na dob nidalanan ni halak parjahat, [333]

¹⁶na niraseihon i lobei ni panorang ni sidea, anjaha bah marbanggal mangayubkon palasni? [334]

¹⁷Na mangkatahon bani Naibata, ʻLaho hun bennami!ʼ ampa, ʻAha ma na boi bahenon ni Pargogoh Na So Tarimbang in bennami?ʼ [335]

¹⁸Hapeni namin, Ia do manggoki rumah ni sidea bani na madear. Tapi daoh ma humbangku pingkiran ni parjahat. [336]

¹⁹Idahon ni halak parpintor ma ai, gabe malas uhurni, anjaha halak na so marpipot manrehei sidea. [337]

²⁰Tongon, domma rasei hape imbangta, anjaha tading-tadinganni bois ipangan apuy. [338]

²¹Mahua mardear ma ho pakon Naibata, ase mardamei ho, marhitei ai gabe sogop pasu-pasu bam.

²²Sai jalo ma pangajaran humbani pamangan-Ni, anjaha parimbagaskon ma hata-Ni. [339]

²³Anggo martoruh ni uhur ho mulak bani Pargogoh Na So Tarimbang in, anjaha ipadaoh ho hagedukon ai hun lampolampomu, [340]

²⁴anggo iambungkon ho omas ai hubagas orbuk, ampa omas na hun Opir ai hu tongah-tongah ni batu na ibagas binanga, [341]

²⁵anjaha anggo Pargogoh Na So Tarimbang in ma gabe omas bam, pakon gabe arta pirak bam, [342]

²⁶tongon, gabe marmalas ni uhur ma ho ibagas Pargogoh Na So Tarimbang in, anjaha boi dirgak mangkawahkon Naibata. [343]

²⁷Martonggo ma ho hu Bani, jadi tangihonon-Ni ma ho; anjaha galari ma bagah-bagahmu. [344]

²⁸Atap aha pe isurahon ho, jadi ma ai, anjaha na lihar ma manondangi dalanmu ganup. [345]

²⁹Ai Naibata do patoruh sigijang uhur, tapi iurupi do halak sitoruh uhur. [346]

³⁰Ia do paluahkon halak na so marpipot; anjaha ho pe boi do maluah marhitei haborsihon ni tanganmu.” [347]