Read Batak Simalungun JOB 28 Bible Online

JOB 28 - Batak Simalungun bible

JOB 28

¹“Tongon, adong do tambang pirak, pakon ianan papitahkon omas.

²Hun bagas tanoh do ibuat bosi, anjaha batu ilobur mambuat tombaga.

³Hagolapan ai pe talu do ibahen jolma, ipareksa do das hubani sibagasan batu na ponop ibagas na golap ampa ibagas na lotir sahalian.

⁴Ihurak sidea do lubang hu toruh, na daoh sirang humbani ianan ni jolma; gantung sidea seng marsidogei-dogeian, daoh humbani jolma mambung-ambung sidea.

⁵Ia tanoh, harohan ni sipanganon do in, tapi partoruhni ai marbalik ibahen songon pambahen ni apuy. [396]

⁶Marisi mata intan sapir do batu-batuni ampa marisi omas homa.

⁷Dalan hujai seng ibotoh manuk-manuk panoroh, anjaha seng ididah mata ni haluhuy ianan ai.

⁸Seng ongga idogei nahei ni binatang ai, anjaha seng ibontas singa. [397]

⁹Dolog batu pe ijolom tangan ni jolma do, anjaha marbalik onjolan ni dolog ibahen.

¹⁰Ituhak do dalan ibagas dolog batu, anjaha matani mangidah ganup barang na maharga.

¹¹Ibongbong do sumbul ni bah, anjaha na ponop sahalian ipadarat bani na lihar. [398]

¹²Tapi hapentaran ai ija do boi jumpahon ai? Anjaha ija do nani ianan ni pangarusion? [399]

¹³Seng ibotoh jolma in dalan hujai, anjaha seng jumpah ai i tanoh ni halak na manggoluh on. [400]

¹⁴Nini luhung, ʻSeng ibagas ahu ia.ʼ Laut mangkatahon, ʻSeng i lambungku ia.ʼ [401]

¹⁵Seng tarboli ai age marhitei omas pitah, anjaha pirak pe seng boi pakeion pambolini. [402]

¹⁶Seng tarboli ai bani omas Opir, barang bani batu soham atap sapir pe. [403]

¹⁷Omas barang kasa seng boi bahenon hadosanni, anjaha seng boi tukaran ai bani barang omas na majenges.

¹⁸Seng tarpados simatah pakon kristal hujai; harganan do hapentaran ase mutiha. [404]

¹⁹Batu intan na hun Etiopia pe seng tarpados hujai, anjaha seng tarasam ai bani omas pitah. [405]

²⁰Hunja do anggo sonai harohan ni hapentaran ai? Anjaha ija do ianan ni pangarusion? [406]

²¹Lingod do ai humbani panonggor ni ganup halak na manggoluh, anjaha ponop humbani manuk-manuk na i awang-awang.

²²Nagori toruh pakon hamatean mangkatahon, ʻDomma ibogei hanami namin burintikni.ʼ [407]

²³Naibata do na mambotoh dalan hujai, anjaha Ia do na mambotoh iananni. [408]

²⁴Ia do na manatap ronsi ujung ni dunia on, anjaha ididah do ganup na itoruh ni langit.

²⁵Sanggah na binahen-Ni ai timbangan ni logou, anjaha tinontuhon-Ni ai ukuran ni bah, [409]

²⁶sanggah binahen-Ni ai aturan pasal udan, anjaha itontuhon pardalan ni hilap, [410]

²⁷ijai do ai ididah anjaha ipatorang, ipajonam anjaha itulimati. [411]

²⁸Tapi anggo bani jolma in, sonon do nini, ʻTonggor ma, biar mangidah Jahowa do hapentaran, anjaha surut humbani hajahaton do pangarusion.ʼ ” [412]