Read Batak Simalungun JOB 24 Bible Online

JOB 24 - Batak Simalungun bible

JOB 24

¹“Mase ma nani lang idalankon Pargogoh Na So Tarimbang in panorang paruhuman? Mase ma lang ididah na mananda-Si ari panguhumon-Ni? [356]

²Sai ipaosor halak parjahat do parbalogan, irampas do hulanan ni pinahan anjaha iparmahan songon rupeini. [357]

³Ialai sidea do halode ni na tading maetek, ipasikoramkon sidea lombu ni na mabalu. [358]

⁴Ijullakkon do halak na musil humbani dalan, na madorun i nagori ai marsiponopkon dirini bei. [359]

⁵Tonggor ma, songon halode harangan i halimisan laho sidea bani horja ni sidea, pindah-pindah bani sipanganon; humbani tanoh hondot jumpahan sipanganon sidea bani anakni.

⁶Borngin isabi sidea juma ni halak, anjaha buat-buat sidea hun pohon anggur ni parjahat.

⁷Talag, seng marhiou, ipapodom sidea dirini, anjaha seng marsabing sidea bani borgoh ni ari.

⁸Taptap sidea ibahen udan dolog, dolog batu ipangunsandei, halani seng dong panisioanni.

⁹Irampas sidea do na tading maetek hun abingan ni inangni, anjaha igadeihon dakdanak ni halak na musil.

¹⁰Talag-talag do sidea laho, seng marhiou; anjaha age pe loheian itarui do radean. [360]

¹¹Maningon i holangkolang ni tembok sidea mamoroh minak, ibagas pangilangan anggur sidea marhorja, anjaha horahan sidea. [361]

¹²Humbani huta ai tarbogei orong-orong ni halak na laho matei, anjaha dilo-dilo tonduy ni halak na ugahan bani pangurupion, tapi lang itangihon Naibata tonggo ni sidea.

¹³Adong do halak na legan gabe imbang ni na siang, seng itanda sidea dalan ni Naibata, anjaha seng totap sidea bani dalanni ai. [362]

¹⁴Marayak siang ari jongjong ma halak pamunuh, laho mamunuh halak na musil ampa halak na masombuh, anjaha borngin suruk-suruk songon panangko.

¹⁵Halak parbangkis paimahon samon ari, nini uhurni, ʻSeng dong na mangidah ahu!ʼ Palegan rupa do ia. [363]

¹⁶Masuk do ia ibagas golap ari hu rumah, ia arian i rumah do sidea marhurung; seng iharosuhkon sidea na lihar. [364]

¹⁷Na lotir ai do sogod bani sidea, ai marhuan-kuan do sidea pakon songgot-songgot na ibagas na golap ai,

¹⁸podas do sidea lintun marayak siang ari. Hona papa do parbagianan ni sidea i tanoh in, seng dompakkononni be pohon anggurni. [365]

¹⁹Songon logou ni ari ampa milas ari mambahen sintak bah salju, sonai do nagori toruh bani halak pardousa.

²⁰Lupahonon ni abingan ni inangni do ia, pampanganon ni gilok-gilok, anjaha seng dong be na mardingatsi; ripukkononkon do hajahaton ai songon hayu.

²¹Ihilang sidea naboru na lambang, anjaha seng layak bani naboru na mabalu.

²²Tapi tene sai ipaganjang Naibata do goluh ni halak parkuasa marhitei gogohni; jongjong do sidea use sanggah sosak goluh ni sidea.

²³Ibere do bani hatotapon, itungkoli do sidea; tapi ipardiatei panonggorni do dalan ni sidea.

²⁴Tongkin timbul do sidea, hape tongkin nari domma mogap; matei do sidea songon halak na legan; isabi do sidea songon buyur ni omei.

²⁵Anggo seng sonai, ise ma na pag mangkatahon seng sintong hatangku, anjaha manlangkon hatangku?”