Read Batak Simalungun JOB 37 Bible Online

JOB 37 - Batak Simalungun bible

JOB 37

¹“Tongon tene, pala do manlobuk taroktokku halani ai, anjaha lumpat humbani iananni.

²Tangar, tangar nasiam ma pardorom ni sora-Ni, ampa sora na luar hun pamangan-Ni. [579]

³Ipaturut do sora-Ni ai marguling-guling i toruh ni ganup langit in, anjaha hilap-Ni ai das hu ujung ni tanoh on. [580]

⁴Irik hujai mardorom ponggei-Ni, marsora Ia marhitei sora ni hajombuton-Ni, anjaha seng ijolomi hilapni sanggah tarbogei sora-Ni.

⁵Marsangap do Naibata marhitei ponggei-Ni na jombut tumang, Ia do mambahen habanggalon, na so tararusi hita. [581]

⁶Ia do mangkatahon hubani salju, ʻTurun ho hu tanoh!ʼ hubani udan habahaba ampa udan, ʻGobas ma!ʼ [582]

⁷Ia do na manokan ganup tangan ni jolma, ase ganup jolma na tinompa-Ni manandai pambahenan-Ni. [583]

⁸Laho do binatang-binatang hu parponopanni, anjaha manggompang ibagas liangni. [584]

⁹Roh do halisungsung humbani kamarni, anjaha na borgoh roh humbani logou. [585]

¹⁰Marhitei hosah ni Naibata roh es, himpang gabe bah na bolag. [586]

¹¹Boratan do hombun ibahen bani udan, Ia do mangerapkon hombun-Ni na marisi hilap ai.

¹²Ia do pahusor-husorhon hombun ai marguru bani panogu-Ni, laho pasaudkon na pinarentahkon-Ni bani sidea i sab dunia on.

¹³Barang bahen uhuman bani dunia-Ni, barang bahen tuah mambahen ipalopas ai masa. [587]

¹⁴Tangar ham ma in Job, soh ham lobei, anjaha parimbagaskon ham ma halongangan, na binahen ni Naibata.

¹⁵Ai ibotoh ham do, naha pangondoskon ni Naibata parentah-Ni bani sidea, anjaha naha ase marsinalsal hombun-Ni marhitei hilap? (bd. 38)

¹⁶Iarusi ham do parmayap-ayap ni hombun ai ampa horja halongangan ni Parpambotoh Na Gokan Dear in?

¹⁷Ham, na dob mohopan ibahen pakeianmu, anggo masip tanoh on halani logou na hun dangsina,

¹⁸ham do hasoman-Ni paherbangkon langit ai, jonam songon sormin na tinuang? [588]

¹⁹Ajarhon ham ma bennami sihatahononnami bani; aha pe lang tarpajojor hanami halani hagolapan ni uhurnami.

²⁰Adong do nani na palumbahonsi, anggo sihol marsahap ahu? Adong do nani jolma na marsura-sura sihol magou ia?

²¹Tongon sonari seng naidah sinalsal ni mata ni ari, halani ilingodi hombun sinalsalni in; sompong montas ma logou, gabe torang ma use ibahen. [589]

²²Hun utara do roh sinalsal na maromas, hamuliaon na majombut do manginggoti Naibata. [590]

²³Pargogoh Na So Tarimbang in seng tarjumpahi hita Ia; parhagogohon banggal do Ia anjaha parhabonaron, seng ra Ia papeolhon uhum. [591]

²⁴Halani ai, talup do Ia habiaran ni jolma; seng kawahkonon-Ni halak na mangahap pentar ia.” [592]