Read Batak Simalungun JOB 26 Bible Online

JOB 26 - Batak Simalungun bible

JOB 26

¹Dob ai nini si Job ma mambalosi,

²“Dear ni pambahenmin tene, mangurupi halak na so margogoh, anjaha itungkol ho do tangan na so margolle!

³Dear ni pamodahimin bani halak na hurang uhur, anjaha bueini in pingkiran na bagas ipabotohkon ho!

⁴Ise do na pabotohkon parsahapan on bam? Anjaha tonduy ni ise do na luar humbam?

⁵Mangidah-Si gobir do tonduy ni na dob matei, na i toruh ni laut bolag ampa na mangingani ai.

⁶Tidak do nagori toruh i lobei ni Naibata, anjaha urung habeguon seng martutup. [370]

⁷Ia do na paherbangkon langit parutara i atas ni na lumei, anjaha Ia do manggantungkon tanoh i atas ni na lang. [371]

⁸Ia do na manampin bah ibagas hombunni, anjaha seng marigat hombun ai ibahen. [372]

⁹Ia do na manrungkub bohi ni paratas-Ni, anjaha ipaherbang i atas ni hombun-Ni.

¹⁰Ia do mamasuk parbalogan ni bah inggot, tontang parbalogan ni na siang pakon na golap. [373]

¹¹Rebad-rebad do tiang ni langit, anjaha songgotan halani ondam-ondam-Ni.

¹²Ipaminop do laut marhitei hagogohon-Ni, anjaha marhitei hapentaran-Ni ipatunduk Rahab. [374]

¹³Marhitei hosah ni siang ibahen langit, anjaha tanganni mamantom ulog na lingkat. [375]

¹⁴Tonggor ma, sisi ni dalanni tumang ope in, anjaha sada husip tumang ope na binogeita in hun Bani. Ise ma na mangasup mangarusi longgur ni hagogohonni ai?” [376]