Read Batak Simalungun JOB 32 Bible Online

JOB 32 - Batak Simalungun bible

JOB 32

¹Dob ai maronti ma sitolu halak ai marsahap pakon si Job, halani sai ipintori dirini.

²Jadi gajag ma ringis ni si Elihu, anak ni si Barakel, halak Busi ai, humbani ginompar ni si Ram; manringis tumang do ia bani si Job, halani sai ipintori dirini i lobei ni Naibata. [478]

³Manringis homa do ia bani huan-kuan ni si Job sitolu halak ai, halani seng tarbalosi sidea si Job, age pe domma ipatorang sidea parsalah do si Job. [479]

⁴Ai domma ngolngolan hinan si Elihu laho mangkatahon hatani hubani si Job, halani torasan halak ai humbani.

⁵Tapi dob ididah si Elihu lang tarbalosi sitolu halak ai si Job, manringis tumang ma ia.

⁶Dob ai nini si Elihu, anak ni si Barakel, halak Busi ai ma Mambalosi, “Poso ope namin ahu, tapi nasiam domma ubanon, halani ai malang anjaha mabiar do ahu patorangkon pingkiranku bani nasiam. [480]

⁷Ningku ibagas uhurhu, ʻNa matua ma lobei mangkatahon hatani, anjaha sigijangan umurni mangajarhon hapentaran. [481]

⁸Tapi tonduy na ibagas jolma in, ai ma hosah ni Pargogoh Na So Tarimbang in, ai ma mambere pangarusion bani. [482]

⁹Seng sai halak na matua tong sipentaran, anjaha seng halak na ubanon tong na mambotoh na sintong.ʼ [483]

¹⁰Halani ai do ase huhatahon, ʻTangar nasiam ma ahu, sihol do homa patugahonku hapentaranku. [484]

¹¹Tonggor ma, domma ngolngolan ahu paima-imahon hata nasiam, sai hupatangi-tangi do sipaingat nasiam, paima jumpah nasiam balos na hona.

¹²Huparimbagaskon do namin hata nasiam ai, hape, tonggor ma, seng dong na mantaluhon si Job, seng dong humbani nasiam, na mambalosi hatani.

¹³Ulang ma ninuhur nasiam, domma jumpah hanami hapentaran; Naibata ma na manaluhonsi, jolma seng mangasup.

¹⁴Seng dompak ahu hatani na hinatahonni ai, anjaha seng marhitei sahap nasiam ai ia balosanku.

¹⁵Domma humationg, seng tarbahen be marbalos, domma jut sidea mangkatahon sihatahononni.

¹⁶Mintor soh ma ahu, halani na so marsahap ai be sidea, halani na jonong ai sidea jongjong, lang marbalos?

¹⁷Ahu pe sihol marbalos do, ahu pe sihol do patugahonku pingkiranku. [485]

¹⁸Ai domma gok bangku sahap, sai iajar tonduy na ibagas ahu do ahu.

¹⁹Tonggor ma, doskon anggur na so binuha do tontonku, doskon gusi bobak na baru na sihol pultak. [486]

²⁰Halani ai maningon marsahap do ahu, ase luas huahap, maningon buhaanku do bibirhu laho marbalos.

²¹Seng martonggor jumbak ahu, barang sihol mamuji-muji atap ise.

²²Ai seng hubotoh naha palemes-lemes parsahapan, halani anggo sonai, tontu podas do ahu masab ibahen Sitompa ahu.” [487]