Read Batak Simalungun JOB 34 Bible Online

JOB 34 - Batak Simalungun bible

JOB 34

¹Dob ai nini si Elihu ma use,

²“Bogei nasiam ma hatangku, nasiam siparuhur, anjaha nasiam na pentar-pentar, tangihon nasiam ma!

³Pinggol do sipareksa hata, songon langit-langit na mandai sipanganon. [513]

⁴Na sintong ai ma pilih hita banta; rap manandai ma hita barang aha na dear. [514]

⁵Ai nini si Job do, ʻBujur do ahu, tapi seng bujur pambahen ni Naibata bangku. [515]

⁶Age pe bujur ahu parladung do ahu ihira; seng hatambaran be ugahku, age seng marsalah ahu.ʼ [516]

⁷Tor ise ma dalahi songon si Job, na manibur apas-apas songon bah, [517]

⁸na mardalan saodoran pakon halak sihorjahon na so sintong, anjaha na marparsaoran pakon halak parjahat? [518]

⁹Ai nini do, ʻSeng adong gunani bani sada dalahi, margoluh na madear ia i lobei ni Naibata.ʼ [519]

¹⁰Halani ai, tangihon nasiam ma ahu, nasiam halak na maruhur, pantang do hatahononkon, Naibata mambahen hajahaton, Pargogoh Na So Tarimbang mangkorjahon hagedukon. [520]

¹¹ Tapi romban hubani pambahenan ni jolma do ibalaskon hu bani, anjaha romban hubani dalan ni ganup halak ihonahon bani. [521]

¹² Tongon tene, seng anjai lang sintong pambahenan ni Naibata, anjaha seng anjai papeolon ni Pargogoh Na So Tarimbang hasintongan. [522]

¹³Ise nani siondoskon tanoh on Bani, anjaha ise do na pajonamkon ganup dunia on? [523]

¹⁴Anggo porini tubuh uhur-Ni mangimbang jolma, itarik use tonduy-Ni ampa hosah-Ni, [524]

¹⁵mintor rotap ma hosah ni ganup na manggoluh, anjaha mulak bani orbuk jolma in. [525]

¹⁶Anggo maruhur ham, bogei ma on, tangihon ham ma na huhatahon on, [526]

¹⁷ʻMintor tarbahen sada halak, na magigi bani uhum ma manrajai? Mintor tarpapai ham ma Ia, parpintor anjaha Pargogoh Na So Tarimbang in?ʼ [527]

¹⁸Ia, na boi mangkatahon bani sada raja, ʻHo na so margagan!ʼ bani halak na sangap, ʻHo halak parjahat!ʼ [528]

¹⁹Ia, na so sitonggor jumbak bani raja-raja, na so mangkira sangapan na bayak humbani na musil, ai jadi-jadian ni tangan-Ni do ganupan ai. [529]

²⁰Sompong matei sidea, tongah borngin. Isonggoti bangsa ai, gabe masab sidea, isontapkon do halak na gogoh, seng pala marhasoman tangan. [530]

²¹Ai itulimati panonggor-Ni do dalan ni ganup jolma, anjaha ididah do sagala langkah-langkahni. [531]

²²Seng dong na golap barang na lotir; na tarbahen parponopan ni halak sihorjahon hajahaton. [532]

²³Ai seng dong ibuhul ari bani jolma, laho hu paruhuman i lobei ni Naibata.

²⁴Ia do na manripuki halak na markuasa, lang pala palobei ipareksa, anjaha ipabangkit halak na legan bahen gantihni. [533]

²⁵Halani torang do ibotoh pambahenan ni sidea, idabuhkon do sidea borngin, gabe maripuk ma sidea. [534]

²⁶Ibogbog do sidea halani hajahaton ni sidea, bani ianan na boi idahon ni halak,

²⁷halani itundali sidea Ia, anjaha seng iparuhurhon sagala dalan-Ni,

²⁸laho mambalaskon bani sidea doruh-doruh ni halak na musil, ai itangihon do doruh-doruh ni halak na masombuh. [535]

²⁹Anggo sip Ia, ise boi mansalahkon? Anggo iponopkon bohi-Ni, ise ma na mangindahi-Si? Ijagai do sada bangsa atap sada halak, [536]

³⁰ase ulang halak parjahat manrajai, gabe hona sidingni bangsa ai. [537]

³¹Sonon ma patut hatahonon ni halak bani Naibata, ʻGijang hinan do uhurhu, seng bangku be mangkorjahon hasamboron, [538]

³²ajarhon Ham ma bangku na so dapot uhurhu hinan; anggo marsalah ahu, seng bahenonku be ai.ʼ [539]

³³Ningon romban hubani pingkiranmu gakni namin Ia mambalas, halani na tinulakmu ai Ia? Ham do na maningon manontuhon, sedo ahu, anjaha na binotohmu, ai ma hatahon ham!

³⁴Halak na maruhur hatahononni ma bangku, anjaha halak na pentar, na manangar ahu, hatahononni ma, [540]

³⁵ʻSeng maruhur si Job na marsahap ai, seng marpanimbangion hatani ai.ʼ [541]

³⁶Dear namin tarlajou si Job ronsi ujungni, halani songon parjahat do ia na marbalos ai.

³⁷Halani itambahi ope hajungkaton bani dousani ai, marhilei do ia i tongah-tongahta, anjaha buei sahap-sahapni dompak Naibata.” [542]