Read Batak Simalungun JOB 3 Bible Online

JOB 3 - Batak Simalungun bible

JOB 3

¹Dob sonai ibuha si Job ma pamanganni anjaha iburai ma ari partubuhni. [33]

²Nini ma mangkatahon,

³“Masab ma lah namin ari partubuhku, ampa borngin ai na mangkatahon, ʻDomma solat sada anak dalahi.ʼ [34]

⁴Golap ma lah, ari ai! Ulang ma namin ipindahi Naibata na i babou ai, barang marsinalsal panondang bani. [35]

⁵Sai idorab hagolapan ampa halotiron ma namin ai. Sai irungkub hombun mangitom, anjaha isonggoti samon arian.

⁶Borngin ai, sai halotiron ma namin manrampas ai! Ulang ma namin marmalas ni uhur ai i tongah-tongah ni ari ni tahun, ulang ma namin masuk hira hubagas bilangan ni bulan.

⁷Borngin ai, borngin na lang martuah ma namin ai; ulang ma namin tarbogei sora olob-olob ijai.

⁸Sai hona papa ma namin ai ibahen sipapai ari, na mambotoh mamuhoi naga. [36]

⁹Sai sogop ma namin bintang buha siang arini; tarpaima-ima namin bani na siang, tapi lang jumpahan, anjaha ulang ma namin ongga ididah sibalik huning, [37]

¹⁰halani lang itutup labah ni partapaan bangku, anjaha lang iponopkon sitaronon hun matangku.

¹¹Mase ma lang matei ahu tubuhkonsi, rotap namin mintor hosahku mandaratkonsi hun partapaan? [38]

¹²Mase ma mintor sirsir abingan manjalo ahu, ampa adop gabe boi ahu minum? [39]

¹³Ambit lang sonai namin, tibal ma ahu sonari marsaran, modom ahu marsonang-sonang,

¹⁴rapkon raja-raja ampa parkuasa ni dunia on, sipauli tugu bani dirini sidea,

¹⁵barang rapkon halak na sangap sibuei omas, na manggoki rumahni bani pirak.

¹⁶Barang mase ma lang ahu namin songon anak na lang gokan umur, na tinanomkon, songon na etek-etek na lang ongga mangidah na siang? [40]

¹⁷Ijai maronti ma halak parjahat oga-oga, ijai marsaran ma halak na bois gogohni. [41]

¹⁸Ijai sonang ma halak na tartutup, lang tangaronni be sora ni mandur.

¹⁹Ijai sarupa do halak na etek pakon na banggal, anjaha mardeka do jabolon humbani tuanni.

²⁰Mase ma ibere na siang bani halak na masombuh, pakon hagoluhan bani halak na marhoru?

²¹Na siholan bani hamatean, tapi lang roh, na mangindahi ai lobih humbani halak sipindahi ponopan; [42]

²²halak na marmalas uhur, na marolob-olob tene, porini jumpahsi tanoman,

²³mase ma ibere na siang bani halak na ponop dalanni, na dob hona rungga ibahen Jahowa? [43]

²⁴Ai hoih-hoih do sipanganon siap ari bangku, anjaha tangis-tangisku mabaor songon bah. [44]

²⁵Ai na huhabiari, ai do sogop bangku, anjaha na huharusakkon, ai do mangonai bangku. [45]

²⁶Seng dong bangku damei, lang homa sonang ahu; seng dong parsaranan bangku, marrohan tong hasunsahan.” [46]