Read Batak Simalungun JOB 36 Bible Online

JOB 36 - Batak Simalungun bible

JOB 36

¹Dob ai itoruskon si Elihu ma mangkatahon,

²“Sabar ham tongkin, ase huajari ham, ai adong ope sihatahononku halani Naibata.

³Humbani na daoh ma aloponku pambotohku, laho patidakkon habonaron ni Sitompa ahu. [555]

⁴Tongon, seng mangguak-guaki hatangkon, halak na gok marpambotoh do hasomanmu na marsahap on. [556]

⁵Tonggor ma, na banggal do Naibata, anjaha seng dong maruhur apas Ia age bani ise, na timbul tumang do Ia marhitei gogoh ni hapentaran-Ni. [557]

⁶Seng paturuton-Ni manggoluh halak parjahat, tapi pasintongonni do uhum bani halak na masombuh. [558]

⁷Seng padaohonni panonggor-Ni humbani halak na bonar, tapi ipahundul do sidea hu paratas rap pakon raja ronsi sadokah ni dokahni, gabe timbul ma sidea. [559]

⁸Porini tarsangkut sidea bani rantei, anjaha jorot ibagas tali sitaronon, [560]

⁹jadi pabotohkonon-Ni ma bani sidea pambahenan ni sidea ampa hasalahanni, ai ma na marparlahou hajungkaton sidea.

¹⁰Ibuha do pinggol ni sidea bani pangajarion, anjaha iparentahkon, ase mubah uhur ni sidea humbani hajahaton. [561]

¹¹Anggo ra sidea manangihon anjaha mambalosi, jadi mardohar ma sidea ronsi ujung ni goluhni, anjaha tahun-tahun ni sidea marhasonangan. [562]

¹²Tapi anggo seng ra sidea manangihon, magou ma sidea hona tembak, matei ma sidea seng sampang dapotan uhur. [563]

¹³Manggila ma ijai halak sipakulah-kulah; seng ra sidea mangindo pangurupion sanggah isangkut sidea.

¹⁴Matei bani haposoonni do sidea, anjaha gok habutakon do goluh ni sidea. [564]

¹⁵Tapi ipaluah do halak na masombuh marhitei hasombuhonni, anjaha ibuha do pinggol ni sidea marhitei hasosakan. [565]

¹⁶Ham pe sihol paluahon-Ni do humbani hasosakan, hu tanoh na lumbang, na so adong sipangkirjati bamu, anjaha pasirsiron-Ni do mejamu gok sipanganon na mantin. [566]

¹⁷Talup do hape mangonai bamu uhum songon bani halak parjahat; uhum pakon habonaron do na manjoroti ham in. [567]

¹⁸Jaga ase ulang itarik pangajaran in ham hu panrisaion, anjaha ulang kahou uhurmu binahen ni banggal ni panobusion. [568]

¹⁹Boi ma doruh-doruhmu in paluahkon ham humbani hasosakan, barang golgolmu mangunsagahkon gogohmu?

²⁰Halani ai ulang ma ihasiholhon ham borngin, na mambahen mapurpur bangsa humbani iananni.

²¹Jaga ham, ulang ma manlembang ham dompak hajahaton, ai halani ai do ase iuji ham marhitei sitaronon.

²²Tonggor ma, timbul do Naibata ibagas hagogohon-Ni; ise ma pangajari usih hu Bani? [569]

²³Ise ma na mangaturhon dalan Bani? barang ise ma na boi mangkatahon, ʻHagedukon do na binahe-Mu in?ʼ [570]

²⁴Ingat ham ma patimbul pambahenan-Ni, na pinuji-puji ni jolma manisia. [571]

²⁵Ganup do jolma mangidah ai, humbani na daoh ididah jolma na galek in ai. [572]

²⁶Tonggor ma, na timbul do Naibata, seng tardadap hita Ia; seng tartulimati bilangan ni tahun-Ni. [573]

²⁷Ia do manarik tektek ni bah dompak datas. Ia do na mambahen udan marhitei hombun-Ni, [574]

²⁸ai ma use na niuseihon ni hombun ai, anjaha mardabuhan bani halak simbuei. [575]

²⁹Adong ma halak na boi mangarusi parmerap ni hombun, ampa parlonggur ni lampolampo-Ni? [576]

³⁰Tonggor ma, ierap do hilap-Ni inggot bani, anjaha irungkub do dasor ni laut. [577]

³¹Marhitei ai do Ia manguhumi bangsa-bangsa, marlobih-lobih do sipanganon ibere.

³²Igoki do tangan-Ni bani hilap, anjaha ipasorohkon do ai bani imbang-Ni. [578]

³³Sora ni longgur-Ni patugahkon parroh-Ni, parringis do Ia dompak halak parjahat.”