Read Batak Simalungun JOB 33 Bible Online

JOB 33 - Batak Simalungun bible

JOB 33

¹“Tapi, tangar ham ma sahapkon, ale Job, bogei ma ganup hatangku! [488]

²Tonggor ma, domma huungkab pamanganku, domma marsahap dilahku ibagas pamanganku.

³Humbani bujur ni uhurhu do huhatahon hatangkon, anjaha torang patugahon ni bibirhu parbinotohan.

⁴Tonduy ni Naibata do na dob manjadihon ahu, anjaha hosah ni Pargogoh Na So Tarimbang do pagoluhkon ahu. [489]

⁵Anggo boi ibahen ham, balosi ham ma ahu; dear ma balosi ham ahu, marugas ma ham. [490]

⁶Tonggor ma, songon ahu sonai do ham i lobei-lobei ni Naibata, ahu pe humbani sangkimpal tanoh halampung do ijadihon. [491]

⁷Tonggor ma, ulang pala mabiar ham mangidah ahu, seng borat pangodohkonku bamu. [492]

⁸Nimu nongkan hubogei, anjaha sora ni hatamu hutangar,

⁹ʻBorsih do ahu, seng marpipot; pitah do ahu, anjaha seng dong hajahaton ibagas diringku. [493]

¹⁰Tonggor ma, na mangindahi sindir do Ia dompak ahu, munsuh-Ni do ahu ihira. [494]

¹¹Inahkon do naheihu hubagas bayangan, anjaha itulimati do ganup dalanku.ʼ [495]

¹²Tonggor ma, ibagas on ma lang bujur ham, ai ma balopku bamu. Banggalan do Naibata ase jolma.

¹³Mase ma marhutuk ham dompak-Si, nimu, ʻSada pe lang humbani hatangkai na ibalosi!ʼ [496]

¹⁴Ia Naibata, tongon marsahap do Ia sahali dua hali, seng iparimbagaskon jolma. [497]

¹⁵Marhitei nipi, marhitei panonggoran borngin, sanggah renges jolma modom, sanggah modom-modom bani podomanni, [498]

¹⁶ijai do iungkab pinggol ni jolma, anjaha ihirjati sidea marhitei lumba-lumba-Ni, [499]

¹⁷laho paholangkon jolma humbani hasalahan, laho manjora jolma humbani pangenjengon, [500]

¹⁸laho paluahkon tonduyni humbani tanoman, anjaha goluhni ulang magou ibahen podang. [501]

¹⁹Ambahni ai ipalumba do ia marhitei naborit sanggah tibal bani podomanni, sanggah maborit iahap das ronsi holiholini. [502]

²⁰Pala gineian iahap mangidah sipanganon, anjaha sobalan ia bani sipanganon harosuhni hinan. [503]

²¹Marherut sibukni, seng haidahon be, anjaha holiholini, na so taridah hinan, boi bilangan.

²²Dohor-dohor mando hosahni hu tanoman, anjaha goluhni bani malekat pamunuh. [504]

²³Porini adong hasomanni sada malekat, pangapiti, sada humbani na saribu, na patorangkon bani jolma ai ukumanni, [505]

²⁴jadi maidop ma uhur-Ni bani, anjaha hatahonon-Ni ma, ʻTobus ma ia, ase ulang tuad ia hu tanoman, ai domma jumpah Ahu tobus ni tonduyni, [506]

²⁵jadi suang ma jorgit angkulani lobih humbani haposoonni hinan; mulak poso ma ia.ʼ [507]

²⁶Martonggo ma ia bani Naibata, jadi balosan ni Naibata ma ia; pataridahkonon-Ni ma bani bohi-Ni ibagas malas uhur, anjaha pasuangon-Ni ma hapintoron-Ni hubani jolma. [508]

²⁷Jadi mandoding-doding ma ia i lobei ni jolma, nini ma, “Domma mardousa ahu, anjaha hupapeol uhum, tapi seng hona balos ai bangku.

²⁸Ipaluah do tonduyhu, ase ulang tuad hu tanoman, anjaha marmalas uhur goluhku mangidah haliharon.ʼ [509]

²⁹Tonggor ma, ganup na sonai ai, ibahen Naibata, dua barang tolu hali bani jolma manisia, [510]

³⁰laho mamboan tonduyni mulak humbani tanoman, ase marmalas uhur ia ibagas sinalsal ni hagoluhan on. [511]

³¹Parimbagaskon ham ma on, ale Job, tangihon ham ma ahu! Sip ma ham, ase hutoruskon mangkatahon hatangku.

³²Anggo adong ope sihatahononmu, bere ham ma balosmu bangku; marsahap ma ham, ai isura uhurhu do mamintori ham. [512]

³³Tapi anggo seng dong be, tangar ham ma ahu; sip ma ham, ase huajarhon bamu hapentaran.”