Read Batak Simalungun JOB 31 Bible Online

JOB 31 - Batak Simalungun bible

JOB 31

¹“Domma marpadan ahu pakon matangku, seng anjai mangkawah ahu dompak anak boru. [448]

²Aha do nani rupei bereon ni Naibata na i atas in, barang parbagianan bahenon ni Pargogoh Na So Tarimbang hun nagori atas?

³Ai lang hamagouan do bani halak pargeduk, anjaha hasedaon bani sihorjahon hajahaton?

⁴Seng nani ididah Naibata dalanku, anjaha na so ihira do nani ganup langkah-langkahku? [449]

⁵Ambit marsipakulah-kulah namin parlahouhu, anjaha naheihu mangolos mangkorjahon sipaoto-oto,

⁶itimbang ma namin ahu bani timbangan na sintong, tontu akuon-Ni ma, na so marsalah ahu. [450]

⁷Anggo manlembang langkah-langkahku humbani dalan hasintongan, iihutkon uhurhu rosuh-rosuh ni matangku, anjaha longkot bani tanganku habadoron, [451]

⁸halak na legan ma mangankon na hutidahkon, anjaha iorbati na dob husuan. [452]

⁹Anggo ongga tartarik uhur hubani sada naboru, anjaha mangonggopi ahu i lambung labah ni hombar rumahku,

¹⁰parinangonku ma panduda bani halak na legan, anjaha halak na legan mambangkisisi. [453]

¹¹Ai pantang do na sonai ai, tongon, hajahaton na patut siuhumon ni panguhum. [454]

¹²Ai apuy do ai, na manggagat ronsi nagori toruh, anjaha talup mammosogkon ganup na husari. [455]

¹³Anggo ongga lang pintor hubahen bani juakjuakku dalahi barang naboru, ai ma sanggah marsalisih sidea pakon ahu, [456]

¹⁴aha ma na sihol bahenonku porini roh Naibata? Anggo ibahen parturiakan, aha ma balosku Bani?

¹⁵Ai lang Ia, na manjadihon ahu i partapaan do homa na manjadihonsi? Ai lang lanjar sasadasi do na manjadihon hanami ibagas partapaan? [457]

¹⁶Anggo ongga lang hubere pangindoan ni halak na musil, atap motei-otei hubahen mata ni naboru na mabalu, [458]

¹⁷atap sahalak ahu mangankon rotingku, anjaha seng dihut na tading maetek mangankon ai,

¹⁸ai humbani haposoonni ahu do na songon bapani na pagodangkonsi, anjaha humbani partapaan ni inangni ahu do na mangiring-iringsi; [459]

¹⁹anggo ongga huidah sada halak lajang-lajang lang marhiou, barang sada halak na musil lang marsiluban, [460]

²⁰anggo lang hupamalas binongeini, anjaha anggo lang malas ia halani bobak ni biribiringku, [461]

²¹anggo ongga mangonai tangan ahu bani sada halak na tading maetek, halani adong huidah na mangurupi i horbangan, [462]

²²tanggal ma lah abarangku humbani sasapku, anjaha tanganku sirang humbani ringringni.

²³Ai mabiar do ahu tong bani uhum ni Naibata, anjaha seng tahan ahu mangkawahkon hatunggungon-Ni. [463]

²⁴Anggo ongga omas hubahen pangarapanku, anjaha dompak omas pitah ningku, ʻHo do hatengerankuʼ; [464]

²⁵anggo ongga marmalas uhur ahu, halani buei artangku, barang buei na sinari ni tanganku; [465]

²⁶anggo ongga hukawah-kawahkon mata ni ari sonaha parsinalsalni ai, barang bulan sanggah bani rondangni mardalan, [466]

²⁷gabe tartarik uhurhu marponop-ponop, anjaha husummah tanganku padaskon sombahku; [467]

²⁸hajahaton do on, talup siuhumon ni panguhum, ai domma huparnalang Naibata na i atas ijai. [468]

²⁹Anggo ongga marsombuh-sombuh ahu mangidah hamagouan ni munsuhku, barang marolob-olob ahu anggo maseda ia, [469]

³⁰seng ongga hulopas pamanganku mardousa marhitei na mangindohon ase matei hona papa ia. [470]

³¹Anggo seng isaksihon hasomanku na salampolampo: Ise na so bosur binahen ni guleini? [471]

³²Seng ongga marborngin panginsolat i alaman; huungkab do labahku bani halak pardalan-dalan. [472]

³³Anggo ongga hurungkub dousangku, ase ulang ididah halak, barang huponopkon hajahatonku ibagas uhurhu, [473]

³⁴halani mabiar ahu mangidah halak na mabuei, anjaha gobir ahu bani pangapasion ni jolma marsundut-sundut, gabe sip ahu anjaha seng luar hun rumah. [474]

³⁵Ah, ambit adong ma namin sada halak na ra mambogei hatangku. Tonggor ma, tanda tanganku! Ibalosi Pargogoh Na So Tarimbang in ma namin ahu! Ah, ambit dong ma namin pangaduan na sinurat ni imbangku dompak ahu! [475]

³⁶Tongon, sai tampeihononku do ai i atas abarangku, anjaha sangkutkononku bangku songon sortali. [476]

³⁷Patorangonku ma sada-sada langkahku Bani, anjaha doskon raja adaponku Ia.

³⁸Anggo doruh-doruh jumangku mangaduhon ahu, anjaha ganup noranni tangis-tangis;

³⁹anggo hupangan gogohni seng margalar, anjaha simadasi hulopas matei loheian, [477]

⁴⁰dear ma tubuh bangku duri gantih ni gandum, barang poyon-poyon gantih ni jagul.” Marujung ma sahap ni si Job.