Read Batak Simalungun JOB 27 Bible Online

JOB 27 - Batak Simalungun bible

JOB 27

¹Dob ai inunut si Job ma mangkatahon hatani, nini ma,

²“Songon sintongni manggoluh Naibata, na mambuat humbangku hapintoronku, Pargogoh Na So Tarimbang in, na mambahen paet tonduyhu, [377]

³sadokah ibagas ahu ope hosahku, anjaha hosah na humbani Naibata ibagas igungku, [378]

⁴seng anjai bibir ni pamanganku mangkatahon na so tongon, barang pamanganku pe mangkatahon sipaoto-oto. [379]

⁵Antigan pe lang ra ahu mangkatahon paboa sintong hanima; ronsi matei ahu hupartahankon, paboa seng dong salahku. [380]

⁶Poltik do hujolom hapintoronku, seng paluahonku ai; seng pala isolsoli uhurhu ahu age sada, pasal ari-ari ni goluhku. [381]

⁷Songon na bani halak parjahat ma namin mangonai bani munsuhku, anjaha songon bani halak pargeduk ia imbangku.

⁸Ai aha ma pangarapan ni halak parjahat, anggo itarik Naibata hosahni? [382]

⁹Tumaram ma tangihonon ni Naibata doruh-doruhni, anggo roh hasosakan bani? [383]

¹⁰Mintor boi ma ia marmalas ni uhur mangidah Pargogoh Na So Tarimbang in? Mintor tarbahensi ma tongtong martonggo bani Naibata? [384]

¹¹Ahu ma mangajari hanima pasal pambahenan ni Naibata; seng ponopkononku bannima sura-sura ni Pargogoh Na So Tarimbang in. [385]

¹²Hanima pe namin domma ididah hanima sandiri ai. mase ma sai inunut hanima mangkatahon na soya-soya? [386]

¹³On do rupei na pinatongon ni Naibata bani jolma parjahat, ampa tean-teanan na jinalo ni halak siunsagahkon gogoh humbani Naibata. [387]

¹⁴Anggo tambah dakdanakni, panganon ni podang do ai, anjaha ginomparni hurangan sipanganon. [388]

¹⁵Simasimani na tading ai buaton ni sampar do, anjaha seng tangisan ni na mangkabaluhon sidea ai sidea. [389]

¹⁶Ipagukguk pe pirak songon orbuk bueini, anjaha ipatumpu pe pakeian songon tanoh halampung bahatni, [390]

¹⁷ipatumpu do tongon, tapi halak parpintor do na marhiouhon ai, anjaha halak na so marpipot marbagi pirakni. [391]

¹⁸Rumahni ipauli doskon rumah ni lawah-lawah, songon sopo-sopo, na pinauli ni halak parjaga.

¹⁹Bayak do ia laho modom, tapi seng tarulakisi be, ipabodak matani, hape aha pe seng dong be. [392]

²⁰Songgot-songgot do mandorabsi songon bah marbanggal, anjaha halisungsung manluahonsi borngin. [393]

²¹Habahaba na hun purba do mamboansi, anjaha ipurpurhon ia daoh humbani iananni. [394]

²²Seng maralang-alang ipanahkon Naibata sior-Ni bani, maningon podas ia maporus manlembangi tangan-Ni.

²³Martopap tangan ma halak halanisi, anjaha marsiul-siul halak humpudini.” [395]