Read Batak Simalungun JOB 29 Bible Online

JOB 29 - Batak Simalungun bible

JOB 29

¹Dob ai inunut si Job ma mangkatahon hatani, nini ma,

²“Ah, ambit songon bani bulan-bulan sinabaruon ondi ma namin partibalhu, songon bani panorang sanggah Naibata manramotkon ahu,

³sanggah na gara ope suluh-Ni i babou ni ulungku, anjaha ibagas sinalsal-Ni hudalani na golap, [413]

⁴songon panorang haposoonku ondi, sanggah na ihasomani Naibata ope ahu ibagas lampolampongku; [414]

⁵sanggah na rapkon ahu ope Pargogoh Na So Tarimbang in, sanggah na marloulou ope dakdanakku bangku;

⁶sanggah na marparidian dadih ondi naheihu, anjaha dolog batu na i lambungku marjullak-jullakkon bah minak bangku. [415]

⁷sanggah na luar baru on ahu hu horbangan ni huta in, anjaha husuruh na pasirsirhon hundulanku ibagas tiga, [416]

⁸marponop parana-parana dob ididah ahu, anjaha halak partua hehe lanjar jongjong; [417]

⁹maronti raja-raja marsahap, anjaha marsisongom pamanganni bei, [418]

¹⁰sip sora ni na sangap-sangap, anjaha dilahni longkot bani langit-langitni. [419]

¹¹Pinggol na mambogei sorangku, mangkatahon sangap ahu, anjaha mata na mangidah ahu, mangakui ahu bujur, [420]

¹²halani hupaluah do halak na masombuh, na mangindo pangurupion, pakon na tading maetek, na so adong pangadu-aduanni. [421]

¹³Jadi pasu-pasu ni halak na sihol magou sogop hu bangku, anjaha uhur ni naboru na mabalu marolob-olob hubahen.

¹⁴Hapintoron do husorungkon, gabe hiou do ai bangku; habonaron jadi baju ampa gotong-gotong do ai bangku. [422]

¹⁵Gabe mata do ahu bani halak na mapitung, anjaha nahei bani halak na tempang. [423]

¹⁶Bapa do ahu bani halak na musil, anjaha parkara ni halak na so hutandai pe hupajorei do. [424]

¹⁷Huropangi do ipon ni halak parjahat, anjaha rampasanni husontapkon hun pamanganni. [425]

¹⁸Halani ai nini uhurhu do, ʻBani asarhu do ahu matei, anjaha pabueionku ari-aringku songon horsik.

¹⁹Mangumparpar do uratku bani bah, anjaha namuron do rantingku borngin. [426]

²⁰Tongtong do ratah hasangaponku i lambungku, anjaha ganda gogoh ni siorhu ibagas tanganku.ʼ [427]

²¹Tangi do halak bangku, anjaha tarpaima-ima, anjaha sip mambogei hatoranganku.

²²Dob marsahap ahu seng dong be na mansual, manjalir do hatangkai bani sidea. [428]

²³Tarpaima-ima do sidea bangku songon bani udan, anjaha ipangangang sidea do pamanganni songon sabah langit na mangkasiholhon udan. [429]

²⁴Basar do ahu bani sidea sanggah mandolei sidea, anjaha minar ni bohingku seng ihirjati sidea. [430]

²⁵Anggo martandang ahu bani sidea, hampit luluan do ahu hundul, songon raja hundul i tongah-tongah ni balani, songon halak siapohi na marhoru ni uhur.”